CEBU, Philippines - Nagtapok alang sa usa ka reunion ang mga Bisaya kung diin ang istorya sa ilang kinabuhi na-feature na sa programang Maalaala Mo Kaya.
Gitambongan kini mismo sa host sa MMK nga si ABS-CBN President Charo Santos Concio ug sa mga researcher sa nahisgutang programa.
Lakip sa nitambong sa maong kalihukan nga gipahigayon diha sa Cebu City Waterfront Hotel dinhi sa Sugbo mao sila si Direk Olive Lamasan ug ang head sa Star Cinema nga si Malou Santos.
Gisaysay ni Concio ngadto sa letter senders nga naggikan pa sa Bohol, Cebu, Dumaguete ug Siquijor nga dako kaayo og natabang ang tagsa-tagsa nila ka mga istorya ngadto sa mga tawo gumikan kay mahimo kini nga panaminan sa pagkab-ot og hustong desisyon.
“Ang mga kuwento ninyo ang nagsilbing inpirasyon sa mga tao, salamat po na pumayag kayo na maging bahagi ng MMK ,†matud pa ni Concio.
Lakip sa nitambong sa reunion mao ang letter senders sa nakalabay nga usa na ka dekada ug maoy tag-iya sa mga MMK episodes nga naglakip sa Diary, Harmonica, Basilica, Cellphone, Toy Car, Kamison, Resort, Police Uniform, T-Shirt, Board Game, Wedding Booth, Patalim, Bangkang Papel, Langis, Marriage Contract, Leather Shoes, Salamin, Ensaymada ug Bimpo.
Nagkanayon si Charo nga dunay ubang istorya nga nakapatandog gyud sa kinabuhi sa tawo, usa na niini ang istorya ni Ivon Apolonias nga usa ka bayot nga wala gyud dawata sa iyang mga ginikanan niadto.
Apan sukad gipasalida ang istorya sa iyang kinabuhi sa MMK, nakasabot na ang iyang mga ginikanan sa iyang sitwasyon ug hingpit na siya nga gidawat niini.
Matud pa niya nga suwerte na lang gyud kaayo siya gumikan kay sa linibo ka mga tawo nga nagpadala og suwat sa maong programa, usa gyud sa napilian mao ang istorya sa iyang kinabuhi.
Atol sa MMK reunion, gihinabi gyud ni Concio ang mga tawo ug gitambagan niya kini nga magpadayon sa pagsagubang sa mga hagit sa kinabuhi.
Ang MMK nagsaulog na karon sa iyang 23 na ka tuig nga paghatag og inspirasyon ug pagtulun-an matag Sabado sa gabii sa ABS-CBN.
Nanghugyaw atol sa reunion si Carlo Aquino diin nikanta siya ug nag-promote sa ilang MMK episode niadtong Sabado kauban si Angelica Panganiban. Maisip usab kadto nga reunion episode nila ni Carlo ug Angelica kinsa katapusang nagkatrabaho siyam ka tuig na ang nilabay.Ang malampuson nga MMK reunion giduma sa JSP Ads &Promo ni Josie Pereyra (JSP).