Makalingaw apan medyo maldidto

CEBU, Philippines – “Social Media Celebrity”. Siya mao si Medyo Maldito, kansang mga bisayang memes, makadaghan i-share sa iyang Facebook followers ug daghan gayud ang maigo, ug mahimuot. Usa ka tuig na siya sa paggama og memes, diin matud pa niya, nasugdan dihang gidapit siya sa usa niya ka higala aron mamahimong admin sa usa ka page.

Gi-invite ko sa akong amigo nga mag admin og usa ka page (Bisaya Inspiring Photos.). Daghan na kaayo memes sa internet. Pero ang BISAYA memes maoy bag-o maong ni suway ko, asoy niya sa Banat News Hugyaw (BNH) pinaagi sa private message interview.

Medyo Maldito ang iyang gidala nga ngalan kay sayon ra matud pa nga ma-search.

“Nagsugod ko’g gamit og Medyo Maldito sa Twitter. Akong mga posts kay usahay maldito, pero usahay cheesy maong kani akong gigamit. Pero gipili ko gyud ni tungod kay dali ra mahinumduman. Kung gusto nila muadto sa akong page, dali ra nila ma-search akong pangalan.

Ang labing una niyang namugna nga meme mao ang hulagway nila sa iyang higala.

“Naa mi picture sa akong amiga nga ako siyang “gisung-ay” aron makakita siya sa show. Putot lagi. Paghuman, akong gi-edit unya gibutangan og caption: Siya: Gikapoy na ka? Ako: Wa man. Siya: Basin gikapoy na ka, munaog na lang ko. Ako: Di man ko kapoyon nimo. Ikaw man akong kusog.

Si Medyo Maldito kinsa nagbase sa Singapore, magmugna og labing daghan tulo ka meme sa usa ka adlaw. Mamugna na niya ang usa ka meme sulod lamang sa 10 minutos.

Si Medyo Maldito, usa sa mga nagsuwat sa karon nagkasikat na nga kanta ni Von Saw, ang “Sa Akong Heart”. Saysay pa niya, Originally, entry ni Ronald Ensalada ang Sa Akong Heart sa Vispop last year. Last month, gi-message ko ni Sir Jude Gitamondoc nga among irevise ang kanta. Since ang concept kay bisaya pick up lines, na challenge ko ug nisugot ko diritso. Labaw na nga si Sir Jude, di basta basta. Maong blessed kaayo ko nga nakasuwat na pud og kanta kauban siya.

Sikat gyud siya sa social media ilabi na sa Facebook diin dili pa gani abtan og usa ka oras human niya ma-upload ang usa ka meme, liboan na dayon ka likes ang magpusot-pusot. Apan alang kang Medyo Maldito, dili kini importante alang kaniya sanglit, buot lamang gayud niya nga makapahimuot.

“Nindot kaayo ang pamati nga daghan ko’g mapakatawa pinaagi sa mga quotes ug memes. Priceless. Pero kanang social media celebrity, wa ko gahunahunaana kay pareha ra gyud ko sa uban. Ingon pa sa quote, “Just because someone has more followers, doesn’t mean they’re better than you. Hitler had millions. Jesus had 12.”

Mensahe niya ngadto sa iyang followers: Naay mga friends nga magpasalamat kay napakatawa daw nako sila. Apan wa sila kahibaw nga mas nalipay ko’g ayo nga nalipay sila. Maong daghan kaayong salamat. Ug kung aduna may bashers nga di ganahan nako, aw, di pud ko ganahan ninyo.

BNH: Sa kadaghan na sa imong nahimo nga meme, unsay top 3 favorites nimo ug ngano man?

Medyo Maldito: 1. “Unta ang mga loyal nga babae, maadto sa seryoso nga laki. Ug ang mga bigaon nga bae, maadto sa manyakis nga laki. Aron everybody happy.” 2. “Ang mga babae, dugay kaayo mahuman og ligo, magpili pa’s sanina, magpa gwapa ug mangarti... unya paghuman, ilaron ras uban laki.” 3. “Kung di ko nimo teksan, di pud taka teksan. Bahala ka diha. Kagwapo gud nimo.”

