Lahi ang role

CEBU, Philippines - Gipaneguro ni Richard Yap nga lahi ang dagan sa iyang role sa umaabot niya nga serye sa ABS-CBN. Nasayran nga sugdan na ang taping niini sunod buwan. Nailhan pag-ayo si Richard gumikan sa serye niadto sa ABS-CBN nga  Be Careful With My Heart.

35th  Cebu Pop live sa CCTN

Gipahibalo sa station manager sa CCTN-47 nga si Malou Tabar nga live gihapon ang pagpasalida nila sa umaabot nga 35th Cebu Popular Music Festival ugma sa gabii diha sa Cebu Coliseum.

Suma pa ni Tabar nga tumong sa network mao ang pagtabang sa pag-promote sa mga binisaya nga kanta ilabi na nga makita nationwide ang CCTN.

Dugang pa niya nga nihatag usab og lapad nga suporta ang CCTN sa mga kalihukan sa kapistahan sa balaang bata nga si Senor Santo Niño

Matud pa niya nga usa ka Sugbuanong istasyon ang CCTN hinungdan nga ibubo niini ang suporta alang sa Cebu Pop.

Magpabiling hugyaw ang 35th Cebu Popular Music Festival gumikan kay langkuban gihapon kini og tulo ka kategoriya busa tulo ang mugawas nga mananaog.

Ang nahisutang kategoriya mao ang “ballad”, “rock” ug “RNB, “ busa nagkalain-laing klase sa kanta ang madunggan sa mga tawo sa  umaabot  nga January 16, 2015.

Magtigi ugma sa gabii  ang   Ikaw ang Tanan, Ako  Ba Kini, Sayang Ang Luha ug  Nalumus sa Sabaw (RNB), Salamat Na Lang , Maayo Pa Nga Hikalimtan, Ikaw ang Natingban ug Magpabilin (Ballad) , Bisaya Baya Ni Bay  ,Super Juan, Sugta ug Padayon Sugbuanon  (Rock).

Ang  tinuig nga Cebu Pop gipasiugdahan ni kanhi kongresista Eduardo Gullas, isip halad niya ngadto sa Balaang Bata ug agig pag-abag usab sa pagpalambo sa Sugbuanong  Musika.

Ang 35th Cebu Pop nga mahitabo ugma na puhon, magsugod sa alas siete sa gabii.

Duha unta ang matangtang “Save Option” gipatuman sa mga hurado!

Duha unta ka idols ang matangtang gikan sa kumpetisyon niadtong Lunes sa gabii, apan gigamit sa mga hurado sa Sinulog Idol Season 6 ang ilang gahum nga muluwas og usa ka contestant nga sa paminaw nila aduna pay ikabuga.

Atol sa ‘Broadway Night” niadtong Lunes, nahimutang sa bottom two ang Star of the Night niadtong Domingo nga si Michelle Lagunzad ug ang band vocalist gikan sa Carcar City nga si Analyn Manlise.

Nasayran nga niadtong Martes sa gabii, mahimo ra kaayo, ug gani gipaabot na nga duha ang tangtangon sa mga hurado sanglit siyam pa man ka idols ang nahibilin ug gikinahanglan man nga unom na lamang ang magtigi alang sa grandfinals karong gabii.

Apan dihang paingon na nga ipahibawo sa hurado nga si kanhi Pinoy Dream Academy scholar Apple Abarquez ang hukom nga duha ang matangtang, kalit nga nibabag ang hurado nga si Banat News Hugyaw editor Ryan Mark ug nangutana pila gyuy ilang taktakon niadtong gabhiona. Dihang wala dayon nitubag si Abarquez, gipalanog ni Ryan Mark ang iyang tinguha nga magluwas og usa ka idol nga nahimutang sa bottom two.

Dinhi nabutyag nga nasabutan na diay tali sa mga hurado ug sa production mismo nga gipanguluhan ni Gloria Villarojo nga karon nga season, mahimong mugamit ang judges og “save an idol option” makausa kun paminaw nila dili pa haom nga matagak ang usa ka idol gikan sa kumpetisyon.

 “With your permission (co-judges), I would like to use our save an idol power. I am saving this girl because I believe she is yet to unleash her full potential. So I am saving you Analyn Manlise. I’m sorry Michelle but I think you have proven enough already,” nagkanayon si Ryan Mark.

Dinhi nahuwasan si Manlise.

Samtang si Michelle aminado nga wala gayud niya natarong ang iyang performance sa awit nga “Reflection” hinungdan nga natagak siya.

“Dili gyud ko andam , dili kay ko kabalo sa song. Akong ganahan nga kantahon kay ang My Heart Will Go On pero naunhan na man ko ni Thon,” nagkanayon si Michelle.

 Sa dihang nakalimot siya sa ubang linya sa iyang kanta, giandam na ni Michelle ang iyang kaugalingon nga siya gyud ang mataktak niadtong gabhiona.

Nisamot dihang gikomen-taryohan siya ni Ryan Mark nga, “kay nurse man ka, I’m sorry to tell you that in my score sheet you are in critical condition.” 

Samtang si Analyn nibutyag nga dili kaayo siya familiar sa iyang giawit nga Big Spender nga gikan sa musical play nga Sweet Charity busa wala kaayo matarong ang iyang performance.

“Bag-o lang gyud tu gihatag ang song, dili kay ko familiar busa dili ko komportable sa akong gika

nta. Nag-expect na gyud ko daan sa possibility nga matangtang ko,” matud pa ni Analyn.

‘Star of the Night” na gyud!

Labing nauyonan sa mga hurado nga gilangkuban nila ni Ultimate Vocal and Performance coach  Jay Unchuan, Abarquez ug Ryan Mark mao ang performance sa 23 anyos nga si Charlie Sumalinog kinsa pambato sa Cordova Cebu.

Si Charlie maoy napili nga Star of the Night gumikan sa maayong pagkanta niya sa Impossible Dream nga gikan sa musical play nga The Man From La Mancha.

Nisamot ang pag-uyon sa mga hurado dihang wala gyud nihunong si Charlie sa iyang pag-awit sa “Impossible Dream” bisan og nagkaproblema ang iyang cd, hinungdan nga nawagtang ang duyog sa iyang kanta.

 “Mao gyud na akong nakat-onan nga kung mawala gyud ang music, the show must go on ,” hirit pa ni Charlie.

Hinuon gipabalik si Charlie sa pagkanta aron masaksihan gyud sa kadaghanan ang paghatag niya og hustisya sa kanta.

Nasayran nga gidemalas si Charlie niadtong Martes gumikan kay samtang padulong siya sa rehearsal, gi-holdap siya ug nakuha gyud ang iyang cash.

Nakulbaan pag-ayo si Charlie atol sa rehearsal apan wala niya kini dalha sa entablado aron dili maapektohan ang iyang performance.

“Pag-abot nako sa stage, akong gikalimtan ang bati nako nga experience maong wala ra pud naapektohan ang akong pagkanta,” dugang pa niya.

Komento pa ni coach Jay mao nga samtang nagkadugay ang panagtigi, nag-anam og lambo  ang gipakitang labok ni Charlie.

Gikatahong dili sayon  ang schedule sa mga finalist sa Sinulog Idol sanglit matag adlaw aduna sila’y rehearsal  samtang makigtigi pa sila kada gabii, diin mag-abot ang labihan nga stress ug pressure.

Samtang kay walo pa man ang nahibilin nga idols, gipaabot nga duha gayud nila ang nataktak gikan sa kumpetisyon kagabii sanglit unom ra man gayud ang mamahimong mupadayon paingon sa grandfinals karong gabii. (BANAT NEWS)