“Mass Wedding”

CEBU, Philippines - Valentine’s Day na gyud karong Sabado. Kumusta na man ang mga walay uyab intawon sama nako? Magnganga ta ani? Hahahaha! Nganga lang sayon ug dali ramana buhaton. Pakkk! Bitaw dili man big deal gyud kun wala kitay lovelife kay kanang adlawa alang man sa gugma, busa dili lamang para sa mga naghigugmaay kay daghan mang matang ang gugma. Pakpak!

Apan kun aduna kay hinigugma ug tukma na ang inyong pangidaron ug panahon nga magsugod og pamilya, magminyo na. Mao man sab gyud nay rason nganong mangita ka og hinigugma aron aduna kay makauban niining kalibutan hangtud sa kahangturan. It is about finding your forever, of love eternal. So padung gyud na sa kasal!

Sa kalisud sa panahon karon ang mga naghigugmaay kun mag-kasinabot mag-live in lamang usa. Ang uban magpakasal sa huwes. Sa mata sa publiko, okay ra nang civil wedding. Kanang live in lalisunon pa na depende sa imong prinsipyo sa kinabuhi. Apan sa mata sa simbahan, dili sab gyud na madawat. Apan unsaon ta man lagi nga lisud man ang panahon karon, nagyawat man kita sa kwarta nga sarang ikagasto kay naglabi man atong kaikog sa atong mamahimong bisita?

Hinungdan nga nakadayeg ko sa mass wedding project ni The Freeman/Banat News Chairman Jose “Sir Dodong” Gullas nga gipahigayon niadtong January 29. Kwarenta y uno ka paresan ang nakabenepisyo sa libreng kasal nga gipasiugdahan ni Sir Dodong, isip tipik usab sa pagsaulog niya sa ika-81 nga kasumaran sa iyang adlaw’ng natawhan. Ikatulo na katuig nga nagpasiugda si Sir Dodong og mass wedding busa ubay—ubay na gyud ang nakabenepisyo niini, which very welcome development. Ang mass wedding tipik sa “Halad Pasalamat” nga naglakip sab sa free dental, medical, legal services ug daghan pang libreng serbisyo. Pakpak!

Actually happy kaayo ko pagkakita nako sa mga nakasal karong tuiga pinaagi sa sponsorship ni Sir Dodong, gumikan kay ang ilang gugma ug panag-uban nabendisyonan na gyud sa Ginoo. Ug gumikan niana pusot-pusot na gyud ang mga grasya nga ilang madawat gikan sa Labaw’ng Makagagahum. For me man gud, lahi ra kaayo ang kaminyuon nga adunay bendisyon sa simbahan. Sama bitaw anang bata nga dili pa mabunyagan, magsigi og kasakit ug lahi ra gyud og aura. Busa mas maayo gyud nang kaminyuon nga adunay bendisyon sa Ginoo pinaagi sa sakramento sa kasal nga gipadangat pinaagi sa simbahan.

Salamat Sir Dodong kay pinaagi nimo, mas magmalipayon na ang panaghigugmaay sa mga bag-ong kasal gumikan kay nabendisyonan na man sila sa Ginoo. Belated happy birthday to you ug hinaot nga you will have good health and more years to live aron mas daghan pa nga managhigugmaay ang makapahimulos sa imong kaayo pinaagi sa imong mass wedding project matag tuig. Happy Valentine’s Day gyud ni para sa mga bag-ong kasal. Ug happy Valentine’s Day sab ninyo ni Maam Nena sir! Pakpak!