Dili iyang gabii!

CEBU, Philippines -  Para kang 2013 Miss International Bea Rose Santiago, dili lamang gayud swerte si Bb. Pilipinas-International 2014 Bianca Guidotti niadtong gabii sa international competition. Suma pa ni Bea gibuhat matud pa niya ang tanan nga matabangan si Bianca ug gihimo sab matud pa sa pambato sa Pilipinas ang tanan. Nahugyaw gani matud pa si Bea sa performance ni Bianca atol sa swimsuit ug national costume competition. Dili lamang gayud matud pa kadto gabii ni Bianca, ni Bea pa.

Walay politika

Samtang gisalikway ni 2013 Miss Universe 4th runner-up Ariella Arida ang pagduda nga napolitika si Bianca Guidotti  hinungdan nga wala gani gayud kini nahimong semi-finalist sa Miss International. Nagduda ang mga beauty pageant critics nga gituyo ang kapalaran ni Bianca sa Miss International pageant agi’g bawos sa sunod sunod nga kadaugan sa Pilipinas sa nilabay nga tuig. Dili matud pa kini tinuod ug imposibli matud pa kini nga mahitabo.

Nakilig kang Iza

Gikilig ug nakahilak matud pa si Sef Cadayona dihang nakadaug siya isip Best Comedy Actor sa Star Awards para sa Bubble Gang, dihang gigakus siya sa usa sa mga hosts nga si Iza Calzado. Nahinumdum pa si Sef nga pag-apil niya sa Starstruck kaniadto diin usa sab sa mga host si Iza, ang aktres maoy kanunay nga mudasig kaniya matag higayon nga mawagtangan siya og pagsalig sa iyang kaugalingon matag higayon nga mapalpak siya sa mga challenges. Giingnan matud pa siya ni Iza atol sa iyang kadaugan sa nilabay nga semana: You have come a long way. Ang aktres maoy labing unang ni-congratulate kaniya.

Showbiz priority

Nausa na gayud ang hukom ni Andrei Paras nga mo-concentrate sa showbiz ug talikdan lamang una ang basketball. Total niya pa, naa naman ang iyang manghod nga si Kobe kinsa inanay na nga nikulit og pangalan sa natad sa basketball didto sa Amerika. Nagkasikat na karon si Andrei sa showbiz ilabi na nga taas og rating ang afternoon soap nila sa GMA7 nga “The Half-Sisters.”

Happy kontrabida

Malipayon si Sunshine Cruz gumikan kay sayo siya nga nakadawat og pinaskohan sanglit matuman na gayud ang iyang dream nga mamahimong kontrabida sa salida. Kini pinaagi sa teleserye nga giluto karon sa ABS-CBN nga pagabituonan ni Janella Salvador. Suma pa ni Sunshine nga human sa tulo ka tuig nga puros buotan nga inahan ang iyang papel nga kutob lamang sa paghilak, karon magminaldita na gayud siya sa telebisyon.

Dili romantic uy

Giklaro ni Alden Richards nga nagsuod sila ni Rita Iringan apan wala matud pay namugna nga romantic relationship. Suma pa niya nga sweet matud pa siya ngadto sa tanan niyang mga nakatrabaho. Nagkauban ang duruha sa pipila ka mga teleserye sa GMA7. Sa usa ka interview namahayag si Rita nga may “mutual understanding” nga namugna tali kanila ni Alden.

Regine and Ariel serye

Sila si Ariel Rivera ug Regine Velasquez maoy mga bida sa “Himig ng Pasko,” ang Christmas special sa GMA7. Nakaduha na sila ka taping days.

 Pinaskohan ni KC

Adunay umaabot nga bag-ong show sa ABS-CBN si KC Concepcion. Gipahibawo niya nga nag-taping na siya alang niini ug giisip niya kini nga sayong pinaskohan.

DongYan cover

Sila si Dingdong Dantes (DongYan) ang cover sa Starstudio magazine karong Disyembre. Ang Starstudio gipanag-iya sa ABS-CBN Publications.