CEBU, Philippines – Sa Palawan nagsaulog sa Valentine’s Day ang magtiayon nga sila si Dingdong Dantes ug Marian Rivera. Taud-taud na nga giplano sa magtiayon nga mobalik gyud sila sa maong dapit. Kahinumduman nga sa Palawan gihimo ang pipila ka eksena sa pantserye nila niadto sa GMA-7 nga Dyesebel.
Nakadawat na
Gipadayag ni christian Bautista nga naka-focus na lang siya karon sa iyang singing career gumikan kay wala pa gyu’y babaye nga nakapapitik sa iyang kasing-kasing. Na-enjoy ra ang singer sa iyang mga higala busa dili big deal kaniya nga wala siya’y girlfriend.
Napungot gihapon
Magsige og panawag kang AiAi delas Alas ang concert producer nga si Jacob Fernandez apan dili kini tubagon sa komedyanteng aktres. Suma pa ni AiAi nga wala na sila’y angayan nga istoryaan.Nasayran nga wala nawala ang kasuko ni AiAi kang Jacob gumikan kay mao kini ang rason nga wala madayon ang iyang Valentine’s concert human wala mabayri niini ang venue sa concert ug sa mga production crew.
Baby Nate nasakit
Wala kalantaw si Ogie Alcasid sa concert ni Regine Velasquez niadtong Biyernes sa gabii kay nalandig sa tambalanan ang ilang anak nga si Nate human naglain ang lawas niini. Si Ogie maoy nibantay sa ilang anak.
Seryosong relasyon
Tsika pa ni Ahron Villena nga kung makabaton na gani siya og girlfriend ,gusto niya og seryoso aron dili masayang ang iyang oras. Suma pa sa aktor nga magkataas ang edad sa tawo busa dili angayan usikan ang panahon.
Aiza wala kauyon
Wala mahimuot si Aiza Seguerra sa nahitabong bandalismo sa usa ka billboard nga nahimutang sa EDSA. Ang maong billboard kabahin sa Bench ad alang sa Love All Kinds of Love campaign nga nagsuporta sa lesbian, gay, bixesual, and transgender (LGBT) community. Sa maong billboard, nagkinuptanay sa ilang mga kamot ang duha ka mga lalaki. Gipintalan og itom ang parte sa ilang mga kamot nga nagkinuptanay.
Palahi nga date
Sa Mamasapano, Maguindanao nag-date ang magtiayong Robin Padilla ug Mariel Rodriguez niadtong Valentine’s Day. Giduaw sa duha ang mga igsuon nila nga muslim sa maong dapit. Kahinumduman nga sa maong lugar nahitabo ang engkuwentro kung diin nakabsan sa ilang kinabuhi ang 44 ka mga sakop sa SAF (Special Action Force)
Panghinaut sa Jadine
Nanghinaut sila si James Reid ug Nadine Lustre nga dili mapul-an ang mga tawo sa ilang tandem. Nasayran nga nagsagunson ang ilang mga proyekto. Naghinam-hinam na ang duha sa ilang upcoming series sa ABS-CBN nga On The Wings of Love.
Naanad na
Gipadayag ni Sandara Park nga dili na angayan kahibudngan kung magsige siya og balik dinhi sa Pilipinas. Suma pa sa maong Korean star nga espesyal kaayo niya ang Pilipinas gumikan kay dinhi nagsugod ang iyang showbiz career. Nitikang si Sandara sa nasud niadtong Biyernes.
“Chikita lumalaban! Tungod may kinabuhi”
Kun aduna kay Facebook account, hayan nakakita na ka sa iyang makalingaw nga videos. Kun hilig ka mubasa og balita online, hayan nakakita na ka sa balita kabahin niya sa nagkadaiyang websites. Kun laagan ka magabii, hayan nakit-an na nimo siya sa kadalanan sa dakbayan sa Sugbo.
Disyembre pa sa nilabay nga tuig, gisugdan sa Banat News Hugyaw ang paghinabi kaniya, apan niadtong Huwebes lamang gyud siya nasakpan sa Banat News Hugyaw (BNH) pinaagi sa mga pangutana nga gipadangat pinaagi sa iyang suod nga higala ug maoy tig-upload sa mga video, ang sikat nga make-up artist sa Sugbo nga si Wenwen Zaspa. Kini kay matud pa ni Zaspa, lisud masakpan si Chikita kay magabii ra kini mugawas. Wala sab o dili sab siya ganahan mugamit og cellphone. Pagkakaron, hilabihan na kadaghan ang nalingaw kaniya pinaagi sa iyang Youtube videos. Ang kasagaran atua sa gawas sa nasud, nga gumikan sa ilang kalipay, mupadala gyud og pahalipay para kaniya.
Ug aron usab kamo malipay dear HUGYAWnatics, atong saw-an kining exclusive interview:
Banat News Hugyaw: Unsa ang imong educational background?
