Hugyawnatic

Dear Banat hugyaw,

Magsige gyud ko og basa niining Love Story matag Lunes sa Banat News Hugyaw. Ako diay si Adam, 25 anyos  nga taga Mandaue City. Nagtrabaho ko isip call center agent ug duna ko'y uyab nga ginganlan og  Tony, 26  anyos ug nagtrabaho  siya sa usa ka restaurant.

Sure ko nahibulong mo kay puros mi lalaki , yes, susama ming duha nga bisexual apan proud mi sa among relasyon, ang importante nga malipayon ming duha.

Nagsugod among istorya sa gugma sa dihang nangaon mi sa akong barkada sa usa ka restaurant dinhi sa Cebu City. Si Tony maoy waiter nga ni-serve sa among table niadtong higayona.

Nakugang gyud ko sa pagduol niya sa among table kay grabe gyud siya ka-cute uy.  Pution man gud si Tony  busa ako gyud siya giingnan og " Hi cute".

Tam-is nga pahiyom ang kanunay niya nga ibawos  nako  hangtud nahimo mi nga suki sa restaurant nga iyang gitrabahoan.

Basta kami na gani sa akong barkada ang mangaon, si Tony gyud na ang moduol sa among table kay naka-familiar naman siya sa among mga nawong.

Duna'y time nga ako ug akong mga barkada maoy katapusang customers nga nanggawas  kay mag-close na  ang restaurant  ug tayming kaayo kay mo-out na pud si Tony.

Wala ko makaagwanta uy, giduol nako si Tony bisan naa pa mi sa lobby, hehehe.  Nagpaila-ila ko sa akong kaugalingon ug nagbinayloay dayon mi sa among numbers. Niangkon si Tony nga susama ming duha nga bisexual ug okay lang kaniya nga magkahigalaay ming duha.

Lima ka buwan sa among panaghigalaay , nakabantay ko nga mosabay naman pud si Tony sa akong mga text message.  Okay ra kaniya nga motawag ko niya og "honey", ug mao pud ni ang itawag niya nako, di ba,sweet? Hahaha.

Permi na me magkita ug permi namo nga tambayan kanang coffee shop diha sa Ramos St. , ganahan kay ko diha kay dili kaayo daghan og tawo busa makatarong mi og istorya.

Naabot ang panahon nga nagklarohay ming duha kung unsa among gibati sa usag-usa. Niangkon gyud ko nga ganahan ko niya, ug giingnan ko ni Tony nga hatagan nako siya og oras sa paghuna-huna kung andam ba siya nga magkauyab ming duha.

Ako siyang giingnan kung nganong maghunahuna pa siya, kay puwede raman siya moprangka nako if dili ba siya uyon nga magkauyab mi, aron dili na lang ko magdahom.

Apan nitubag si Tony og "Sorry na gud, naniguro lang ko ba nga dili ko masakitan og balik. Naa man gud ko’y kaagi,  nakauyab pud ko niadto og bisexual apan kalit ko niya gibiyaan kay nakakita siya og lain."

Akong gitubag si Tony nga dili siya angay mabalaka kay magtinarong gyud ko if magkauyab mi. Dili ko magpinariha sa iyang ex-boyfriend nga mangita og lain.

Tungod sa akong eksplinasyon, gikuptan ni Tony akong kamot ug giingnan dayon ko niya og," Sige,mao man kaha na imong pasalig, basta ayaw gyud ko og binuangi ha."

Paghuman niya og istorya, gigakos ko ni Toni nga nagtimailhan nga nisugot na siya ug grabe kaayo akong kalipay.

Usa ka tuig kapin na ang among relasyon karon,  ang pagsalig namo sa usag-usa maoy instrumento nga wala gyud mi nagkabuwag.  Mo-request diay ko sa lyrics sa Your Love by Alamid.

Adam daghang salamat sa imong LOVE STORY! Paabuta ugma puhon ang imong request nga kanta.

HUGYAWnatics, aduna ba kamoy LOVE STORY? Ipadala ka na pinaagi sa email: [email protected] O sa facebook: [email protected]