CEBU, Philippines - Mikisaw karon ang pangalan sa anak ni Sen. Jinggoy Estrada nga si Jolo ug ginganlan kini og bag-ong Jean Napoles human mikatap ang mga hulagway niini nga nagsimbolo og labihan nga ka adunahan pinaagi sa usa ka IG account nga giingong gipanag-iya niini.
May hulagway nga nagsakay sila og private jet ingon man litrato sa usa ka passport nga para sa usa ka diplomat. May hulagway usab sa usa ka paresan sa Luis Vuitton nga sapatos.
Si Jolo maoy igsuon sa Star Magic talent nga si Julian Estrada. Kahinumduman nga gisumsuman usab niadto ang pangalan sa anak ni Janet Napoles nga si Jean gumikan sa hugyaw kaayo nga lifestyle niini nga dayag kaayo sa social media.
Apan kaduhaduhaan pa kun kang Jolo ba gayud ang maong IG account o hayan poser lamang. Kini kay may usa pa ka IG account nga giingong iyaha ni Jolo ug naka private ang setting niini.
ABS-CBN experiment
Nag-experiment ang ABS-CBN og bag-ong panagpares.
Sila si Xian Lim ug Jessy Mendiola suwayan pinaagi matud pa sa usa ka teleserye nga umaabot. Samtang niining bag-o lamang, gipahibawo nga magpares sab sila si Enrique Gil ug Liza Soberano sa usa ka pelikula sa Star Cinema nga paga-ulohan og "My Bet".
Jane nag-sorry ni Kathryn
Nakahilak ang PBB celebrity housemate Jane Oineza sa dihang nangayo siya og pasaylo ni Kathryn Bernardo kalabot sa iyang "no comment" atol sa pagpangutana ni Loisa kabahin sa isyu nga nagparetoke si Kathryn. Gitambagan usab ni Kathryn si Jane nga bantayan ang mga pulong nga iyang ipagawas nga mamahimong malain pagsabut sa kadaghanan.
Nagpadayon ang komunikasyon
Bisan pa man nga wala na ang Jeric Gonzalez-Thea Tolentino loveteam ,giangkon ni Thea nga adunay gihapon sila'y komunikasyon sa aktor. Dugang pa ni Thea nga adunay umaabot nga pelikula si Jeric kauban niini ang superstar nga si Nora Aunor. Kahinumduman nga sila si Jeric ug Thea maoy mga mananaug sa "Protégé" niadtong 2012.
Kanunay nga abtik
Gibutyag ni Richard Guttierez nga inspirado siya nga motrabaho sukad nga niabot si Baby Zion sa iyang kinabuhi. Dugang pa ni Richard nga bisan wala na siya’y tulog, dili gyud siya bation og kakapoy.
Mibakasyon sa Thailand
Malipayong gipaambit ni Angelica Panganiban sa iyang Instagram account ang "video selfie" nila sa iyang uyab nga si John Lloyd Cruz kinsa nagsaulog sa iyang birthday niadtong Martes. Ang maong video kuha sa usa ka private yacht didto sa Thailand diin nagbakasyon ang duha."To my best friend -- happy birthday." suma pa ni Angelica sa iyang post.
Jen tak-om lang
Giangkon ni Jennylyn Mercado nga dili na siya gusto nga mukomento kalabot sa iyang kanhi boyfriend nga si Luis Manzano kinsa vocal kaayo sa nagapungasi nga relasyon nila ni Angel Locsin. Niabot og duha ka tuig ang relasyon nila ni Jennylyn ug Luis apan wala gyud sila mohatag og rason nganong nagkabuwag sila sa miaging tuig.
Friends forever
"I'm glad that our friendship was established again. We're fine. It's been fun," mao kini ang paghulagway ni Sam Milby sa panaghigalaay nila sa iyang kanhi uyab nga si Anne Curtis. Giangkon ni Sam nga sayop ang iyang pagtuo niadto nga dili mabalik ang ilang friendship human sa ilang breakup niadto. Ang duha adunay umaabot nga pelikula nga nag-ulohan og "The Gifted".
Busy ang peg
Malaumon si Iza Calzado nga mamahimo na siyang inahan sa edad nga 35. Sa pagka-karon, busy kaayo siya sa seryeng "Hawak Kamay" sa ABS-CBN. Aduna usab siya'y umaabot nga mga pelikula nga giulohan og "Maria Leonora Theresa" ug "Somebody To Love."
