Espesyal nga lugar

CEBU, Philippines – Gipadayag ni Heart Evangelista nga mohatag gyud siya og taas nga panahon sa pagbakasyon sa Sorsogon gumikan kay mao kini ang yutang natawhan sa iyang hinigugma nga si Sen. Chiz Escudero. Nagpanikad na ang aktres sa kasal nila ni Sen. Chiz karong February 15 didto sa Balesin island.

Imbitasyon gibalibaran ni Dayanara

Gibalibaran ni Dayanara Torres ang imbitasyon alang sa selebrasyon sa  20th anniversary sa ASAP karong February 22 sa Mall of Asia Arena. Dili kalugar si Dayanara gumikan sa ka-busy sa  iyang trabaho didto sa Los Angeles, California. Usa si Dayanara sa mga orihinal nga host sa ASAP.

Sharon seryoso sa pagpaniwang

Naninuod na gyud si Sharon Cuneta sa iyang pagpaniwang. Nasaksihan sa kadaghanan ang pagamay sa lawas sa mega star sa dihang nitambong kini sa baby shower sa iyang ig-agaw nga si Ciara Sotto.

Ryza gilangaw

Andam na unta si Ryza Cenon nga mosulod og usa ka relasyon apan wala pa gyu’y lalaki nga nakapapitik sa iyang kasing-kasing. Wala pu’y lalaki nga misuway og diskarte niya karong panahona.

Miubos ang sugar

Miubos ang  blood sugar ni Gary Valenciano atol sa presscon sa  iyang Ultimate Valentine concert niadtong Lunes. Nikaon og chocolate si Gary aron maarang-arang ang iyang pamati.

Alma mitambong sa hearing

Mitambong si Alma Moreno sa Senate hearing  sa miaging adlaw kalabot sa  engkuwentro sa Mamasapano. Si  Alma maoy  national chairperson sa  Councilors League of the Philippines, ug nagmalaumon siya nga manubag gyud ang mga tawo nga responsable sa maong hitabo.

Sugal sa career

Wala mabalaka si Kyla sa iyang pagbalhin sa ABS-CBN ug masaligon siya nga mahatagan og maayong proyekto sa maong network. Gipaabot ang paglugwa puhon ni Kyla sa ASAP ug nagmalaumon siya nga mahatagan siya og saktong exposure bisan pa man nga nagbaha ang mga artista sa maong show.

Regine nakasabot ra

Giklaro ni  Regine Velasquez nga wala siya nahiubos kang  Kris Aquino bisan pa man nga gi-unfollow siya niini sa social media. Suma pa sa singer nga nahuman na ang maong isyu ug gi-follow na siya og balik sa TV host busa dili kini angayan padak-on. Kahinumduman nga nagsugod kining tanan sa dihang nikomento siya kalabot sa paghupot ni Presidente Noynoy Aquino sa kagubot sa Mamasapano, Maguindanao. Lakip sa gi-unfollow ni Kris niadto mao ang bana ni Regine nga si Ogie Alcasid.

Ebidensya ni KZ

Tsika pa ni KZ Tandingan nga duna siya’y  boyfriend ug bug-at na kini nga basehan nga dili siya tomboy. Suma pa sa singer nga wala siya nagpaapekto sa maong tsismis.

LT misaludo kang Daniel

Gipadayag ni Lorna Tolentino nga saksi gyud siya sa kabuotan ni Daniel Padilla.  Duna’y mga higayon nga nanghatag og school supplies si Daniel sa mga bata nga nagpuyo sa lokasyon sa pelikula nila nga Crazy Beautiful You. Napanglantawan ni LT nga layo gyud og maabtan ang career ni Daniel.

Government official ang uyab ni Valerie?

Miulbo ang tsika nga matud pa nga usa ka abogado ang bag-ong boyfriend ni Valerie Concepcion.

Suma pa sa report nga nagtudlo usab kini sa Ateneo ug  head kini sa usa ka ahensya sa gobyerno.

Dugang pa nga annulled  na sa kanhi asawa ang maong abogado busa wala’y babag kung tinuod man ang taho nga uyab kini ni Valerie.

