CEBU, Philippines - Lean o gamay apan nindot tan-awon ang Richard Yap nga niatubang sa mga sakop sa media niadtong Sabado sa udto atol sa press conference nga gipahigayon alang kaniya isip ambassador ug dream advocate sa Filinvest Land Inc.
Si Yap nga unang naila kaniadto pinaagi sa “My Binondo Girl” ug nisikat og maayo sa Be Careful With My Heart, nitug-an sa Banat News Hugyaw (BNH) ug The Freeman Entertainment atol sa intimate interview human sa presscon nga gituyo gyud niya nga magpagamay sa iyang lawas alang sa iyang pagsulod na sa toprating teleserye ni Coco Martin nga “Probinsyano.”
Kontrabida ang iyang character ug siya maoy katigi sab sa character ni Albert Martinez niining maong serye. Matud pa niya circuit training ang iyang exercise aron mugamay siya. Tumong matud pa nila nga mausab ang pagtan-aw sa publiko niya dinhi sa nahisgutang teleserye—lahi sa ‘father figure” image niya sa Be Careful With My Heart, diin macho gyud siya.
Matud ni Yap dako kaayo nga hagit niya ang iyang kontrabida role dinhi niining maong serye sanglit lahi man ang atake niya sa iyang character. “Dili siya showy. I don’t show a lot emotion. Slight smile lang.” Niya pa, pailawom ang atake sa iyang pagka kontrabida.
Gipadayag ni Yap atol sa presscon nga ganahan siya og James Bond movies. Gitin-aw niya nga pangandoy gyud niya nga makahimo og ingon niini nga proyekto sa umaabot, apan sayod siya nga dako kaayo ang budget nga kinahanglan busa nanghinaot na lamang siya nga matuman kini sa tukmang panahon. Isip fan, gibutyag niya nga mas ganahan siya sa Spectre nga maoy latest installment sa James Bond series, itandi sa Skyfall.
Sanglit #iownmydream ang adbokasiya karon sa Filinvest ginapangutana si Richard sa BNH kun unsay damgo niya isip tawo, amahan, ug Pinoy. Tubag niya nga ang iyang damgo matud pa puros na alang sa iyang mga anak. Buot niya nga magpadayon isip inspirasyon sa uban pinaagi sa iyang mga binuhatan.
“For our country I dream that we will have the political will to go on a straight path, to think of other persons than ourselves,” nagkanayon siya.
Napangutana usab sa presscon kun aduna na bay mga kandidato nga niduol niya aron magpa-endorse niya ug kun unsay iyang sumbanan sa pagpili og paluyohan. Dinhi gilab-as ni Yap nga sa nilabay nga 2013 election nipaluyo siya sa kandidatora sa senatoriable nga si Jun Magsaysay ug nga karon wala pay niduol niya o sa iyang kampo. Apan kun ugaling aduna unsay buot mukuha sa iyang suporta, matud ni Yap magmatngon gyud siya ug pangutan-on gayud niya unsay plataporma niini. Mubalibad matud pa siya kun dili haom sa iyang mga sumbanan ang maong kandidato.
Kini kay niya pa, “I don’t what to be in a position that I will be blamed to what happens to our country.” Niingon sab si Yap nga wala musantop sa iyang hunahuna ang pagsalmot sa politika sa umaabot. “ I don’t think I’m cut out for politics.” Suma pa niya, mas makatabang siya sa kung hain man siya mahimutang karon. “I choose to be where I am right now and I think I can help better this way.”
Napangutana usab siya giunsa niya nga magpabiling limyo ang iyang imahe bisan pa man sa kagubot ug mga tentasyon sa showbiz. Tubag niya, “It’s a matter of how you conduct yourself. I separate work from family life,” niya pa.
Aminado ang Sugbuanong si Yap sa presensya sa bashers sa nagkadaiyang social media platforms ug nga bisan wala kay gibuhat nga dautan aduna gyud gihapoy musaway nimo sanglit dili tanang tawo ang mahimuot. Kun siya lamang ang hilabtan, dili matud pa niya kini tagdon. Apan kun iapil ang iyang pamilya, anha na matud pa siya mu-react. Kun aduna matud pay mga negatibo nga tawo nga magsamok niya pinaagi sa iyang twitter ug instagram accounts, i-block ra niya dayon.
Nahisgutan usab sa presscon unsay rason nganong human sa presidential sister isip ambassador, si Yap ang gikuha karon sa Filinvest. Ang Senior Vice President sa Filinvest Inc, Tristan Las Marias nibutyag nga naggumikan kini sa ilang panukiduki diin ilang nakita nga ang kasagaran sa ilang kliyente “self-made” o mga naggikan sa wala, naningkamot, hinungdan nga nagmalampuson.
“The core of our market is starting to be self-made. These are ordinary people who work hard, passionate and successful,” butyag pa ni Las Marias. Gumikan niini, si Yap gayud matud pa ang haom sa ilang adbokasiya.
Nasayran nga duha ka tuig ang kontrata ni Yap sa Filinvest isip ambassador, apan niya pa wala kini nagpasabot nga matapos ra usab dinhi ang iyang paghatag og inspirasyon ngadto sa uban inig ka pupos sa iyang kontrata.
Samtang gibutyag ni Yap nga human sa partisipasyon niya sa ‘Probinsyano”, sundan dayon kini og teleserye diin siya na pud ang bida. Nakahibawo na matud pa siya sa kosepto sa istorya ug giplansa na lamang kini og maayo sa ABS-CBN aron masugdan na ang taping.