Tambag ni Kathryn
Gitambagan ni Kathryn Bernardo ang mga PBB-All In housemates nga dili angayan nga magdali sa pagsulod og relasyon. Gibutyag kini sa aktres sa dihang nisulod siya sa PBB house uban sa iyang ka-loveteam nga si Daniel Padilla. Si Kathryn ang giiila karon nga "Showbiz Teen Queen" .
Jopay mihatag og katin-awan
Gipadayag ni Jopay Paguia nga nibakasyon ang iyang kanhi talent manager nga si Joy Cancio hinungdan nga wala kini katambong sa kasal nila ni Joshua Zamora. Wala hinuon siya'y ideya kung unsang lugara ang gibakasyonan ni Joy. Una na nga natsismis niadto nga nagumon si Joy sa casino busa dili na kini visible.
Rhian isip masakiton
Human sa pila ka buwan nga pahuway, mibalik na sa primetime ang aktres nga si Rhian Ramos kinsa siya mao ang modala isip Joy Dela Rosa nga adunay leukemia sa umaabot nga serye sa GMA nga "My Destiny" nga gibidahan usab nila ni Tom Rodriguez ug Carla Abellana.
Kutob ra sa pagpa-cute
Giklaro ni Shaina Magdayao nga wala siya ma-pressure bisan pa man nga puros nagkalami ang lovelife sa iyang kabarkada nga sila si Bea Alonzo, Toni Gonzaga ug Angel Locsin. Nasayran nga single gihapon karon si Shaina ug giingong friends lang sila ni Piolo Pascual kinsa taud-taud na nga nagpa-cute kaniya.
Esther gilat-an sa bashers
Gihimo na nga pribado ni Esther Lahbati ang iyang Instagram account gumikan kay wala na kini kaaguwanta sa lenggua sa iyang bashers. Nasayran nga dunay mga wala makauyon kaniya gumikan sa iyang gipang-post batok kang Annabelle Rama.
Tambongan ni Jen
Gibutyag ni Jennylyn Mercado nga kung makadawat siya og imbitasyon sa kasal sa kanhi niya hinigugma nga si Patrick Garcia, iyaha gyud kini nga tambongan. Si Patrick maoy amahan sa anak ni Jen nga si Baby Jazz.
Julia nagpakahilom
Wala na mohatag og komento si Julia Barretto kalabot sa iyang gusto nga mailisan ang iyang apelyido. Giingong gusto sa aktres nga mahimong Barretto ang tinoud niya nga apelyido, ug dili na siya mogamit sa Baldivia nga maoy tinuod nga apelyido sa iyang amahan nga si Dennis Padilla
Exclusively dating gihapon
Giklaro ni Nikki Gil nga dili pa sila uyab sa non-showbiz guy nga usa sa mga rason sa tam-is niya nga pahiyom karong panahona. Pabilin gihapon nga "exclusively dating" ang ilang istado.
Paningkamotan sa NCCA
Mohimo og halapad nga pagtuon ang National Commission for Culture and the Arts (NCCA) aron maduso og balik sa Malacañang ang pangalan ni Nora Aunor ug iproklamar nga National Artist sa nasud. Kahinumduman nga daghan ang nakasaway sa wala pagkalakip sa pangalan sa superstar nga mahimong national artist sa natad sa pag-arte.
Dili mahimo
Gitataw ni Ogie Alcasid nga ekslusibo siya TV5 busa dili niya mabuhat ang hangyo sa iyang fans nga mo-guest sa kanhi niya programa sa GMA-7 nga Bubble Gang. Matud pa nga daghan na ang gimingaw sa tandem nila ni Michael V.
Malinawon ang lovelife
Nalipay si Cristine Reyes nga malinawon kaayo ang lovelife karon gumikan kay layo kaayo sila sa mga intriga. Nakaingon siya nga bintaha gyud basta dili taga showbiz ang iyang uyab. (Sanden J. Anadia)
Gwapa or Dili?
Naglantugi ang mga followers sa www.fashionpulis.com gumikan niining maong hulagway ni Kathryn Bernardo. Daghang miingon nga ordinary ra matud pa diay kaayo og dagway ang gitawag karon nga "Teen Queen" sa ABS-CBN. May niingon pa gani nga mao diay nga daghan kaayo og fans si Kathryn kay daghan mang ordinary lamang og dagway sama sa dalaga.
Apan may midepensa kang Kathryn pinaagi sa pag-ingon nga ang dagway ni Kathryn nagsimbolo sa matuod nga kaanyag sa Pinay, sama usab sa dagway nila ni Sarah Geronimo, Mikee Cojuangco ug Gemma Cruz Araneta.
May miingon pa nga ang pahiyum ni Kathryn ang labing lig-on niyang pambato. (BANAT NEWS)