CEBU, Philippines – Human sa kalampusan sa pelikulang “Heneral Luna” nga gibidahan ni John Arcilla , ang kinabuhi na usab sa laing bayani nga si Gregorio Del Pilar maoy mosunod nga himoan og pelikula ug pagabidahan kini ni Paulo Avelino. Kahinumduman nga duna’y short appearance si Paulo sa Heneral Luna isip pasiunang pagpaila sa maong proyekto. Karon pa lang daan, naghinam-hinam na ang moviegoers sa pelikulang maghisgot kang del Pilar.
First concert
Nagpanikad na ang rapper nga si Gloc-9 sa iyang concert sunod buwan sa Music Museum. Suma pa sa singer nga sa 18 ka tuig na sa iyang singing career, karon pa lang siya makasuway og iyang solo concert.
Baron midangop sa psychiatrist
Giangkon ni Baron Geisler nga nagpakonsulta gyud siya sa psychiatrist human niya nasuwayan ang kabug-at sa iyang role isip kontrabida sa seryeng Nathaniel nga nahuman na kagabii. “I spoke to my psychiatrist today. I needed her help because my character Gustavo has been changing me. She gave me three options and we agreed that I should choose the third one. I decided to go to the beach for the next three weeks to rediscover himself,” tipik sa Facebook page ni Baron.
Kinabuhi ni Elha sa MMK
Ang istorya sa kinabuhi sa “The Voice Kids” season 2 grand winner nga si Elha Mae Nympha maoy matan-awan karong gabii sa Maalaala Mo Kaya. Si Brenna Garcia maoy modala sa karakter ni Elha. Malakip usab sa maong episode sila si Tina Paner, Matt Evans ug Nikki Valdez.
Acting project ni Sarah
Aduna’y acting project si Sarah Lahbati sa ABS-CBN busa dako gyud ang iyang pasalamat sa maong network gumikan kay bisan wala siya’y exclusive contract, gihatagan gihapon siya og show niini. Kanunay usab nga molugwa si Sarah sa Sunday musical variety show nga ASAP.
Daniel target ni Toni
Layo na og naabtan ang career ni Toni Gonzaga ug usa sa target nga gusto niya nga makauban sa proyekto mao ang aktor nga si Daniel Padilla. Matud pa niya nga maayong artista si Daniel ug buotan pa gyud.
Giusab ni Coleen
Gibutyag ni Billy Crawford nga napausab gyud ni Coleen Garcia ang iyang kinabuhi busa gitawag niya kini og anghel. Dili malilong ang kalipay nga gibati ni Billy matag adlaw gumikan sa iyang girlfriend.
Katrina kontento ra
Tsika pa ni Katrina Halili nga bisan wala siya’y hinigugma karon, kontento gihapon siya sa iyang kinabuhi gumikan sa maayong dagan sa iyang career ug naa sa iyang kiliran ang iyang anak nga si Katrence. “Simula nung nagka-Katie (anak) ako, sobrang happy ko na, e,” suma pa ni Katrina.
Snooky mibalhin sa INC
Gibutyag ni Snooky nga dako og natabang kaniya ang Iglesia ni Cristo gumikan mao kini ang nitabang kaniya og ampo sa dihang nasakit siya ug naangkon gyud niya ang hingpit nga kaayohan. Suma pa ni Snooky nga duna’y duha ka higala nga maoy nag-agni kaniya sa pagbalhin sa INC ug nakauyon gyud siya sa pamaagi niini. Apil si Snooky sa pelikulang Felix Manalo.