Kaning 3 akong favorite kay mu-remind ni sa akong friends nga they deserve someone nga di sila binuangan ug di nila kinahanglan mugukod sa laki.

BNH:  Aduna ka bay hinigugma karon? Unsay kalidad sa binuhat nga imong higugmaon o gihigugma?

Medyo Maldito: Naa koy ganahan pero wa ko kahibaw kung ganahan pud siya nako. Haha. Ganahan ko’g babae nga lingaw kastorya. Kay kanang hamis nga nawong ug nindot nga lawas, mawala ra man na. Para nako, mas gwapa gyud nang babae nga lingaw kastorya. Ganahan pud ko’g babae nga in-love sa Ginoo. Bahala’g himuon ko’g kaduha basta si Lord ang una.

BNH: Unsa ka nga matang sa hinigugma?

Medyo Maldito: Loyal. Kung siya, siya ra gyud. Di ko ganahan mag-cheat kay makagaba.

BNH: Unsa para nimo ang kahulugan sa gugma?

Medyo Maldito:  Para nako, ang gugma mao nang buhaton nimo ang tanan aron malipay siya unya wa ka gadahom og bisag unsa in return.

BNH: Pilay imong edad dihang una kang nahigugma? Unsay mensahe nimo alang niadtong maong binuhat nga unang nakapapitik sa imong kasingkasing?

Medyo Maldito: Fifteen years old ko atong una kong nahigugma. Akong mensahe para niya, salamat sa tanan. Unta malipayon ka kung aha man ka karon ug i-add na unta ko nimo’s Facebook.

BNH: Kun magmugna ka og meme kabahin sa gugma, unsa man kini?

Medyo Maldito: “Kung subject ning gugma, usa gyud ko’s pinakabogo. Pero bisag mabagsak, di gyud ko mauwaw kay di man ko mag-cheat.”

Kun ugaling…

BNH: Kun ma-stranded ka sa usa ka isla nga walay nanimuyo, kinsay buot nimong makauban ug ngano man?

Medyo Maldito:  Akong crush. Kay kung ma-stranded ko nga siya akong kauban, di nako kinahanglan mangayo pa’g tabang.

BNH:  Kun mananap ka, unsa ka man ug ngano man?

Medyo Maldito: Agila akong pilion. Makalupad, paspas, naay excellent vision, ug labaw sa tanan, gawasnon.

BNH: Kun makadaog ka og P1 million, unsay imong buhaton sa kwarta?

Medyo Maldito:  Mupalit ko’g kombi nga bus aron gamiton pang road trip kuyog ang barkada ug pamilya. Tungaon nako ang mahabilin. Akong iinvest ang katunga, ug ihatag nakong mama ang sobra.

BNH:  Kun aduna ka nalay usa ka adlaw nga magpakabuhi niining kalibutan, asa ka muadto ug ngano man?

Medyo Maldito: Muadto ko’g Disney Land. Kuyogon nako akong pamilya ug sakyan namo tanang rides. Aron anang adlawa, naa ko’s happiest place on earth kuyog sila.

BNH:  Kun mahinabi nimo si PNoy unsay buot nimo nga tukion ninyong duha?

Medyo Maldito: Ako siyang pangutan-on: “Kung makabalik ka’s panahon nga wa pa ka nagsugod sa imong termino pagkapresidente, unya hatagan nimo og advice imong kaugalingon, unsa imong iingon?

Name: Rowell ‘Roy’ Ucat

Birthday: April 8, 1990

Birthplace Cagayan de Oro City

College/ Work: Bukidnon State University / Restaurant Manager

Favorite Show: One Piece

Favorite Song: Hey Jude - The Beatles

Favorite Movie: Lord of the Rings

Celebrity Crush: Emma Watson

Motto in life: ‘It does not matter how slowly you go as long as you do not stop.’ – Confucius