MANILA, Philippines - Maglulunsad ng isang search para sa Best Kasambahay ang Kapamilya current affairs program na Mutya ng Masa para bigyang pugay at pasayahin ang mga kasambahay na may angking talento at dedikasyon sa kanilang trabaho.
Exciting na mga sorpresa ang naghihintay para sa tatanghaling Mutya of the Universe, na pagpipilian mula sa 30 na kandidatang maglalaban-laban para sa titulo.
Inanyayahan ni Doris Bigornia ang mga babaeng kasambahay na 18 hanggang 45 taong gulang, single man o may asawa, na dumalo sa auditions ng Mutya of the Universe na gaganapin ngayong Linggo (Agosto 31) sa ABS-CBN Center Road mula 8:00 AM hanggang 2:00 PM. Maaaring sumali ang mga kasambahay mula sa Metro Manila at mga kalapit na probinsya.
Magpaganda, magpamalas ng talento, at magpakitang gilas kung gaano kahusay sa trabaho sa audition at magdala lang ng bio data, kahit anong uri ng litrato at barangay certificate na nagpapatunay na ikaw ay isang kasambahay.
Mamimili ng 30 na kasambahay ang programa na siyang magtatagisan sa dalawang yugto: ang talent competition na gaganapin sa Setyembre 6 at sa finals, tampok ang long gown competition at question-and-answer portion sa Setyembre 13.