Megan natapos na ang mga obligasyon sa Miss World

Miss World na Miss World si Megan Young nang umapir siya kahapon sa Startalk.

Lalong gumanda si Megan sa paningin ko dahil simpleng-simple lang ang kanyang ayos pero nagmumura ang kanyang kagandahan.

Happy si Megan dahil natupad niya ang lahat ng kanyang mga obligasyon bilang Miss World 2013.

Kahit tapos na ang kanyang reign, ipagpapatuloy ni Megan ang mga humanitarian project niya.

Hindi nawala ang poise ni Megan nang tanungin ko siya sa tungkol sa relasyon nila ni Mikael Daez.

Hindi man siya sumagot o umamin, knows nating lahat na going strong ang relasyon nila ni Mikael.

Palaging nakikita ang dalawa na magkasama at kumakain sa mga restaurant na malayo sa paningin ng publiko.

Sa pagwawakas ng kanyang reign, gusto ni Megan na balikan ang showbiz career na pansamantala na iniwanan niya noong manalo siya ng Miss World crown.

Naging artista si Megan nang sumali siya sa Starstruck, ang artista search program ng GMA 7.

Hindi nag-win si Megan pero nagkaroon siya ng local at international beauty title.

Hindi dapat nawawalan ng pag-asa ang mga sumasali sa mga artista search at hindi nananalo.

Isipin n’yo palagi ang naging kapalaran ni Megan na hindi tinanghal na winner sa Starstruck pero mas bongga ang kapalit. Nakarating siya sa maraming bansa, nagkaroon ng mga endorsement at nakilala sa buong mundo.

Asawa ni Derek isinasangkot ang isang maimpluwensiyang pamilya sa kanilang problema

Mabigat ang akusasyon ni Mary Christine Jolly at ng kanyang lawyer na si Atty. Argee Guevarra na may influential family na ‘nakikialam’ sa mga kaso na isinampa nila laban kay Derek Ramsay.

Hindi nagbanggit ng pangalan ang dalawa pero madaling hulaan ang identity ng  mga tinutukoy nila.

Base sa mga pahayag ng dalawa, sure na sure sila na may mga kumikilos para hindi umakyat sa korte ang mga demanda ni Jolly laban kay Derek.

Dj Durano maligaya na sa piling ng GF

Agree ako sa sinabi ni DJ Durano na hindi lang naman siya ang mhin na nakipagrelasyon sa bading.

Totoo naman ang kanyang pahayag na marami sa mga sikat na aktor ang kumabit sa influential players sa industry para sumikat at makamit ang pinakamimithi na stardom.

Believable na minahal ni DJ ang direktor na si Wenn Deramas dahil kung hindi, malabo na tumagal ng sampung taon ang kanilang relasyon.

Starring si DJ sa Moron 5.2, The Transformation at si Wenn ang direktor. Napag-usapan sa presscon ng pelikula ang kanilang nakaraan dahil ito ang inusisa ng entertainment press.

Hindi nagpatumpik-tumpik ang dalawa dahil lahat ng tanong, sinasagot nila bilang tapos na ang kanilang love affair at good friends na sila.

Nagsalita si Wenn na kung hindi sila naging magkaibigan ni DJ pagkatapos ng kanilang break up, hindi matutuloy ang sequel ng Moron 5.2 dahil hindi sila magiging komportable ng kanyang ex-dyowa.

May kanya-kanya nang lovelife ang dalawa. Maligaya na si Wenn sa piling ng bagong boyfriend niya at happy si DJ sa relasyon nila ng kanyang girlfriend na walang kinalaman sa showbiz.