CEBU, Philippines – Hello mga ka-bonding nako nga suki sa Banat News nga kinaham nga mantalaan sa Kabisay-an ug Mindanao.
Naku, nagkaduol na gyud ang Bag-ong Tuig! Nakahuna-huna na kaha mo sa pagkaon nga inyong andamon sa maong okasyon?
Magpalahi kita, mag-andam kita og lamian nga mga putahe! Tara na, magluto kita og pagkaon nga lami, hugyaw tan-awon apan barato diay ‘tu. Akong idalit kaninyo ang chicken cordon bleu!
Mga sagol:
4 hiwa nga boneless chicken breast
1/2 sa tasa breadcrumbs
12 ka hiwa nga ham (lipis)
4 ka hiwa nga cheese
1 itlog
4 ka kutsarita nga mantikilya (butter)
1/4 kutsarita nga asin
2 tsp paprika (pwede ra pud og wala)
Mga Pamaagi:
1. Sagula ang mantikilya (butter) ug asin.
2. Pagbutang og usa ka hiwa sa chicken breast sa usa ka sudlanan (plato/tadtaran), unya i-pahid sa ibabaw ang sinagol nga asin ug mantikilya nga sinabligan og paprika.
3. Ipatong ang ham ug isunod pagbutang ang cheese sa pitso sa manok nga hiniwa.
4. Sugdi og lukot ang pitso sa manok gikan sa usa ka tumoy ngadto sa usa. Siguroha nga hugot ang pagkalukot niini.
5. Tusoka og toothpick ang katapusan sa pitso sa manok aron sa pagsuporta niini ug aron dili matangtang .
6. Saguli og itlog ang nahabilin nga sinagol nang daan nga mantikilya ug asin ug ipahid kini sa nilukot nga pitso sa manok.
7. Butangi og breadcrumbs hangtud malukop kini.
8. Ibutang dayon kini sa plato o aluminum foil sa dili pa i-sulod sa oven ( 350 degrees Fahrenheit/ 177 degrees Celsius ) para lutoon sulod sa 25 minutos.
(Madungog si DJ Kikiro gikan sa Lunes hangtud sa Sabado ,7-9pm sa Evening Star Sweep ,ug 9-12 midnight sa It’s All For You . Naa pud siya’y special program sa Domingo, 6am-1pm)
Biggest grossers
Ang Praybeyt Benjamin 2 matud pa maoy naghupot sa record nga “biggest first day gross of any Filipino movie” samtang ang Feng Shui maoy naghupot sa titulo nga ‘biggest first day gross of any Filipino horror movie.” Kini suma pa sa Star Cinema niadtong nilabay nga adlaw, diin gikatahong nag-una sa takilya ang pelikula ni Vice Ganda ug gisundan sa Feng Shui ni Kris Aquino ug Coco Martin.
Walay Figures
Ingon niini usab ang gibutyag ni Metropolitan Manila Film Festival head Atty. Arthur Tolentino kabahin sa pagpangharos sa Praybeyt Benjamin 2. Apan suma pa ni Tolentino dili sila muluwat og kantidad sa kinitaan sa mga pelikula sa filmfest aron dili maimpluwensiyahan ang publiko, sa ingon tan-awon gayud nila ang buot nilang tan-awon. “Ayaw namin mag-counter trending o mag-trending. Ayaw namin ma-influence ang taste ng moviegoers,” nagkanayon si Tolentino sa TV Patrol niadtong Biyernes.
P53 M diay
Apan suma pa sa Pilipino Star Ngayon, ang Praybeyt Benjamin ni Vice Ganda nihipos og P53 million kapin sa unang adlaw o niadtong December 25. Nagsunod ang Feng Shui, P31 million, ikatulo ang My Big Bossing nga may P28 million, ug ikaupat ang Kubot P11 million.
Gwapa gyud
Mapasigarbuhon gayud si Matteo Guidecelli sa iyang uyab nga si Sarah Geronimo. Nachika pa niya nga sa usa ka interview iya gyung gipanghambog ang kaanyag ni Sarah. Suma pa ni Matteo, usa si Sarah sa mga hugyaw nga panghitabo sa iyang 2014, kauban usab sa iyang mga kalampusan sa showbiz ug sports. Sa 2015, himuon na niya ang iyang music album.
Indie movies
Duha ka indie films ang gikatakdang himuon ni Rocco Nacino karong 2015. Excited na ang nahisgutang Starstruck Second Prince sanglit sa iyang unang indie film, “Ang Sayaw ng Dalawang Kaliwang Paa” nakadawat sila og pasidungog ni Paulo Avelino ug Jean Garcia niini. Posibli usab matud pa nga mag co-host siya sa Starstruck sa GMA7 nga magsugod na karong January 18, diin si Dingdong Dantes ang main host.
Meg ug JM?
Pangutana karon kun aduna bay “something” tali kanila ni JM de Guzman ug Meg Imperial sanglit nagbaha karon ilang mga hulagway sa internet diin nakit-an sila nga sweet kaayo nga nag-date.