Divine, wa kauyon sa sweetness ni Sarah ug Matteo?

CEBU, Philippines - Naalarma gayud matud pa si Mommy Divine Geronimo sa sunod-sunod nga pagkatap sa mga hulagway ni Sarah Geronimo ug Matteo Guidicelli sa nagkadaiyang entertainment ug social media sites.

Wala matud pa makauyon ang nahisgutan niini, hinungdan nga nikisikisi kini pinaagi sa pagpadala og mensahe ngadto kang Matteo ug gisultihan ang Sugboanong car racer/actor/model nga wala na siya makauyon sa dagan sa panghitabo.

Gikatahong giingnan matud pa ni Mommy Divine si Matteo nga angayan nga dili mutugot ang ulitawo nga aduna pay susamang hulagway kay nakapa "cheap" matud pa kini sa imahe sa iyang anak.

Apan si Sarah human nasayud sa gibuhat sa iyang inahan, wala makauyon niini hinungdan nga gikomprontasi matud pa niya ang nahisgutan. Gipangutana matud pa ni Sarah ang iyang inahan kun unsa ba diay ilang buhaton ni Matteo, mag-atubang ba lamang diay sila samtang magyarok og kape tibuok adlaw.

Labaw sa tanan, giingnan matud pa ni Sarah ang iyang inahan nga kun makakomentaryo mura sab og wala makasinati og ingon niini nga pagbati kaniadto.

Kahinumduman nga unang nikatap ang mga hulagway nila ni Sarah ug Matteo kauban ang magtiayong Judy Ann Santos ug Ryan Agoncillo samtang nitambong sila og racing event. Ikaduhang hulagway mao ang kauban gihapon nila ang nahisgutang magtiayon samtang nag-dinner.

Labing bag-ong hulagway mao ang party nga gipasiugdahan matud pa ni Matteo diin kauban nila ilang mga higala, lakip na ang aktor nga si Sid Lucero. Sa maong hulagway naaninaw nga nagsimpig ang mga aping nila ni Sarah ug Matteo.

Happy Fans

Ang mga fans ni Sarah nalipay nga nakakita sa maong mga hulagway gumikan kay timailhan matud pa kini nga inlove ang ilang idolo.

May mga nikomentaryo nga dili na matud pa kinahanglang angkunon sa duruha ang tinuod nga estado sa ilang relasyon gumikan kay dayag na kaayo kini pinaagi sa maong mga hulagway.

Dugang pa nga panahon na matud pa nga masinati ni Sarah ang ma-inlove sanglit 25-anyos na siya.

 Ang mga kaila usab ni Sarah nalipay gumikan kay blooming matud pa kaayo ang Pop Star Princess karong mga panahona, tataw nga dunay naghatag og pahiyom sa kasingkasing niini.

Samtang si Matteo nga na-interview niining bag-o lamang niingon nga buot matud pa nila ni Sarah nga magpabiling pribado ang ubang mga detalye kun unsa gayud ang tinuod nga estado sa ilang relasyon karong mga panahona.

Duha ka tuig na

Saulugon na sunod buwan sa seryeng Be Careful With My Heart ang ilang ikaduha nga anibersaryo.  Adunay concert ang mga bituon sa maong serye karong July 25 sa Araneta Coliseum. Nasayran nga padayon nga gihangop sa masa ang mga bida sa maong serye nga sila si Jodi Sta. Maria ug Richard Yap.

Na-pressure

Giangkon sa mga bida sa seryeng My BFF sa GMA-7 nga sila si Jillian Ward ug Mona Louise Rey nga na-pressure sila gamay gumikan kay ang timeslot sa naghinapos na  nga Korean series nga My Love from the Star maoy ilang pulihan. Nasayod ang duha nga kusog gyud kaayo ang maong serye.

Tulin ra

Gipaneguro ni Mark Bautista nga dili siya ma-problema sa Viva Entertainment nga maoy naghupot sa iyang career kalabot sa pag-produce sa kaugalingon niya nga concert. Suma pa ni Mark nga iyaha kining kabubut-on ug wala siya'y problema nga nasugatan niini. 

Stars on 45

Gibalik ang segment nga "Stars on 45? sa noontime show sa ABS-CBN nga It's Showtime gumikan kay matud pa daghan gyud ang nangita niini.

Jason misaad

Gipasalig ni Jason Francisco nga buhaton niya ang tanan aron lang gyud maharuhay ang pagpuyo sa iyang pamilya. Suma pa ni Jason nga dili gyud mahitabo nga iyang biyaan ang iyang asawa nga si Melai Cantiveros ug ang ilang anak. Kahinumduman nga gikuwestiyon niadto ang loyalty ni Jason ngadto kang Melai gumikan kay matud pa pul-anon kini nga pagkatawo.