Mark Anthony hiwalay na sa asawa!

Hindi ko ikinagulat ang pag-amin ni Mark Anthony Fernandez na may problema sila ng kanyang misis na si Melissa kaya cool off ang drama nila.

Normal sa mag-asawa ang pagkakaroon ng mga problema. Hindi sinabi ni Mark kung sino ang unang nagdesisyon na makipaghiwalay pero may kutob ako na si Melissa ang nagpasya.

Inaanak ko si Mark sa binyag at nasubaybayan ko ang kanyang paglaki. Kilalang-kilala ko siya kaya kumbinsido ako na siya ang dahilan kaya nakipag-cool off ang kanyang misis.

Passport ng pamilya ni Enzo, sa outlet mall sa Amerika nawala

Nabasa ko kahapon ang report dito sa PSN na nawala sa Amerika ang mga passport ni Enzo Pineda at ng kanyang pamilya.

Totoong-totoo ang report dahil nabanggit ito sa akin. Nangyari ang insidente nang panoorin ng Pineda family sa Las Vegas ang laban ni Congressman Manny Pacquiao kay Timothy Bradley.

Nagkaroon ng stop over ang pamilya ni Enzo sa isang outlet mall sa Barstow habang pabalik sa Los Angeles ang grupo.

Nang bumalik sila sa kanilang sasakyan, saka nila na-discover na biktima sila ng mga magnanakaw. Nawala ang mga gamit nila, kabilang ang mga laptop at passport.

Sa tulong ng Philippine Embassy, nabigyan ng  mga temporary passport ang Pineda fa­mily kaya nakabalik sila sa Pilipinas.  Lesson sa mga bumibiyahe sa Amerika at sa ibang bansa ang nangyari sa pamilya ni Enzo. Huwag na huwag na ihihiwalay sa inyong mga katawan ang mga importanteng dokumento tulad ng passport, wallet, at siyempre, ang mga datung!

Isa pang nambugbog kay Vhong inilabas na ni Tony Calvento

Inilabas kahapon ni Papa Tony Calvento ang litrato ni Edgardo Sampana, isa sa mga suspect sa pambubugbog kay Vhong Navarro noong January 22.

Si Edgardo ang unidentified suspect sa CCTV footage na inilabas noon ng NBI. Ang sabi ni Papa Tony, napaluha si Vhong nang makita nito ang litrato ni Edgardo dahil may mukha at pangalan na ang suspect na itinuring na John Doe ng mga imbestigador.

Dahil sa rebelasyon ni Papa Tony, kumpleto na ang cast ng mga sangkot sa pang-aabuso kay Vhong. Hindi na mahihirapan ang NBI sa pagha­hanap sa John Doe na kinilala bilang si Sampana.

Patricia timing na timing ang pagbalik ng showbiz

Timing na timing ang pagbabalik-showbiz ni Pat­ricia Javier dahil laman ng mga pahayagan at TV news program ang kanyang ex-boyfriend na si Ced­ric Lee.

Dahil may nakaraan sila, natural na puro tungkol kay Cedric ang mga itinatanong kay Patricia ng mga reporter na nakakahalubilo niya.

Natalbugan na nga ni Patricia si Vina Morales na ex-dyowa ni Cedric. Tikom ang bibig ni Vina as in hindi siya nagsasalita tungkol  kay Cedric, kahit may karapatan siya dahil ama ng kanyang anak ang suspect sa pambubugbog kay Vhong Navarro.

Mama Nene huling lamay na

Ngayong gabi ang huling lamay para may Mama Nene Vera Perez, ang matriarch ng Sampaguita Pictures.

Nakaburol si Mama Nene sa bahay nila sa Valencia St. Quezon City. Mag-expect tayo ng heavy traffic sa Gilmore Avenue dahil sa rami ng mga makikiramay sa naulilang pamilya ni Mama Nene.

Unang ibinurol si Mama Nene sa Mt. Carmel Church at nga­yong umaga, inilipat siya sa bahay nila sa Valencia St. dahil bukas na ang libing niya sa Manila Memorial Park sa Parañaque City.

Salamat ulit…

Maraming salamat uli kay Aries Razal dahil sa Burberry slippers na ipinadala niya sa akin.

Bukod sa tsinelas na birthday gift niya, pinasasalamatan ko si Aries dahil loyal reader siya ng online version ng  Pilipino Star NGAYON (PSN) at Pang Masa (PM) bilang nagtatrabaho siya sa ibang bansa. Maraming salamat Aries!