CEBU, Philippines - Nominado ang Pinay nga aktres Shamaine Buencamino sa kategoriyang Best Actress sa Asia Pacific Screen Awards (APSA) 2015 didto sa Brisbane, Australia.
Nabatyagan ang maayong performance ni Shamaine sa indie comedy nga “Lorna” ug nakatigi sa nahisgutang kategoriya ang mga aktres gikan sa nagkalain-laing nasud nga sila si Fatemeh Motamed Arya (Iran), Kirin Kiki (Japan) ,Evgeniya Mandzhieva (Russia) ug Lee Yeong-Lan (South Korea).
Si Shamaine ang nag-inusarang Filipino nga nominado karong tuiga sa Asia Pacific Screen Awards.
Ang maong award giving body maoy naghatag og pasidungog kaniadto nila ni Nora Aunor ug Brillante Mendoza isip Best Actress ug Achievement in Directing award gumikan sa pelikulang “Thy Womb” niadtong 2012.
Sa miaging tuig, nakadaug gihapon si Nora Aunor isip Best Actress alang sa “Hustisya” . samtang ang writer-director nga si Giancarlo Abrahan nominado sa Best Screenplay category alang sa “Dagitab”.
Ang mga mananaug mahibaw-an karong December ug nagpanikad na si Shamaine sa resulta niini. (Sanden J. Anadia)