Enerhiya asa ka pangitaon?

CEBU, Philippines - Dili nato malikayan nga usahay naa gyuy panahon nga motukar ang kakapoy nga wala ta masayod kung unsay hinungdan.

Laay ang paglihok, hinay ang dagan sa panahon ug mura’g gukoron gyud ta sa duka.

Kasagaran atong tambalan kini sa pag inom og kape, o di ba kaha kanang mga energy drinks nga wala gyud tay alamag kung unsa ang ingredients niini, basin pa unya kung naa ni laing epekto kanato.

Kinahanglan  nga abtik kita kanunay ug aniay mas maayo, lamian ug luwas nga tinubdan sa  enerhiya.

Mga "power foods" nga magamit nato sa panahon sa kaluya ug  listahan  nga akong idalit kaninyo maoy makahatag kanato og idea kung asa nga pagkaon ang pinakamaayo aron kita mobaskog.

1. Nuts

Ang mga Nuts (mani, almond, cashew etch.) maayo kaayo nga "on-the-go snacks" nga ma dali-dali ra nato og kaon bisan asa mang dapita o panahuna. Mas maayo ang hilaw kay naa pay daghang sustansya kay sa nasangag na. Anaay daghang protein, omega-3  ug energy boosting B and E vitamins. Naa pa gyuy mga minerals nga Magnesium ug Potassium busa segurado nga molagsik gyud ka.

2. Tubig

Dili man tuod kini technically matawag nga pagkaon apan ang tubig makapapukaw gyud sa atong hunahuna nga nagluya. Kasagaran sa kaluya, sintomas diay sa dehydration. Kung naay saktong intake sa tubig  ang atong lawas, maabtik gyud ta, makatabang pa gyud sa atong digestive system ug circulatory system ug uban pang kalihokan sa atong lawas.

3. Isda

Anaay taas nga kalidad sa protein, fat-soluble vitamins, nga makahatag og kaayohan sa lawas. Aduna kini  omega-3 ug protena nga makapalig-on sa atong kaunoran.  Puno usab kini sa  essential fats nga makahatag og kusog sa atong lawas.

4. Mga Prutas

Dali rang makit-an, naay mga barato ra kaayo ug di ba kaha naa ra gyud sa atong tugkaran. Puno sa sustansya, minerals ug vitamin C ug mga natural sugars nga makahatag gyud og ka-abtik sa atong lawas.

5. Dark Chocolate

Katung ganahan og tam-is , seguradong malipay gyud mo kay nalakip sa akong listahan ang dark chocolate .Napuno kini  sa  anti-oxidants, natural sugars ug natural fats gikan sa cacao.  Maayong ukit-ukiton, pag-pamper sa atong kaugalingon in a healthier way, kinsa pa may maluya anang lamia?

Anaa pay daghang makit-an, naa pay daghang makapukaw sa nagluya natong lawas. Mas maayo nga magduki-duki, magpangutana ug mobasa. Ngil-ngiga Oi!.  (Inyoha ko nga madungog sa  107.5 Win Radio Cebu gikan sa Lunes hangtud sa Sabado sa mga programang  Heart Stories with Mama Lou & DJ Randi /1-3 pm ug  Your Song with Mama Lou/ 9pm to 12mn ).