Gov. ng Bataan idinenay si Kris!

Mukhang wala namang katotohanan ang mga tsismis na nag-uugnay kay Kris Aquino at  sa guwapong gobernador ng probinsiya ng Bataan. Kapag tinatanong ang binata, ayon sa aming source, ang laging sagot nito ay, “tsismis lang ’yun,” sabay tawa.

Nasagap din namin ang balita mula sa mga taong malapit sa gobernador na nagpasama lang si Kris sa kanya para pumunta sa isang resort sa Bataan sa parehong araw na nag-shoot ang mga ito roon. Bilang isang opisyal ng lalawigan, pinaunlakan naman niya ang hiling ng TV host-actress.

Laking gulat pa nga raw ng gobernador nang biglang pauwiin ni Kris ang iba pang mga kasama niya ng araw na iyon, kabilang ang mga taga Kris TV co-host at crew, pati na ang kanyang mga security detail. Pagkatapos noon, sumabog na nga raw ang tsismis tungkol sa dalawa.

Nagpaigting sa tsismis ang mga makahulugang posts ni Kris sa kanyang Ins­tragram account tungkol sa isang taong nagpapaligaya sa kanya sa mga panahong ito. Ang gobernador na nga ang pinagbibintangang “boyfriend” umano ni Kris.

Cesar pinapag-Andres Bonifacio uli

Ang aktor na si Cesar Montano ay kilala sa makabuluhang pagganap bilang Jose Rizal at Andres Bonifacio.

Kaya nga’t hindi nakapagtataka na siya ay makatanggap muli ng offer para gumanap uling Andres Bonifacio sa isang bagong proyekto na ididirek daw ng baguhang si Enzo Williams mula rin sa isang first-time producer. Ang plano ng mga producer ay isali ang naturang pelikula sa 2014 Metro Manila Film Festival (MMFF).

Sa ngayon ay hindi pa natatapos ang mga negosasyon sa pagitan ng kampo ni Cesar Montano at ng producer. Sinabi ni Cesar na hindi pa sigurado pero kinumpirma niya ang naturang offer sa kanya.

Dahil sa lungkot sa buhay, actor-singer tuloy ang pagpapatalo sa casino

Totoo kaya ang mga balitang muling natalo ng mahigit sa P400M ang actor-singer na ito sa casino kamakailan? Totoong mayaman na ang actor-singer na ito subalit nakakalungkot pa rin ang mga balita dahil para namang nawawalan ng kabuluhan ang mga pinaghirapan niyang salapi.

Totoo siguro ang sapantaha ng marami na kaya siya nalululong sa casino ay dahil malungkot ang kanyang personal na buhay.