Chikita: Ah okay, ni-graduate ra ko og high school, mao na siya. Dili ko mo-proceed sa college.
BNH: Diin ka nagdako?
Chikita: Sa amoa, alangan man sad sa inyoha, haha. Sa amoa, sa terminal (South) before, unya karon kay naa ko sa V. Rama.
BNH: Unsa imong previous work? Unsa imong work karon?
Chikita: Okay, previous kay naa ko’y business, dili sad monkey business, basta business lang unya karon, kay wala ko’y work kay pensionada, usahay mag-barangay tanod sad ko sa amoa, magtuyok-tuyok ko sa amo, may na lang makatabang ko sa akong mga silingan, kung naay mag-away , ana ba. Trabaho ra man gihapon na, di ba nu?
BNH: Kanus-a ka gasugod sa imong pagka-komedyante?
Chikita: Aguy , maghisgot ta og sugod dong, na pa ko sa tiyan sa akong mama, moingon akong mama, “okay ra ka?”, motubag sad ko og “yes mother”. Na pa ko sa tiyan sa akong mama, nagsugod nako, mismo pagawas nako sa tiyan sa akong mama, niingon na ko og “hello mother”. Nagsugod ko pagka-komedyante, since birth.
BNH: Unsa ang kaagi nga dili nimo malimtan?
Chikita: Kanang dili nako makalimtan, aguy, ahmmm, katung paglabang nako, hapit ko naigo sa sakyanan , may gani ang sakyanan na lang ang nilikay, mao tu ang dili nako makalimtan, seryoso. Nahitabo diha ra pud sa V Rama, nakaingon ko nga dili nako magpataka og labang, dili ko angayan magdanghag busa kamo ayaw jud mo pataka og labang.
BNH: Nag-agi na ba ka og retoke?
Chikita: Wala ko nagparetoke, ka-klaro ana, hahaha. Wa ko nagparetoke so far. Hugot nga pag-ampo ra gyud nang akoa. Giingnang by nature ni.
BNH: Unsa para nimo ang labing sexy nga part sa imong lawas ug ngano man?
Chikita: Seryoso, sexy kanang, akong bat-ang ra gyud siya.
BNH: Pila nay imong edad?
Chikita: Aguy , mao nani run , mahibaw-an jud diay ni run sa katawhan. Hala uy, basta uy, kanang pangutanaha nu, daghan na kay ko naka-encounter ana, daghan na kay ko nakakita og away ana, kay naay mangutana, pila imong edad Chikita? Ahh gusto ka’g kuan? Aw! Kuhaa akong birth certificate didto sa amoa. Ako gyud nang gitagoan aron dili mahibaw-an.
BNH: Nganong Chikita man ang imong screen name?
Chikita: Pangutanha akong mama, seryoso bitaw, haha, dili mana Chikita ,haha Chikito mana uy .Akong mama kay ganahan gyud og Chikito, iya nang idol. Sugod siya sa iyang papa sa una, o akong lolo, ma-stranded siya kay sige siya tan-aw anang Chikito. Alangan mag-Chikito ko, hahaha.
BNH:Unsay imong mga naapilan nga miss gay pageants? Nakadaog ka ba?
Chikita: Wala ko nakaapil og Ms. Gay, kungdi Miss-miss, Miss Mandaue , Miss Toledo, (but-anay diay?), Miss Barili . Bitaw, seryoso Miss Gay, kadaghan na , dili na mayhap. Daghan nako nadag-an , nakadaug sad ko og manok. Runner-up ra ko permi.
BNH: What is love?
Chikita: Love for me is like a bubble gum,kung mopilit makabuang. Mao na siya, naka-experience nako og love uy, feeling nako murag naa ko sa langit bisan naa ko sa ubos. Labi naay time gitagaan ko og buwak sa akong boyfriend , nakaingon kog “wow” mura ko’g babaye.
BNH: Kun ma-stranded ka sa usa ka isla, kinsa nga artista imong gusto makauban?
Chikita: Wala lage gibutang unsang islaha, wala giingon kung unsang islaha.
BNH: Sige na lang, sa Kawit Island na lang,. Kung ma-stranded ka diha, kinsang artistaha ang gusto nimo makauban?
Chikita: Aw artista, si Diether Ocampo , sarehap ims (pareha mi), haha.
BNH: Sikat naka online, unsa ang mensahe nimo sa imong fans?
Chikita: Sikat ko sa online, sa outline diay? Online lang, dili outline, wala lang, normal lang, mura ra’g wala. Kuan lang, enjoy life, at the end of the day, live life to the fullest. Usa ra gud ako ikahatag nga mensahe sa fans: sa mga ni-view nu online, i-enjoy lang gud ning tanan, kung nalingaw mo, padayon, mas nalipay ko kay nalipay mo. Kung wa mo malipay, wa sad ko nalipay, at this point, kay nalipay man mo, grabe sad akong lipay ninyo. Mosamot na ang daghang grasya nga maabot nu, kabaw na baya ka sa mga tawo karon, share the blessings baya.
