CEBU, Philippines - Nagkauso na og maayo karon ang milk tea ug matud pa sa uban, pawala gyud kini sa uhaw gumikan sa talagsaon nga kalami niini. Kung motikang ka og mga mall, dili gyud mawala sa atong panan-aw ang mga milk tea station.
Dili sa tanang panahon nga mo-effort kita og lakaw og halayo kung magpangita kita og milk tea.
Puwes, mangita kita og alternatibong solusyon aron matambalan ang paghinam-hinam nato nga motilaw og milk tea.
Mahimo ra man diay kini nga mabuhat nato sa atong balay, gamay ra pud atong magasto.
Sayon ra kaayo ang paghimo:
1. Pagpalit og tea bag, nagdepende ra nimo kung unsa nga flavor ang imong gusto.
2. Ihumol kini sulod sa pipila ka minutos sa init nga tubig, isulod sa usa ka baso ug butangi dayon og creamer.Kung gusto ka og natural nga katam-is, puwede nimo butangan og honey. Kung wala'y honey sa inyong balay, pagbutang lang og asukar, pero gamaya lang og butang aron dili luod ang imong milk tea.
3. Kung gusto ka nga dunay flavor, puwede nimo kini sagolan og syrup sa flavor nga imong ganahan. Butangan dayon kini og ice gumikan kay lami gyud ang milk tea basta bugnaw kaayo. Pipila kanato mahiligon kaayo, sa chocolate, strawberry o ba kaha lemon, busa ikaw na ang bahala, dili na kinahanglan nga molakaw pa og layo aron lang gyud motilaw sa gikahinaman nimo nga milk tea.
Butangi og sago, gulaman o ba kaha pearls aron susama pud nga nipalit ka og milk tea sa mga dagkong tindahan.