KC gisurpresa ni Paulo

CEBU, Philippines - Gisaulog ni KC Concepcion ang iyang birthday niadtong Domingo ug surpresang mitunol og cake kaniya  si  Paulo Avelino kinsa midiskarte karon sa aktres. Mitambong usab sa birthday party ni KC sila si Yeng Constantino, Erik Santos,  Jericho Rosales ug Kim Jones.

"For hand-picking each & every one of my friends & placing them in my life at their own time; For surrounding me with those that inspire, encourage, build up & truly love, near or far... I thank u God for the GIFT of Friendship. (love) U all know who u are. (love)," suma pa sa gi-post nga photo message ni KC sa Instagram.

Dili na makugang kung naa pa’y molugwa

Ang  abogada ni Vhong Navarro nga si Atty. Alma Malongga   nisaysay nga dili na siya makugang kung duna pa’y laing tawo nga mopasaka og kaso batok sa iyang kliyente. Suma pa ni Malongga   nga hagbay ra nila nga napanglantawan nga pabahaan og kaso ang aktor.

Una nga mi-file sa miaging semana og  kasong rape si Margarita Fajardo batok kang Vhong ug mao na kini ang ikatulong kaso nga giatubang niini.

Suma pa niya nga nagkaduol na pagpagawas og resulusyon sa Department of Justice sa  kasong illegal detention nga gipasaka ni Vhong ngadto kang Cedric Lee ug sa grupo niini nga nangulata sa aktor.

Gituohan niya nga duna gihapo’y kalabotan si Cedric sa mga kaso nga gipasaka batok kang Vhong.

Una na nga nipasaka og kasong rape batok sa aktor sila si Deniece Cornejo ug  Roxanne Cabanero.

Cliff Hogan ang iyang ngalan

Nagbasketball siya sa nilabay nga tuig didto sa Project 6, Quezon City diin atua usab ang iyang residensya dihang nakit-an siya sa iyang kasamtangang manager ug maoy nidasig kaniya aron musalmot sa Ka Lookalike segment sa It’s Showtime. Usa ka bulan na ang nilabay, aksidente usab siya nga nakit-an ni mommy Rose Gaisano sa ‘Walang Tulugan” ni German “Kuya Germs” Moreno sa GMA7, hinungdan nga gidapit siya aron mamahimong celebrity guest kauban si Joem Bascon alang sa pagbola sa “A Million Thanks” promo sa Gaisano Inc., diin nagpahigayon sila og mini-show sa Gaisano Balamban Town Center ug Country Mall. Siya mao si Cliff Hogan, 17-anyos ug gipapirma na og lima ka tuig nga kontrata sa Viva Artist Agency.

Michael John Hogan  ang tinuod niyang ngalan, apan kay paborito man sa iyang co-manager nga si Tom Madrales ang actor kaniadto nga si Cliff Richards, gihimong Cliff Hogan ang iyang showbiz name. Dihang nakit-an siya ni Madrales nga nag-basketball, gitanyagan siya nga himuong artista. Dali nga nakahukom si Hogan, sanglit ang iyang ig-agaw kaila man usab ni Madrales gumikan kay modelo man kini ug lakip sa mga talents sa casting agency sa nahisgutang manager. Si Madrales maoy nakadiskubre kaniadto kang Jennylyn Mercado.

Human siya nahimong finalist sa nahisgutang It’s Showtime contest, nagsunod-sunod na ang mga proyekto ni Hogan, lakip na niini ang TV commercials. Ang iyang kontrata sa Viva naglakip sa pelikula ug recording. Gani gitakda na siya nga mag-record sa iyang kaugalingon nga album sa dili madugay. “Justin Bieber of the Philippines” ang tawag kaniya sanglit ang nahisgutang international pop sensation ang iyang gisundog pagsalmot niya sa It’s Showtime. Apan karon nga nasulod na siya sa showbiz, buot niyang maila na gayud isip Cliff Hogan. “I’m going against the Justin similarity because I want to have my own image,” nagkanayon siya dihang nahinabi sa pipila ka mga sakop sa E-Group (Cebu Entertainment Group) niadtong Sabado sa udto diha sa Lighthouse Restaurant Mango.

Inglesero kaayo si Hogan sanglit Amerikano ang iyang amahan ug mao matud pa kini lengwahe nila sa ilang panimalay. Apan gipaniguro niya nga lareno siya og tagalog busa dili kini mamahimong problema sa iyang umaabot unya nga mga proyekto.  “My mom passed away two years ago due to breast cancer. I live with my dad now. I have a younger brother,” asoy pa niya.

Suma pa ni Madrales nga hayan ang sequel sa gikagubtan karong “Diary ng Panget” starring James Reid ug Nadine Illustre maoy mamahimong unang pelikula ni Hogan. Si Madrales nga konektado sa Viva niingon nga aduna nay plano alang sa sumpay sa maong pelikula gumikan kay nindot kaayo ang feedback niini sa mga sinehan. Kahinumduman nga ang maong pelikula nga kinutlo sa sikat nga libro nga unang namantala sa Wattpad.com, nihipos og P22 million opening day gross sa nilabay nga semana.