Yellow Tsinilas

CEBU, Philippines - Retired public school teacher ang akong mama. Nagtubo kami sa isla nga nagsalig sa utang o salary loan sa akong mama. Ni-graduate ko og college nga wala gyud makadawat og tseke akong mama, kundili sukli na lang sa iyang sweldo nga gikuhaan na sa bangko og bayad sa iyang gi-loan. Hinungdan nga taliwala niining gipalabang karon nga balaodnon ni Senator Antonio Trillanes kabahin sa pagpa-umento sa suhulan sa mga magtutudlo sa pampublikong mga tunghaan lukop nasud nakapahinumdom kanako sa akong busluton nga yellow nga tsinelas.

Eleventh birthday nako kaniadto, dihang bugtong gift ra gyud nga akong gipangandoy mao ang bag-o nga yellow nga tsinelas kay sakit na kaayo akong mga lapa-lapa sanglit buslot naman ang akong puti nga slippers. Namarayeg pa gyud kami niadto sa usa ka paryente aron mapalitan ko sa Ormoc City. Nahinumdom ko nga P20 pa ang usa ka paresan sa tsinelas nga ang brand nagsugod sa letrang S. Ang ending wala ko mapaliti, kay nakalimtan sa among paryente. Unsaon nga wala man sab mi gipada nga kwarta gyud-namarayeg ra man mi. But yes, that was how hard life was in the province. Naglisud gyud ang public school teachers kay gamay ra sila’g sweldo unya labihan kahago sa ilang trabaho, ilabi na kun taga probinsya ka-daghang estudyante ug nagkuwang ang classrooms ug uban pang instructional materials.

And sa una pa kadto. How much more karon? And sa province pa gyud to. How much more kun sa syudad pa mi nanimuyo? Pwes, mupakpak  ko ni Trillanes! Angayan gyud nga yak-an sa kadagkuan sa DepEd ang maong balaodnon tungod ug alang sa atong mga pinalanggang magtutudlo sa public schools, ilabi na intawon kadtong na-assign sa kabukiran nga mulabang pa og pila ka sapa ug mutungas og pila pa intawon ka bungtod.

Ang public school teachers nagsalig sa utang intawon kay kuwang gyud na ilang sweldo. Hinaot nga magmalampuson ang maong tinguha ni Trillanes aron sa ingon, wala nay mga anak og magtutudlo nga mag-antos pagsul-ob og busluton nga tsinelas sama kanako kaniadto, gikan sa elementary hangtud sa high school. Tag-P20 pa to ang tsinelas kaniadto, wala man gyud gani ko maregaluhi sa ako pa gyung birthday. Unsa na kaha karon nga niumento na ang presyo sa maong tsinelas?

Happy Mother's Day diay sa akong Mama Sally kay gumikan sa iyang paningkamot ug paghigugma maka-afford na gyud ko mupalit og tsinelas! Pakpak

 Alang sa dugang mga artikulo, bisitaha ang akong blog dear okryanians:www.ryanmarkable.blogspot.com