CEBU, Philippines - “His name is meant to echo our brand.” Ingon niini ang buot mahitabo sa mga tagdumala sa Kuya J chain of restaurants karon sa pag-abot na sa award-winning drama actor Jericho Rosales sa ilang pamilya isip brand ambassador.
Tinguha sa Kuya J nga mabaniog lukop nasud ang ilang mga kan-anan aron mas halapad ang gidaghanon sa mga tawo ang makatilaw sa kalamian sa ilang mga mugna, nga gihigugma na pag-ayo sa mga Sugbuanon sa pipila na ka katuigan ug inanay na nga gihangop didto sa kaulohan.
Gumikan kay tingoha man sa Kuya J nga mabaniog dili lamang dinhi sa Sugbo kundili sa tibuok nasud mismo, nakahukom ang mga kadagkuan sa maong kompaniya nga panahon na nga adunay dagway nga mubarog isip representante sa ilang produkto. Si Echo ang napili gumikan kay matud pa haom kaayo kini sa mga hiyas nga usa ka “kuya” sama sa manggihunahunaon, maabiabihon, mapinanggaon, respetado, ug buotan. Haom sab matud pa si Echo isip brand ambassador gumikan kay sama sa Kuya J, tinguha niini mao ang paghatag og ‘the best” kanunay alang sa katagbawan sa tanan.
Dinhi giklaro ni Echo nga ang “J” sa ngalan sa restaurant wala nagkahulugan og Jericho, apan kun maoy gusto sa publiko, dili ra sab siya mureklamo. Hinuon, ang tag-iya sa Kuya J nga si Winglip Chang nitug-an nga ang J nagsimbolo sa tanang mga kuya niining kalibutan. Nagsugod sab matud pa sa letrang J ang kasagaran sa sikat nga ngalan.
Ug tuod man naglanog tingog ni Jericho atol sa usa ka mini-concert nga iyang gibituonan niadtong Domingo sa hapon diha sa SM North Wing isip labing unang brand ambassador sa kompaniya. Nanganawkanaw usab ang singgit ug abiba sa mga tumatan-aw nga nalingaw kaayo sa iyang mga kanta ug nahugyaw nga nakakita sa ilang idolo.
Atol sa maong mini-concert gipakita sab sa labing unang higayon ang TV commercial sa maong restaurant. Dinhi gayud kini sa Sugbo gilusad sanglit Sugbuanon man nga brand ang Kuya J.
Samtang walay duda, usa si Jericho o mas naila isip Echo sa pipila ka mga artista sa Pilipinas nga maayo kaayong muabi-abi og fans. Wala siyay pugong-pugong kun performance ang hisgutan— todo bigay. Gani, giangkon niya nga lima lamang unta ka mga awit ang gitakda niya nga paambitan niadtong tungora kay mao lamang ang ilang nasabutan, apan gipakapinan niya kini og duha gumikan kay maoy gihangyo sa mga nitan-aw kaniya. Usa siya ka matang sa performer nga dili magtindog lamang sa entablado kundili mutuyok gyud sa dapit nga gipahigayonan sa kalihukan aron mas makapaduol kaniya ang iyang mga fans.
Apan human sa usa ka lamian nga panihapon nga gibituonan sa mga pambato sa Kuya J sama sa crispy pata, crispy catfish, sisig, kare-kare ug daghan pa, gipadayag ni Echo nga dili kaayo siya apektado sa pagpadaghanay og followers sa nagkadaiyang social media platforms sa ubang mga artista.
“There are artists na walang instagram but grabe yung star power nila,” nagkanayon siya ngadto sa mga sakop sa Cebu Entertainment Group (E-Group). Matud ni Echo dili diha sa kadaghanon sa imong followers masukad ang imong kasikat. “Ang value mo is your character,” niya pa. “It’s the engagement that you get that is important.”