CEBU, Philippines- Makabungog nga syagit gikan sa liboan ka mga fans ang misugat sa pag-abot sa Thai Superstar nga si Mario Maurer ug Baifern Pimchanok dihang nitungtong na sila sa entablado sa Ayala Center Cebu kaniadtong Domingo.
Ang duha tuyo nga miari sa Sugbo aron personal nga mahimamat ang mga fans nila atol sa gipahigayon nga Penshoppe Fan Conference 2014.
Sa pakighinabi sa mga reporters sa Cebu sa duha ka Thai superstars atol sa gipahigayong press conference sa Shagri-La Mactan Resort and Spa, malipayong mipaambit ang duha sa ilang pagpasalamat sa ilahang mga fans diri sa Sugbo sa padayun nga pagsuporta kanila.
Matud ni Mario, sa matag bisita niya dinhi sa Pilipinas, dili matukib ang kalipay nga iyang mabati matag kita niya sa hugot nga suporta sa iyahang mga fans.
“Every time I come here, the fans wait for me at the airport. If we have an event like now for Penshoppe, it is very surprising to see so many fans coming to the event,” nagkanayon siya.
Dugang usab ni Baifern, sa wala pa sila maabot diri sa Sugbo, daghan na nga mga fans ang mipadayag og kahinam nga makakita kanila pinaagi sa iyahang instagram.
Gawas sa pagpakighimamat sa ilahang mga fans, gusto usab ni Mario ug Baifern nga matilawan ang inila nga lechon sa Sugbo.
Matud ni Mario, kinsa adunay suod nga higala nga usa ka Pilipino, matag ari niya sa Pilipinas, paborito niya nga kan-on mao ang adobo. Gawas sa lechon gusto usab matilawan niya ang inilang exotic nga pagkaun diri sa Sugbo; ang balot.
Ang duha kasamtangan nga busy karun sa tagsa-tagsa ka mga proyekto sa Thailand--- si Mario kasamtangan nga nag- shooting sa iyahang drama series nga giulohang “The Rising Sun”, samtang si Baifern busy pud sa iyahang TV series nga mag-premiere sa Thailand karung Agosto 28.
Mipaambit pud si Mario ug Baifern sa ilahang interes mahitungod sa pag-negosyo. Matud sa duha, kun wala sila karun sa showbiz, siguradong busy sila karun sa tagsa-tagsa nila ka mga negosyo.
Si Mario nidako sa usa ka negosyanteng pamilya samtang si Baifern, anaa puy negosyo; usa ka cream gel nga negosyo pud sa iyahang pamilya.
Matud ni Mario, wala sa iyahang plano nga mag-artista tungod kay wala siya’y alamag niini, apan dihang nahimamat niya ang iyahang magtutudlo sa pag-arte, nausab ang iyahang huna-huna. Dugang pa niya, dili sayon nga trabaho ang mahimong artista, ug kinahanglan niini ang tukmang dedikasyon ug oras.
Si Baifern mapasalamaton usab ni Mario tungod sa pagtabang niini nga mapalambo ang iyahang career pinaagi sa ilahang pelikula nga “A Crazy Little Thing Called Love.”
Bisan pa man sa ka-busy sa schedule ni Mario ug Baifern tungod sa tagsa-tagsa nila ka mga proyekto, apan wala gihapon kalimti sa duha ang paggahin og oras sa tagsa- tagsa nila ka pamilya.
Matud ni Mario, matag wala siya’y trabaho, hilig niya nga magbiseklita kuyog ang iyahang mga amigo ug pamilya, samtang si Baifern usab adto gyud mahurot ang iyahang oras sa iyahang pamilya kung wala siya’y taping.
“I try to give time to family, because before I got into the entertainment industry, we always spend time together, but now that I became an actress, I cannot spend much time with them,” butyag ni Baifern.
Gawas sa paggahin og oras sa tagsa-tagsa nila ka mga pamilya, ang duha pareho pud nga mapinanggaon sa tagsa-tagsa nila ka mga inahan.
Matud ni Mario, ang iyahang inahan mao ang tawo nga iyang giidolo tungod sa pagkakugihan ug buotan niini, mao usab si Baifern nga mihulagway sa iyahang inahan nga hilig kaayo mutabang sa mga kabus.
Kahinumdomang unang misikat ang duha kaniadtong tuig 2010 pinaagi sa ilang pelikula nga “A Crazy Little Thing Called Love” nga gihangop pag-ayo sa ilang mga Filipino fans.