BNH: Unsa ang imong mensahe sa mga pamilya sa namatay nga SAF members?
Chikita: Ah okay, English sa ko first, ahmm life is very precious, very special to the people, so we need to preserve what is beautiful life. So kana bang kaguol, ug kanang grabe nga kaguol sa matag pamilya, usa ra ako ikasulti sa matag pamilya nga nabinlan karon, lumalaban lang mommy, iampo lang nato, Prayer is the strongest weapon can move mountain. If we ask God, nothing is impossible, sige lang kay naa raman na’y bawos ang tanan. Kung unsa ang imong gibuhat nga bati, ang baws ana kay mas labaw pang bati.
BNH: Unsa ang imong ikasulti or mensahi alang niining musunod:
BNH: Piolo Pascual?
Chikita: Babaehan ang peg, haha akong ikasulti, guwapo, lami siya og mata, lami siya og ilong ,perfect, pero at the end of the day, mao natu.
BNH: Marian Rivera? Kinsa gwapa ninyong duha?
Chikita: Ah, fabulous, ah ako jud ang guwapa uy, ngano gud intawn, ako uy, kitang tanan gipakatawo, mga guwapa ug guwapo, period depense sa tupad.
BNH: Liza Soberano?
Chikita: Wa ko kaila ana, kinsa na si Liza day? Wa ko kaila ana,
BNH: Enrique Gil?
Chikita: Ay, guwapo, cute.
BNH: Mayor Michel Rama?
Chikita: Lumalaban, bakit hindi, lumalaban. Kuan siya, ang Cebu (City) karon kay very booming city, mas booming ang Cebu ron, lumalaban ang Cebu.
BNH: Governor Hillario Davide?
Chikita: Usa ra akong ikasulti, thank you.
BNH: Presidente Noy Aquino?
Chikita: Okay, Ginoo ko, hala uy, bitaw, sa kadaghang problema, sa bisan kinsa ang nilingkod ,wala man gyud nakasulbad sa problema. Wala man gani nakasulbad sa among problema, nga anti –discrimination. Kung duna man gani president nga makasulbad niana, moluhod ko. Makaingon ta ba og respect a human equality as a person .
BNH: Mga bayot nga wala pa moladlad?
Chikita: Ibuwad sa na sila, kung wa sila moladlad , please lang hinay-hinay namo og ladlad kay basin at the end of the day, magmahay ra mo, sige lang. Pag-chlorine namo, bitaw ladlad na mo para managhan ta.
BNH: Mga tawo nga maglagot og bayot?
Chikita: Ay labad na sila, manglabay na sila og bato, kasagaran nga ing-ana mga labad na sila. Kanang ing-ana ba, grabe, lainan ko ana nila, basin duna sila’y problema sa ilang pamilya, idamay jud diay ang mga bayot diay? Kahilas nila ah!
BNH: Mga lalaki nga gipangwartahan lang ang mga bayot?
Chikita: Dato ang mga bayot, haha.
Ang video niining maong interview mamahimo ninyong matan-aw tulo ka adlaw gikan karon. Pangitaa sa Youtube ang Chikita Churva.
Photo and makeup by: Wenwen Zaspa
Hair and styling by: Abbai Pila
Mr. International 2014 Pambato sa Pilipinas milangkat sa korona
Ang pambato sa Pilipinas nga si Neil Perez maoy napili nga Mister International 2014 nga gipahigayon sa Seoul, South Korea niadtong Sabado.
Nasayran nga sa miaging tuig pa unta ang maong indigay ug kadaghan na kini nga na-postpone.
Ang garbo sa Lebanon nga si Rabdi El Zein maoy first runner-up, samtang ang manok sa Czech Republic nga si Tomas Dumbrovsky maoy napili nga second runner-up.
Napili usab nga third runner-up ang representante sa Poland nga si Rafal Maslak, samtang natuboy nga fourth runner-up ang kandidato sa Slovenia nga si Mitja Nadizar.
Atol sa question and answer portion, nigamit si Perez og interpreter kung diin gipangutana siya kung unsa ang iyang “biggest disappointment “ sa iyang kinabuhi.
“Unang-una ang aking disappointment sa aking buhay ay ang ‘di ko pag galang sa magulang ko. Kaya ko pinagsisihan ito dahil malaking bagay ang mahalin natin ang ating magulang dahil siya ang pangalawang utos ng Diyos para sa ating mga Katoliko,” tubag ni Neil sa maong pangutana.
Gipahinungod niya ang iyang kadaugan sa 44 ka mga sakop sa Special Action Force nga nangamatay didto sa Maguindanao.
Nailhan si Neil sa kadaghanan gumikan kay usa kini ka police ug nailhan siya isip Police Officer 2 Mariano Perez Flormata, Jr. , usa ka explosives technician sa PNP Aviations Security Group.