Silong gitandi sa Fifty Shades

CEBU, Philippines – Human nilugwa ang thriller sa indie film nila ni Piolo Pascual ug Rhian Ramos nga “Silong” aduna’y mga niingon nga susama kini sa erotic romantic drama movie nga “Fifty Shades of Grey” gumikan sa init nga mga eksena.

Ang usa sa mga direktor ug writer  niini nga si  Jeffrey Hidalgo nisaysay nga lahi ang dagan sa istorya niini ug dili kini susama sa Fifty Shades of Grey ilabi na nga duna’y dakong twist sa katapusang bahin sa Silong.

‘Silong’ is a romantic thriller and is quite far from ‘Fifty Shades’ and most probably more twisted,” nagkanayon si Jeffrey sa dihang nahinabi sa Interaksyon.

Dugang pa niya nga duna’y mga makapakugang nga rebelasyon sa dagan sa istorya niini.

Nagkanayon si Jeff nga  dakong hagit kaniya ang pagama sa maong proyekto, hinuon dili na bag-o kaniya ang film production  gumikan kay nalakip na siya kaniadto sa mga pelikula ug sa mga programa sa telebisyon.

Sakop kaniadto si Jeff sa vocal group nga Smokey Mountain sa dihang wala pa niya sudli ang film production ingon man usab ang kalibutan sa pag-arte.

“I used my experience [as an actor] to learn more about what goes on behind the lens. I guess I was really more interested to direct than act once I started working in TV and movies. It is just now that I really am seriously transitioning into this new field of directing and so far so good because I plan to do this all my life. I am really hoping ‘Silong’ will open doors for me,” saysay pa niya.

Matud pa niya nga dako gyud ang ilang puntos nga nakuha nila ang mga bida niini nga sila si Piolo ug Rhian.

“Piolo has just finished the blockbuster ‘The Breakup Playlist’ and Rhian is coming from the success of ‘The Rich Man’s Daughter’ on TV. I guess it’s really just the right time to finally show this film to the public,” dugang pa ni Jeff.

Kiray ug Kean magpares sa pelikula

Si Kiray Celis maoy leading lady sa singer-actor nga si Kean Cipriano sa upcoming romantic-comedy film nga  “Love Is Blind.”

Sa Instagram, ni-post si Kean og mga hulagway nila ni Kiray samtang didto sila sa set sa maong pelikula.

Gidumala kini sa Regal Films ug ubos kini sa direksyon ni JP Laxamana.

Tak-om  pa si Kean kung unsa ang dagan sa istorya niini apan gibutyag niya ang pangalan sa ilang karakter sa maong pelikula, modala sila isip Yari ug Fe.

“You’ll meet them soon once we finish shooting .Watch out! Kiray and I shot weird scenes already,” tipik sa Instagram post ni Kean.

Sharon Stone naghubo sa magazine!

Naukay ang entertainment world sa Hollywood, human nilugwa ang hubo nga hulagway sa 57 anyos nga si Sharon Stone sa nagkadaiyang social media platforms sa nilabay nga adlaw.

Kining maong hulagway, tipik sa mga pictures nga makita sunod bulan sa September issue sa fashion magazine nga Harper’s Bazaar.

Si Stone nisikat og maayo kaniadto pinaagi sa pelikula nga ‘Basic Instinct” diin giisip siya nga sex symbol niadtong 1992.

Nasayran nga niadtong 2001 nahiagum siya og brain aneurysm diin nakabaton siya og cerebral hemorrhage.  Niining bag-o lamang siya niangkon sa iyang nahiaguman.

Apan gumikan niini, nagkalisod siya sa iyang career, diin niadtong 2010, sa iyang guest appearance sa 11th season sa TV series nga “Law& Order” kanunay siya nga makalimot sa iyang mga linya, diin giisip niya kadto nga maka-uwaw nga mga gutlo sa iyang career ilabi na nga katrabaho pa niya  ang  mga banggiitan nga artista sa industriya.

Gitakda nga mubalik si Sharon sa telebisyon pinaagi sa series nga Agent X diin siya maoy executive producer ug mudala sa papel nga vice president sa Amerika.

Taga Pennsylvania, USA si Sharon, diin sa edad nga 19 anyos nibiya siya sa iyang yutang natawhan ug nanimpad sa New York pinaagi sa pagpirma og kontrata ubos sa sikat nga Ford Models.