CEBU, Philippines – Mipagawas na og playdate ang Viva Films sa pelikulang “Felix Manalo” ug matan-awan kini karong October 7. Si Manalo ang founder sa Iglesia ni Cristo. Giingong dugay nahuman ang shooting niini aron lang gyud masiguro ang maayong kalidad sa pelikula. Ang maong pelikula gilangkoban nila ni Dennis Trillo, Lorna Tolentino, Gladys Reyes, Congressman Alfred Vargas, Raymond Bagatsing, ug Tonton Gutierrez.
Makasuway na gyud
Sa labing unang higayon, nakabaton og indie film si James Blanco ug kini nag-ulohan og Balat Kayo kung diin makauban niya si Nathalie Heart. Nakasuway na usab si James og bed scene gumikan sa maong proyekto.
Ai Ai ug Jiro muadto sa Japan
Wala makapugong si Ai Ai delas Alas sa iyang emosyon ug nakahilak gyud siya samtang nagsugod og proseso alang sa Japan visa ni Jiro Manio. Matud pa nga naikog si Jiro kaniya apan iyaha kining giingnan nga iya kining responsibilidad isip ikaduha niya nga inahan. Giandam na daan ni Ai Ai ang paglarga nila ni Jiro sa Japan aron mahimamat ang biological father niini.
Sorpresa sa uyab
Gibutyag ni Matteo Guidicelli nga dunay mga eksena nga naka- boxer shorts ug nag- topless siya sa cable series nila ni Shaina Magdayao nga Single/Single sa Cinema One. Suma pa ni Matteo nga wala kahibalo niini ang iyang uyab nga si Sarah Geronimo busa segurado nga makugang gyud kini.
JM nagpanikad ni Jen
Naghinam-hinam na si JM de Guzman sa umaabot nga pelikula nila ni Jennylyn Mercado nga Walang Forever nga entry sa Metro Manila Film Festival. Suma pa ni JM nga dili basta-basta nga aktres si Jen busa dakong garbo alang kaniya nga makauban niya kini sa proyekto.
Toni mitin-aw sa isyu
Niulbo ang blind item dili pa lang dugay kalabot sa bag-ong gikasal nga TV host/actress nga matud pa under kaayo niini ang iyang bana ug siya maoy tigkupot sa kuwarta niini. Mitingog si Toni Gonzaga niini ug nitataw nga dili siya ang gipasabot sa maong blind item gumikan kay patas ang pagtratar nila sa usa’g-usa sa iyang bana nga si Paul Soriano.
International broadcaster
Mapasigarbohong gipahibalo sa head sa news department sa ABS-CBN nga si Ging Reyes nga mobalik na sa ilang tugkaran ang award-winning broadcast journalist Cathy Yap-Yang. Nakatrabaho si Cathy sulod sa pipila ka tuig sa usa ka TV station didto sa HongKong.
Wala’y bakante
Maglisod na og lugwa si Alden Richards sa mga mall show sa mga lagyong lugar gumikan sa kapuno sa iyang schedule. Makita si Alden sa telebisyon gikan sa Lunes hangtud sa Sabado sa programang Eat Bulaga ug aduna pud siya’y PinaSaya sa adlaw nga Domingo busa wala na siya’y bakante nga adlaw.
James maayo moluto
Giangkon ni James Reid nga duna siya’y talento sa pagluto ug mahiligon siya mag-standby sa kusina basta wala siya’y lingaw. Bukas usab ang aktor sa posibilidad nga magtukod puhon og restaurant.
Adbokasiya ni Marian magpadayon
Gisaad ni Marian Rivera nga human niya’g panganak ipadayon gyud niya ang iyang adbokasiya sa pagtabang sa Women and Children with Disabilities.“Sa interview ko, palagi ko sinasabi na naging makabuluhan ang buhay ng isang artista kapag may nata-touch kang buhay, at nagiging inspirasyon ka nila,” nagkanayon ang GMA7 Primetime Queen ngadto sa www.pep.ph.