PIK: Mrs. Sotto na talaga ang tawag ngayon kay Pauleen Luna dahil sa nakikita kung paano niya alagaan si Vic Sotto.
Nag-absent nga si Pauleen sa Eat Bulaga at ipina-move ang taping niya sa Dangwa dahil kailangan niyang samahan si Bossing Vic sa shooting ng My Bebe Luv sa Zambales.
Tuwang-tuwa si AiAi delas Alas sa nasaksihan niya kung paano raw alagaan ni Pauleen ang kasintahan.
Kasama rin ni AiAi ang boyfriend niyang si Gerald Sibayan kaya nagpa-picture silang apat na ipinost niya sa kanyang Instagram account dahil minsan lang daw nangyari ‘yung magsama-sama silang apat.
PAK: Hindi itinatanggi ni AiAi delas na parang package deal na rin sila ni Jiro Manio ngayon pagkatapos niyang pumirma ng one-year movie contract sa Regal Films.
Pang-Mother’s Day presentation ang pelikulang gagawin niya sa Regal at ayaw na raw sana niyang may leading man pa dahil kakaibang mother’s story daw itong gagawin niya sa Regal.
Ang tiyak daw na kasama niya ay si Jiro dahil ipinakiusap niya ito kay Mother Lily Monteverde para makabalik na ito sa pag-aartista.
Nakikita raw niya ang malaking pagbabago kay Jiro kaya paglabas daw nito ng rehab, sa kanya titira ang dating child actor para masubaybayan niya.
BOOM: Kagulat-gulat ang dami ng taong nakapila sa National bookstore at sa Ticketworld para bumili ng ticket ng Grand Fans Day ng AlDub na gaganapin sa Philippine Arena sa darating na Sabado, October 24.
Kahit kasagsagan ng bagyong Lando, walang pakialam ang fans basta makabili na sila ng tickets.
Inaasahang masu-sold out bago mag-Sabado ang tickets dahil sa rami ng mga gustong maging bahagi sa kauna-unahang fans day ng pinakasikat na loveteam ng bansa.
Kaya nga ang dami na ring nagprisintang mag-guest dito para makapag-promote ng kanilang show.
Ang kikitain nitong grand fans day ay para sa mga ipatatayong library sa mga paaralan.