Dunay kanta kaniadto si Frank Sinatra, nga nag-ulohan og High Hopes. Dunay mga linya sa kanta, nga nagkanayon, "Just What Makes That ant, think he can move that Rubber Tree Plant..? " The ant answered, High Hopes…High Hopes…" Gibuhatan pod ni nako’g usa ka drama sa radio kay natumba man gyod ang rubber tree. Gipanig-ignan nako ang sugilanon sa rubber tree, nga naa diha sa M. Velez, duol sa Kapitolyo. Ambot nganong nagtuo man gyod ko, nga sa dili madugay, matumba ug mapukan, ang rubber tree. Pagka karon, mikalit lang kono'g kawaa, ang maong rubber tree.
Kalibogan, kay dunay mga tawo diha dapita, nga moingon, nga nawaa ang dakit, duna say moingon, nga nawaa ang rubber tree. Ano ba talaga? Dakit o rubber tree? Managlahi man para nako ang rubber tree ug ang dakit. Sa tinagalog, ang dakit, Balete tree. Gitawag siya'g usa ka traydor nga kahoy kay may sanga lang siyang motugdon sa laing kahoy, unya mag-anam siya'g kadako, hangtod mamatay ang kahoy nga iyang gitugdonan. Mao kini, nga ang Balete Drive didto sa kaulohan, nailhan gyod, nga dunay white lady. Ambot kun duna bay makahimo sa pag-research kalabot niini. Kay daghan na kaayong mga salida kaniadto, nga nagpakita, nga duna gyo'y white lady ang Balete Drive. Nabasahan kini nako sa usa ka libro. Wa lang gyod nako mahipos ang maong libro. Pero kun duna gyo'y mo-insister, nga ang Balete O dakit ug Rubber Tree, usa ra, wa na ko'y mahimo. Basta, para nako, kadtong kahoy nga nawaa diha sa M. Velez Street, Rubber Tree to, ug dili Dakit.