Wala palabya ni Kris

CEBU, Philippines - Wala palabya ni Kris Aquino ang usa ka commenter niya sa Instagram nga naghingalan niya og “insensitive” gumikan kay nagpost pa siya og kabahin ni Michael Buble inay muduyog sa kasub-anan sa nasud gumikan sa kamatayon sa 44 ka SAF members didto sa Mindanao. Suma pa ni Kris, niadto siya sa pamilya sa namatyan ug ni-istar siya didto hangtud alas dos sa kadlawon. Wala matud pa niya kini i-post gumikan kay sayud siya nga nganlan sab siya og “epal” kun iya pa kining gibuhat.

Depensa ni Juday

Hasta si Judy Ann Santos wala sab palabya ang komento sa usa niya ka follower, dihang nag-post siya og hulagway ni Presidente Barrack Obama kinsa nisugat sa patay’ng lawas sa mga sundalo nga nakalas sa gubat. Ang caption ni Juday niini nagkanayon: Just saying, Obama knows his priorities. Apan ang commenter niingon nga angayang dili mukomento si Juday sanglit usa siya ka public figure ug maghatag lamang kini og kagubot. Mas maayo matud pa nga itago na lang ni Juday ang iyang komentaryo. Apan matud ni Juday bisan og public figure siya, aduna siya’y katungod mupahungaw sa iyang hunahuna sanglit tawo usab siya. Gawas pa, nagbayad matud pa siya og buwis hinungdan nga aduna na siya’y katungod nga mupalanog sa iyang gibati kabahin sa sitwasyon.

Movie ni Claudine

Nag-upload og hulagway si Claudine Barreto kauban sa usa ka director ug  namahayag siya nga excited na matud pa siya sa shooting sa umaabot niya nga movie. Dihang gipangayuan og detalye, nitubag si Claudine nga confidential pa, apan February ang shooting.

Pasagdan na lang na

Gibalewala ni James Yap ang nangaway sa iyang anak nga si Bimby pinaagi sa social media. Suma pa sa banggiitang basketbolista, dili na lang angayang tagdon ang mga tawo nga gagmay og utok, sanglit dili nimo kontrolado ang unsay gihunahuna sa matag usa.

Hapsay nga love scene

Gidayeg ni Gerald Anderson si Julia Montes gumikan sa ka propesyonal niini nga katrabaho hinungdan nga hapsay matud pa nila nga nahimo ang ilang love scene sa pelikula nga “ Halik sa Hangin” nga showing sa mga sinehan lukop nasud karong panahona. Kauban nila niining maong pelikula si JC de Vera.

Sensitive boyfriend

Mapasalamaton si Janine Gutierrez sa iyang uyab nga si Elmo Magalona gumikan kay “sensitive” matud pa kini nga matang sa hinigugma. Suma pa ni Janine dili na niya kinahanglan nga musulti pa, gumikan kay makabatyag dayon si Elmo unsay iyang gibati ug gihunahuna.

Wynwyn maningkamot para sa korona

Panganti ni Wynwyn Marquez nga makadughit og usa sa lima ka mga korona nga ilang awayan sa umaabot nga Bb. Pilipinas 2015 pageant karong Marso. Suma pa niya nga dili siya magdahum og maayo, apan nag-ampo siya nga usa gayud sa makuronahan ug mamahimong pambato sa nasud sa international pageants karong tuiga.

Eula nag-menopause na

Sa edad nga 46, nag-menopause na matud pa ang banggiitang aktres nga si Eula Valdez. May mga anxiety attacks matud pa siya ug usahay saputon siya nga dili siya makasabot sa iyang kaugalingon. May espesyalistang doktor na hinuon matud pa siya nga gikonsulta ug gihatagan siya og vitamins ug uban pa. Musulod na si Eula sa afternoon prime sa GMA7 nga “The Half-Sisters” diin gipaabot na ang acting showdown nila ni Jean Garcia.