MANILA, Philippines - Bagong adventure ang mapapanood sa bagong seasons ng Kuroko’s Basketball at Naruto Shippuden tuwing umaga sa bagong Team Animazing ng ABS-CBN.
Mas pinatinding team Seirin ang nagbabalik sa Kuroko’s Basketball matapos ang pagkatalo nila sa inter-high competition. Sa tulong ng kanilang nagbabalik na teammate na si Kiyoshi, nakahanda na ang koponan na sumabak sa Winter Cup sa pag-asang mapataob ang Generation of Miracles. Madala kaya ni Kuroko sa tagumpay ang Seirin? Makatulong kaya ang kanyang bagong “Vanishing Drive” technique?
Samantala, nakasalalay naman kay Naruto ang kaligtasan ng Konoha city sa ikaanim na edisyon ng Naruto Shippuden.
Maghahasik ng lagim ang kalabang si Madara para tuluyang mapasakamay ang buong siyudad. Para maisakatuparan ito, kinakailangan niyang makuha ang siyam na Jinchuriki o halimaw.
Sa halip na harapin si Madara ay magsasanay muna si Naruto sa isang isla dahil ang ika-siyam na monster na tinatawag na Kyuubi ay nasa mismong katawan niya pala. Dito ay mauungkat ang kanyang nakaraan sa muli nilang pagkikita ng namayapang ina na siya ring magtuturo sa kanya kung paano ma-kontrol ang Kyuubi. Maging sapat kaya ang kanyang paghahanda bago siya mahanap ni Madara?