CEBU, Philippines - Kun dili pa, ayaw kabalaka kay aduna ka pay kahigayonan karong bakasyon, kauban ang upat ka mga host sa MagTV Na! sa ABS-CBN-Cebu.
Sila si Blinky de Leon, Phoebe Kaye Fernandez, Jonathan Cimafranca ug Borgie Cabigas, kauban ang mga banggiitan sa natad sa fashion, cinema, ug personality development, aron ihatod diha kaninyo ang SELFI! Ang SELFI o Self-Efficiency Learning Formation Institute, usa ka workshop nga mutabang sa mga tinun-an pagkaplag unsa gayud ang ilang matuod nga talento ug aron mapalambo nila ang ilang mga potensyal.
Saysay ni de Leon ngadto sa mga sakop sa E-Group (Cebu Entertainment Group) atol sa usa ka paniudto nga iyahang ideya sa sinugdanan ang mupasiugda og workshop, ilabi na sa natad sa modeling ug make-up. Apan nakahunahuna siya sa iyang mga co-host, busa iyang gipangutana kun interesado ba usab sila. Positibo ang iyang nadawat nga tubag, hinungdan nga naghugpong sila ug maoy hinungdan nga nahimugso ang SELFI.
Gipadayag ni de Leon nga makatabang kaayo ang SELFI gumikan kay pinaagi niini masabtan gayud nimo unsay imong kapasidad. Gibalikan sa nahisgutang mga host ang panahon nga nagsugod pa lamang sila sa industriya, nga wala silay formal training sa hosting ug gideretso lamang sila paghungit ngadto sa camera.
Nasayran nga si de Leon gradwado og Psychology, si Fernandez Registered Nurse, si Cimafranca Accounting ug si Cabigas Education.
Pinaagi sa SELFI, makakat-on ang estudyante kabahin sa TV Hosting, Modeling, Dancing, Make-Up, ug Acting. Ang upat ka mga hosts maoy mudumala sa hosting,ug modeling, si Cimafranca sa dancing, si Fernandez sa acting ug si de Leon sa make-up. Dugang pa niini, adunay mga mentors nga maggikan dinhi sa Sugbo ug Manila nga mutabang aron mas makakat-on pa ang mga estudyante.
Pasabot ni Fernandez nga kinahanglan nga ang tibuok package gayud maoy imong kuhaon gumikan kay anha nimo mas mailhan ang imong kaugalingon. Paambit pa niya nga sila kaniadto wala magdahom nga mamahimo silang host, gumikan kay dili konektado ang ilang mga kurso sa media ug lahi usab sila og hilig.
“It’s being able to face the world. It’s about you being confident to project yourself to other people, bisan asa pa,†hulagway pa ni Fernandez kabahin sa SELFI.
Dugang pa niya, “Nagsugod mi nga wala gyud mi kahibawo unsa among potential, so kami, makarelate gyud mi.â€
Usa ka bulan nga mulungtad ang SELFI o 12 sessions nga mulungtad og tulo ngadto sa upat ka oras ang matag session. Dose ngadto 25 anyos ang mamahimong mu-enroll niining maong workshop nga magsugod na karong April 21.
Samtang ang Executive Producer sa MagTV Na! Adrian Dionzon niklaro nga gisubay gayud nila ang proseso ug wala silay special treatment nga nadawat. Alang sa dugang kasayuran kabahin sa SELFI tawag niining maong mga numero: 09163337592 or (032) 5841797. (BANAT NEWS)