Neri napunitan
CEBU, Philippines - Giangkon ni Neri Naig nga napunit ang gisabak niya nga bata duha ka buwan na ang milabay. Mao unta kini ang labing una nga anak nila sa iyang bana nga si Chito Miranda. Kahinumduman nga gikasal sila si Neri ug Chito sa miaging tuig.
Pinugsanay ang peg
Wala gihapon lung-i si Kris Aquino sa pipila niya ka mga higala ug padaganon siya pagka-senador karong 2016. Barugan sa TV host ang iyang gisulti kaniadto nga dili siya mosulod sa politika.
Kusog ang negosyo
Gipasigarbo ni Chery Pie Picache ang gipanag-iya niya nga restaurant sa Quezon City gumikan kay Pinoy foods ang gidalit. Suma pa sa aktres nga usa kini sa rason nga kusog kaayo ang iyang negosyo.
Atiman sa anak
Kanunay nga magbalik-balik sa London si Gretchen Barretto. Giingong nangunay kini sa pag-atiman sa iyang anak nga si Dominique nga matud pa nitungha sa usa ka fashion academy sa maong dapit.
P150M ang gasto
Miabot ngadto sa P150 million ang gasto sa pelikulang Felix Manalo nga maghisgot sa istorya sa kinabuhi sa labing una nga executive minister sa Iglesia Ni Cristo. Si Dennis Trillo maoy midala sa karakter ni Mr. Manalo. Ipasalida na ang maong pelikula karong October 7, 2015
Lovi nahagit sa Beautiful Strangers
Gipadayag ni Lovi nga sa tanang serye nga iyang nabuhat nahagit siya og maayo sa Beautiful Strangers gumikan kay lahi gyud ang dagan niini busa samot siya nga naningkamot aron matarong niya og portray ang iyang karakter. “I’ve done lot of shows in GMA 7, pero iba ang Beautiful Strangers. Ang ganda ng story, ang bilis ng pacing at laging may pasabog at para bang magtatapos na. Kahit mahirap, it’s fun doing it,” suma pa sa aktres.
Derrick mosamok sa AlDub
Giingong pasudlon puhon sa Eat Bulaga si Derrick Monasterio aron himoong ka-love triangle nila ni Alden Richards ug Yaya Dub. Suma pa nga patas-an pa og maayo ang istorya sa AlDub Kalyeserye.
Gala chair si Charo
Ang ABS-CBN President and Chief Executive Officer (CEO) nga si Charo Santos-Concio maoy magsilbing Gala Chair alang sa 43rd International Emmy Awards nga paga himoon sa New York City karong November 23. Tambongan ni Charo ang naglinya nga mga kalihukan nga dunay kalabotan sa Emmy Awards.
Nora giatngan ni Vice
Gipangandoy ni Vice Ganda nga makaangkon of selfie photo uban sa superstar nga si Nora Aunor. Dugay na siya nangandoy niini apan wala lang gyud siya makatayming og duol sa super star bisan pa man nga adunay mga higayon nga nagkaabot sila sa pipila ka kalihukan. “Close ako kay Ate Vi (Vilma Santos). Kay Inang Maria (Maricel Soriano), close ako. Si Mega (Sharon Cuneta), chika ko. Si Ms. Nora Aunor na lang,” saysay pa ni Vice sa interview niini sa Kris TV kagahapon.
Nag-date na gyud
Giangkon ni Bret Jackson nga nag-date na sila ni Ella Cruz ug nag-ilhanay pa sila sa tagsa-tagsa nila ka kaugalingon. Giklaro ni Bret nga dili sila uyab apan malipayon siya kung mag-uban silang duha.
Angelica wa kapugong namalikas!
Gitubag ni Angelica Panganiban ang pipila niya ka bashers human siya giintriga nga matud pa iyahang gipadungog-dungog si Bea Alonzo pinaagi sa hulagway nga iyang gi-upload .
Una nga gi-upload sa aktres ang ang litrato sa Instagram kung diin nagsul-ob siya og kalo nga nagkatawa.
Dunay pipila niya ka Instagram followers ang nagtuo nga si Bea ang iyang giigo gumikan kay natayming usab kini nga nag-post og hulagway uban sa boyfriend niini nga si Zanjoe Marudo samtang nagbakasyon sa Bohol.
Wala makapugong si Angelica ug napungot siya og maayo sa lenggua sa iyang followers.
Human niini, gi-upload sab niya ang hulagway ni Bea nga daw maoy gipasabot sa basher niya ug iyang giklaro nga managhigala sila sa aktres. Dinhi naglenggua usab siya nga si Bea ang rayna sa ABS-CBN.
9th Hu Niño ugma na!
Magsidlak-sidlak na pud karong tuiga ang Huniño:Huni Halad Alang Kang Señor Santo Niño, nga anaa na sa iyang ika-siyam ka tuig karon.
Ugma, Biyernes alas 7:00 sa gabii na madunggan ang mga komposisyon sa 12 ka finalists diha sa Cebu Coliseum.
Ang project director sa maong programa nga si Gloria Villarojo nibutyag dinhi sa Banat News Hugyaw nga sukad nagsugod ang Huniño, naandan na gyud nga himuon kini sa dakong hawanan sa Basilica Minore del Sto. Niño de Cebu Pilgrim Center.
Apan karong tuiga, himoon kini sa Cebu Coliseum aron dili na kini maapektohan sa uwan.
“Sa nilabay nga mga Huniño, mag-uwan gyud permi, maong naka-decide ang committee nga sa Cebu Coliseum na lang, ug daghan pud ang tawo nga makatan-aw kay dako man ang lugar,” nagkanayon si Villarojo.
Gumikan kay nagdugay man ang maong kompetisyon, nagpaila lang nagpabiling buhi ang local music ug nagbaha gyud ang mga tawo nga duna’y talento sa pagama og kanta nga halad alang sa balaang bata.
Manghugyaw usab ugma sa gabii ang special guest kinsa modalit usab og awit, ang rector sa Basilica nga si Father Jonas Mejares.
Sama sa milabay nga mga tuig, gipaabot nga hugyaw gihapon ang Huniño karong tuiga gumikan kay live accompaniment ang madunggan sa mga tawo nga muduyog sa matag awit.
Mopadungog usab sa dili basta-basta nga huni ang Cebuana Divas nga sila si Maria Donna (Shanghai Asia Music Festival 2006 Grand Prize Winner), Raki Vega (ABS-CBN’s Grand Champion Ultimate Born Diva) ug Ana Fegi, ( ABS-CBN Kapamilya Artist).
Nagkanayon si Villarojo nga sa miaging mga Huniño, tag-usa ra gyud ka diva ang ilang guest busa gipaabot nga mahugyaw og samot ang audience karong tuiga gumikan kay ang tulo gyud maoy motungtong sa entablado.
Ang Cebuana Divas mogahin gyud sa ilang oras sa maong kalihukan isip pasalamat kang Senor Santo Niño sa kalampusan nga ilang naangkon sa tagsa-tagsa nila ka kinabuhi.
Gawas sa mga tropeyo, ang grand prize winner makadawat og P50,000, ang second placer adunay P30,000 samtang ang third placer makadawat og P20,000. Ang best interpreter makaangkon og P5,000 , samtang P10,000 ang tanang finalists.
Dili usab magpaulahi sa paghatag og komedya ang mga host sa 9th HuNiòo – Huni Halad Alang Kang Sto. Niòo nga sila si Ms. Mary Rose Villacastin-Maghuyop ug Rev. Fr. Dan de los Angeles. (BANAT NEWS)
- Latest