Carlan napungot sa nakanselar nga shoot

Napungot pag-ayo si Carla Abellana sa dihang kalit lang nga nausab ang schedule sa shoot sa usa niya ka endorsement.

Suma pa ni Carla nga giingnan siya nga mas sayo og duha ka oras kay sa orihinal nga call time ang iyang shoot busa nagdali-dali siya ug gibalibaran niya ang uban niyang commitment niadtong Biyernes. Pag-abot niya sa location, giingnan siya nga balik na sila sa orihinal nga call time. Dihang padulong na siya mulakaw aron paabuton ang duha ka oras, giingnan siya nga cancel na ang shoot.

“Ika-cancel mo lahat ng appointment mo na sana gagawin mo bago ka magtrabaho. Endorsement to eh, mas importante at ayaw na ayaw mo silang biguin. Magmamadali kang umalis ng bahay dahil bukod sa ayaw mong ma-late, alam mong Biyernes ngayon kaya doble ang traffic. Nasa North ka nakatira at nasa dulo ng South ang trabaho mo... Masaya ka dahil nakaabot ka at alam mong mapapasaya mo ang kliyente. Biglang sasabihin sayo na balik na sa orihinal na calltime ang trabaho mo. So ngayon mas maaga ka na sa location ng dalawang oras,”  tipik sa Instagram post ni Carla.

Wala hinuon gidetalye ni Carla kung kinsa ang iyang kliyente ug nisaysay kini nga nahago siya og maayo.

“Hindi naman yata tama ito,” dugang pa sa aktres.

Fr Lyndon ruiz nagmugna sa  “nalumos sa sabaw”

Kung duna gani maayong plano, kinahanglan nga muhimo og aksyon aron maangkon ang katumanan niini.

Mao kini ang panultion nga gibarugan sa Sugbuanong composer nga si Fr. Lyndon Ruz kinsa kura paruko sa parokya sa Cawit ,Medellin.

“Duna ka’y nindot nga mga plano, kinahanglan ka molihok, para ma-realize ang imong mga pangandoy,” suma pa ni Fr. Lyndon.

Gawas sa iyang trabaho isip magsasangyaw sa mga  pulong sa Ginoo, usa pud sa iyang gikalingawan ang pagama og mga kanta nga makahulma og inspirasyon ngadto sa mga tawo.

Matud pa niya nga moabot na ngadto sa kapin sa 20 ka mga kanta ang iyang nabuhat ug aduna gyud kini mga bulawanong mensahe.

Si Fr. Lyndon maoy nagama sa awit nga “Nalumos sa Sabaw” nga maoy grand prize winner  sa Cebu Pop Music Festival 2015 RnB category.

Dako ang iyang pasalamat sa Ginoo gumikan kay gawas  sa iyang pagka-pari, aduna pud siya’y abilidad sa pagtabang sa mga tawo nga makakuha og mga maayong pagtulun-an gikan sa iyang mga ginama nga kanta.

“Pag-una pa lang , akong mga kaila niingon nga nindot gyud kuno ang Nalumos sa Sabaw.  Akong gibuhat, nag-ampo lang gyud ko ug salamat kaayo sa Diyos kay nakadaug gyud,” matud pa ni Fr. Lyndon.

Sa wala pa madestino si Fr. Lyndon sa Medellin,  nagserbisyo siya niadto sa  Sacred Heart of Jesus Parish didto sa  Tangkung, Bantayan kung diin didto niya nahulma ang awit nga Nalumos sa Sabaw.

BNH: Ikapila na nimo nga higayon nga nisalmot ka og Cebu Pop?

Fr. Lyndon:   First time gyud nga naapil sa Cebu Pop ang gihimo nako nga kanta maong nasorpresa ko kay nakadaug dayon.

BNH:  Human sa Cebu Pop,   unsa ang sunod nimo nga target?

Fr. Lyndon: Maghimo gihapon ko og mga kanta. Padayon ko nga moapil og lain pa nga mga contest. Nakaapil man ko sa una sa Hunino ug Marian Song Festival, moapil nasad ko og balik ana.

