Julie Ann San Jose bagong host ng Day Off!

MANILA, Philippines - Isang pop superstar ang linggu-linggo nang ma­kakasamang sumubok ng iba’t ibang klase ng trabaho sa long-running reality program ng GMA News TV na Day Off!

Sasabak na agad sa aksyon ang Asia’s Pop Sweet­heart na si Julie Ann San Jose ngayong Sabado, March 7, at papalitan muna nila ng kuwelang si Maey Bautista ang apat na kauna-unahang female rescue divers ng Philippine Coast Guard o PCG mula sa kanilang routine.

Habang bitbit ng Kapuso rising star at guest co-host na si Gabbi Garcia ang Day Off winners sa mall, salon, spa, at iba pa, nag-e-ensayo naman sina Julie Ann at Maey sa barko kasama ang special operations group ng PCG.

Hindi biro ang training dito, ha! Tuturuan sila ng water survival and rescue techniques.  Kasama na rito ang rubber boat capsizing kung saan kailangang baliktarin ng grupo nina Julie Ann at Maey ang sinasakyan nilang rubber boat habang nasa tubig. Isa pang nakalululang activity ang water entry. Dito naman, kailangan matutunan ng future coastguards kung paano tumalon papunta sa tubig mula sa mataas na parte ng barko. 

Bukod dito, kakailanganin din ng dalawang hosts na maglinis at magsilbi sa mga opisyal ng barko.

Nakakakaba at exciting ang adventure na ito! Kayanin kaya ito ni Julie Ann? Abangan sa Day Off ngayong Sabado, March 7, 6:10 PM sa GMA News TV!