CEBU, Philippines – Segurado ko nga kadaghanan kanato kay nadugangan ang timbang gumikan sa nagbaha nga mga party nga inyong gitambongan. Nagdoble ang mga imbitasyon, busa nagbaha usab ang pakals, laktod nga pagka-istorya, nagbaha ang mga pagkaon busa ang uban kanato niburot na ang lawas.
Sayon ra gyud ang paglikay aron dili modako ang atong lawas. Puwes, mao kini ang inyong mga buhaton:
1. Atong minosan ang pagkaon og tam-is , cheese, cream sauces ug whipped cream.
2. Kung paminaw nimo nga busog pa ka, mahimo ka nga mousap og chewing gum.
3. Pinaagi niana, dili na kaayo ka ganahan mokaon og daghan.
4. Kinahanglan nga kahibalo ka molikay og pagkaon nga dali ra kaayo nga makapatambok kanimo , bahala’g naa na sa imong atubangan ang lamian kaayo nga pagkaon. Kung dili ka kaagwanta, gamay ra ang kaonon nimo. Labing maayo nga pilion nimo ang prutas.
5. Kung oras gani tingkaon, kinahanglan dili nimo kini palabyan. Kinahanglan gyud baya nga dunay saktong sulod sa imong tiyan.
6. Kung moadto ka og party, maayo nga sutaon daan nimo ang klase sa pagkaon. Inom og daghang tubig , 30 minutos sa dili pa ka mokaon. Pinaagi niini, dili kaayo daghang pagkaon ang imong makuha.
7. Paghuna-huna og mga indoor/outdoor activities nga makapasingot kanimo. Ang pagsayaw maoy usa sa himoon nimo nga bisyo. Mahimo ra pud ang pagdagan.
8. Nagbaha ang calories sa alcohol busa likayi na lang kini. Mas maayo nga moinom na lang ka og tubig.
9. Kinahanglan ang pagkaon pero ayaw sad og palabi. Limitado lang ug sutaa ang mga pagkaon nga ginadili sa imong lawas.
10. Paminaw nimo nga busog na ka, kinahanglan nga mohunong na gyud ka sa pagkaon. (Madungog si DJ Sugar sa Barangay RT 99.5 gikan sa Lunes hangtud sa Biyernes sa programang Radyo Nobela kung diin makauban niya si Papa Cholo, 9-11am ug sa adlaw nga Domingo, sa programang Hoy Sayaw, 3-6pm)