CEBU, Philippines - Dili kay ang mga babaye ra ang angayang maningkamot nga nindot sila tan-awon, hasta usab mga lalaki. Suma pa sa https://ph.she.yahoo.com, ang musunod mao ang angayang hatagan og igong pagtagad sa mga lalaki.
1. Mga Tiil
Siguraduha nga limpyo ilang mga kuko sa tiil, sanglit ang kalimpyo sa mga tiil maoy usa sa mga basihanan sa ka limpyado sa usa ka tawo. Dili na kinahanglang muadto pa og salon aron magpa pedicure gyud, apan siguraduhon lamang nga limpyo gayud ang mga tiil.
2. Ang Kilay Bai
Wala kini magpasabot nga kinahanglang magpakilay o ipa-design gyud. Angayan lamang nga siguraduhong hapsay ang mga kilay ug wala kini magsumpay-kinahanglang distansya ang usa’g-usa.
3. Ang buhok nga nigimaw
Bantayi intawon ang mga buhok nga nigimaw gikan sa ilong. Ayaw kini ibta, kundili putli lamang igo nga dili kini musiwil kun ugaling muduko. Ang buhok sa ilong maoy manalipod batok sa mga abog ug uban pa nga makadaot sa nasal cavity, busa putli lamang gyud ug ayaw ibta.
4. Pagpatupi uy
Gawas kun rock star ka o gibayran ka aron magpataas og buhok, pagpatupi aron gwapo tan-awon. Batasana ang pagpatupi ka usa sa usa ka bulan ngadto sa unom ka semana.