Nisakay ko'g jeep diha sa Fuente area padung sa Colon niadtong Biyernes sa hapon. Igo ko nga nakalingkod, nilanog ang dakong tingog sa akong kasakay nga babaye, samtang nagkigsulti sa iya sab nga kaubang babaye. Edaran na silang duha, ug sigurado gyud ko nga managsilingan ra to silang duruha. Nanlibak ang mga kanahan:
Woman1: Ngano kaha na sila no nga P300, 000 man unta ang madawat kada bulan gikan sa abroad pero hangtud karon wala pa gyud naimpas ilang balay. Ilang anak wa pa gyud kahuman og iskuyla, sige’g balhin-balhin og kurso.
Woman2: Bitaw uy, maypa ta bahalag nagka utang-utang basta naa natay balay, professional na ang atong mga anak.
Woman1. Ang angay unta nilang buhaton mamalit unta na sila'g yuta. Unsaon man sab gud nga mga under mana sila sa ilang mga asawa, mga waldas kaayo sa kwarta ilang mga asawa wala maghunahuna sa umaabot. Gi-offeran man diay unta na sila'g yuta, P150, 000 wala nila palita.
Woman 2: Bitaw uy, pa sosyal man sab gud na ilang mga asawa, mga gastador.
Hala noh? Chaka (walay ayo) na dayon! Nindot baya gyud unta to ilang mga yawyaw kay undanon ug bulawanon. Pero ang naka chaka kay dili man intawn nila katungod uy nga magproblema ug maoy magplano sa kinabuhi sa uban. Chaka ang maghimantay uy. Unsay labot nato og giwaldas sa silingan ang kinitaan? Unsay katungod nato nga maghisgot unsa ka gastador atong silingan? Hello ila man intawon na nga kinabuhi uy. Kanang kwarta nga ilang giusikan kun tinuod man ugaling ilaha nang hinagoan busa sila ray adunay katungod ug makabuot unsaon na nila paggasto.
Mga chaka sab tong mga asawa nga gilibak atong duha ka mga babaye kun tinuod man ugaling nga nagpatuyang lamang og gasto kay dili baya intawon na ilang pinatuan og singot ang kwarta nga ilang madawat kada bulan. Chaka sab ang estudyante kun tinuod man ugaling nga nagsigeg balhin balhin og kurso kay nagsalig matud pa nga adunay daghang igasto. Chaka kay dili man intawon siya maoy naghago aron makakita anang maong kwarta kada bulan. Pulong pa atong usa ka babaye: May lang og permi magpatiltil og building ang Arabo kay naa silay P300, 000 kada bulan. Wa ra ba gyud ta kahibawo sa panahon. Sakto siya, pero chaka gihapon kay pagpanlibak man to iyaha, wala man pangayua iyang opinion. In other words, mga chaka silang tanan! Ako di ko chaka kay wala ko nangchismis uy, dagko lang gyud to'g tingog mga bayhana murag sila ray pasahero sa jeep nga perte ra ba gyung punua. Pakkk!
My point is, dili ta manghimantay sa atong isigkatawo uy. Kun pangayuan ta og opinion o magpatambag o magpatabang atong silingan anha pa ta mu-eksena sa drama sa kinabuhi sa atong isigkatawo. Mutabang kita kutob sa atong mahimo ra sab ug dili ta magpatugatuga kun wala kitay sarang katakos. Anah lang aron dili kita mangahimong chaka! Pakkk!