CEBU, Philippines – Mibuak og record ang MMFF 2014 sa kasaysayan sa maong festival human nga niabot na sa 949 million ang kita niini niadtong January 5. Nasayran nga nalabwan na niini ang MMFF 2013 nga mikita og 936 million.
Keber sa issue
Gibutyag ni Alex Gonzaga nga naanad na siya sa mga negatibong komento sa mga tawo bahin kaniya. Suma pa sa aktres, "Okay lang kung sinasabi na ginagaya kasi, at the end of the day, hindi mo naman magagaya ang isang tao completely kasi iba-iba ang tao."
Kapamilya na sad
Mapasalamaton karun si Arci Muñoz human nga nahimong Kapamilya ug parti sa umaabot nga teleserye nga Pasion de Amor. Nasayran nga gilibot na sa aktres ang mga dagko nga estasyon apan wala gihapon manimaho. Suma pa niini, “Ano lang, added experience ko na lang. Hindi ko naman hinahangad na sumikat, magkaroon lang ng trabaho at ma-appreciate yung kakayahan ko.”
Magpatambal sa Amerika
Plano sa pamilya ni Kuya Germs nga dalhon siya sa Amerika sa higayon nga tugtan na kini sa mga doktor nga makabiyahe aron didto ipadayun ang iyang therapy. Nasayran nga miarang-arang na ang kahimtang sa maong showbiz personality human nga na mild stroke.
Focus sa career
Gibutyag ni Coleen Garcia nga daghan siya’g naamgohan atol sa iyang pagbakasyon sa Maldives. Usa na niini mao ang pag-focus sa maanindot nga oportunidad nga iyang nadawat karun ug sa pagsalikway sa mga negatibong komento. Nasayran nga busy karun ang It’s Showtime host sa taping sa iyang Pasion de Amor.
Nag showdown
Nagtigi sa pagkanta ang kanhi “The Voice of the Philippines” finalists Morisette Amon, Klarisse de Guzman ug Radha sa Singing Bee niadtong Martes. Ilang gikanta ang ilang mga favorite song sa wala pa muduwa.
Early favorites
Apil ang pambato sa Pilipinas sa Miss Universe nga si Mary Jane Lastimosa sa mga early favorites karun sa maong pasundayag. Ang gikahinama nga beauty pageant mahitabo na karung January 25 sa Miami, Florida.