BNH:  Mga challenges nga imong naagian sa pagsalmot nimo sa Cebu Pop?

Fr. Lyndon: Isip usa ka pari,  prayoridad gyud na nako ang simbahan nga akong gialagaran busa dunay mga higayon sa una nga dili ko katambong sa mga praktis ug meeting kay layo man kaayo ang Medellin.  Dili man puwede nga  basta lang biyaan nimo  ang mga tawo sa simbahan nga akong gialagaran.   Nalipay na lang pud ko kay nakasabot ra  ang mga organizer sa akong sitwasyon.

BNH:  Nganong Nalumos sa Sabaw man ang nahuna-hunaan nimo?

Fr. Lyndon:  Tungod kay ako man gud nabantayan karong panahona nga naghitak ang mga managhigugmaay nga nag-live in na bisan wala pa gikasal ug uban intawon nga babaye nga namabdos  kay gibiyaan dayon sa lalaki.  Ang mensahe sa  Nalumos sa Sabaw  kay  nag-awhag sa mga tawo nga hatagan gyud og importansya ang kasagrado sa kaminyuon. Luoy intawon kaayo ang babaye nga biyaan lang dayon sa lalaki, unya kong mangita ang  anak sa ilang papa,  motubag na lang intawon og ‘nalumos sa sabaw’ .

BNH: Nagbaha ang mga kanta ron nga wala’y tarong nga unod , unsa ang imong ikasulti ana?

Fr. Lyndon: Nakabantay bitaw ko ana, nakadungog gani ko og kanta nga mura na og namalikas ug ang uban kay bastos pud kaayo og content.  Manghinaut lang nga dili na unta mu-uso ang mga ing-ana nga klase sa kanta. Siguro sa mga radio station, kung tan-aw nila nga bastos kaayo ang kanta, dili na lang unta ipatukar.

BNH:  Unsa imong sekreto sa ka maayo nimo mo-compose og kanta?

Fr. Lyndon:  Akong sekreto kay hatagan gyud nako og saktong panahon akong kaugalingon nga makahuna-huna og tarong sa mahimong tema sa kanta nga akong buhaton. Huna-hunaon gyud nako og maayo ang mga panghitabo sa palibot aron makakuha dayon ko og ideya  .

BNH: Unsa pa nga tema sa kanta ang gusto pa nimo buhaton puhon?

Fr. Lyndon: Gusto nako buhaton ang kanta kung diin mag-awhag sa katawhan nga kinahanglan ipatigbabaw gyud ang paghinatagay sa usa’g-usa.  Ako na gani gisugdan og himo, ang title niya kay “Amigo Kong Tihik”. Sa maong kanta, ako gyud giawhag ang mga tawo nga mohatag gyud sa mga tawo nga nanginahanglan sa ilang tabang.

BNH: Pila ang imong edad nga nakat-on ka sa pagama og kanta?

Fr. Lyndon: Nakalimot nako, basta  duna’y time nga na-assign ko sa Tangkong, Bantayan, ang paghimo jud og kanta ang akong gikalingawan basta dili ko busy.

BNH: Gawas sa Nalumos sa Sabaw,  naa pa ba ka’y laing composition nga makapaliki sa listeners?

Fr. Lyndon:  Naa , ang title sa song ka’y Paskong Wala’y Kuwarta.  Ang mensahe sa maong kanta kay dili kuwarta maoy basehan sa pagsaulog sa Pasko.  Ang tinud-anay nga diwa sa Pasko mao ang panaghiusa ug panagpinasayloay. Busa ayaw mo kaguol uy kung wala mo’y igong kuwarta sa Pasko, ang importante nga mag-uban mo sa imong pamilya ug sa uban ninyo nga minahal sa kinabuhi atol sa Pasko.

BNH:  Kanus-a ka makaingon nga hugyaw ang usa ka  kanta?

Fr. Lyndon:  Matawag nga hugyaw ang usa ka kanta basta makaigo kini sa feelings sa mga tawo. Kinahanglan nga duna’y maka-relate nga mga tawo ug duna pud sila’y maayong mensahe  nga makuha niini.