Be better not bitter!

Sus, labihan na gyud ka sikat sa AlDub (Alden Richards ug Maine “Yaya Dub) loveteam. Ikatulo na gud na nako nga column nga mahisgutan gyud sila. Hahahaha…sikat na gyud kaayo! Bitaw, ikaw ba ang makaangkon og 3.5M tweets in 24 hours, napildi gud ang hashtag nga gigamit sa pagbisita ni Pope Francis last year. Apan mao lagi na, kun sikat kaayo perte sab kadaghan ang nasuya. Mga bitter kaayo!  Unsaon taman nga ingon man gyud ang katigulangan nga ang punoan nga mamungingi og bunga batuon gyud. Pakkk!

Sus bisag unsa na lang gyud tawon ang gihimo sa mga basher nga sure ko nga nangasuya gyud. Adtong usa ka adlaw naay gipakatap nga mga hulagway sa internet kay matud pa bayot kuno si Alden uy ug naa ni uyab nga bayot sab nga iyang gihukhukan sa wala pa siya na artista. Ang ending kay presidente diay tawon to sa iyang fan’s club nga ginganlan og Nate ang giingong uyab ni Alden. Unya kuha diay tong maong mga hulagway atol sa usa sa ilang Christmas parties nga si Alden ang sponsor. Ug isip kamatuoran nag-upload sab si Nate og sweet photos ni Alden kauban sa mga babaye niya nga fans samtang naghumol sila sa swimming pool. Matud pa ni Nate, sweet ug buotan gyud matud pa si Alden, unya kada tuig gyud magpahigayon og Christmas party para sa mga fans diin hatud kuha pa ang maggikan sa halayo kay didto sa Laguna permi ipahigayon ang ilang kalihukan. Sus, ka buotan nga bata! Mao diay nga napuno sa blessings karong panahona. Namunga na ang kaayo nga iyang gipamugas. Pakpak!

Sa nagkadaiyang social media site sab, sus labihan makapangaway ang bashers uy. Dili matud magdugay ang ka sikat sa loveteam, dili matud pa nindot ug bisan unsa na lang. Crab mentality at its lowest form kaayo. DMD!  Ang ako lang ba, dili na lang gyud ta malipay sa kalampusan ug mga grasya nga nadawat sa atong isig katawo noh? Masuya gyud ta? Ka walay ayo anang kalakiha brad! Panapanahon ra man gud na. Hunahunaon sab nato nga pipila ka tuig sab tawon na si Alden nagpaabot nga muabot kining maong grasya nga iyang natagamtam karon. Nagbinut-an ug nagtinarong na siya sa iyang trabaho, naningkamot ug wala nanghasul sa iyang isigkatawo. Gihaguan niya ang unsa man nga naa niya karong panahona. Nakit-an sa Ginoo ang mao niyang mga paningkamot, hinungdan nga gidungog ug gibira siya pataas. Pakpak!

Honungon na nato kining dili maayo nga batasan natong mga Pinoy. Yes kanang gitawag nila og crab mentality ba. Sa inato pa, kana bitawng kinsay musaka maglumbaanay kita pagbira aron ang maong nisaka, nagmalampuson ug nabulahan mahibalik sa ubos. Adto sa katunggan, tan-awa nang mga agukoy, magbinirahay na sila, maglayog aron dili makauna og sulod sa lungag ang katong nag-ung-ong na sa pultahan o lungag. Diha maggikan nang “crab mentality” nga term.  And that is very negative. Aguy!

Mag-usab na kita dear okRYANians. Suwayan nato nga matinud-anong mupakpak ug mudayeg sa kalampusan sa uban. Dili nata anang mupakpak tuod, pero inig talikod nagkusmod diay. Atong ikalipay ang kalampusan sa uban gumikan kay kini nagpasabot nga adunay tim-os nga paglaum ug dakong kahigayonan nga ugma damlag kita na sab ang anaa sa taas. Basta kaluhaan lang gyud nato og paningkamot inubanan sa hugot nga pag-ampo. Ayaw mog kasuya sa inyong isigkatawo kay panapanahon lang yan. Kun naa pakas ubos, paningkamot, panikaysikay ug hangad sa langit dayong ampo. Be BETTER not bitter! Pakpak!