Seguradong maukay

CEBU, Philippines - Si Anne Curtis maoy nagpili sa iyang mga kantahon sa umaabot niya nga concert karong Mayo 16 sa Araneta Coliseum nga nag-ulohan og : The Forbidden Concert - Annekapal. Gibutyag sa aktres nga seguradong maukay ang mga tawo sa iyang performance.

Vhong mihangyo

Giingong si Vhong Navarro ang dili musugot nga makauban niya si Ellen Adarna sa umaabot niya nga pelikula busa gipangitaan na lang siya og laing leading lady. Dili matud pa komportable si Vhong kang Ellen gumikan kay higala matud pa niini ang grupo ni Cedric Lee nga maoy nangulata kaniya.

Kris nakahilak

Giangkon ni  Kris Aquino nga nakahilak gyud siya sa pelikulang  "Starting Over Again" sa Star Cinema. Kauban ni Kris sa paglantaw niini mao ang usa sa mga bida sa maong pelikula nga si Toni Gonzaga.

First time

Gikalipay pag-ayo ni  Ejay Falcon ang  unang biyahe niya sa Amerika. Si Ejay ang special guest ni Vice Ganda sa show niini  didto sa Los Angeles, California.

Dili magpaapekto

Mobasa na og mantalaan sila si  Sen. Bong Revilla, Jr. ug  Congresswoman Lani Mercado gumikan kay ila na nga gisaad sa ilang kaugalingon nga dili sila magpaapekto sa mga isyu nga gibato kanila.

Sarah dako’g tsansa

Gipanglantawan nga lig-ong pambato sa favorite video award category sa MYX Music Awards ang awit ni Sarah Geronimo nga nag-ulohan og Tayo. Nasayran nga makadaghan na kini nga higayon nga nabutang sa unang puwesto sa music chart  ang maong kanta.

Loyal sa uyab

Masaligon ang mga bida sa Kambal Sirena nga sila si  Aljur Abrenica ug Louise delos Reyes nga dili gyud sila ma-link sa usa’g-usa gumikan kay susama sila nga dunay mga uyab.  Malipayon si Aljur sa relasyon nila ni Kylie Padilla, samtang nagpungasi usab ang gugma ni Louise ngadto kang Enzo Pineda.

Friendly

Mibahakhak og maayo si Rayver Cruz sa wala'y hunong nga pagduda sa ubang mga tawo nga matud nagbalik sila ni Cristine Reyes. Suma pa sa aktor nga friendly lang gyud siya nga pagkatawo busa dili unta angayan hatagan og malisya kung masigpatan sila ni Cristine nga mag-uban.

Gabaha ang product endorsements

Gawas sa pagama og album, nagbaha usab ang umaabot nga product endorsements  sa  X-Factor Israel winner nga si Rose Fostanes.  Pahimuslan ni Rose ang higayon  samtang humot pa ang iyang pangalan sa publiko.

Kaye sa Carmela

Ang seryeng Carmela nga gibidahan ni Marian Rivera maoy labing una nga proyekto sa bag-ong talent sa GMA nga si Kaye Rivera (kanhi K-La). Wala pa gitino sa GMA kung duna ba'y tsansa nga makauban sa usa ka proyekto ang giingong uyab niya nga si Tom Rodriguez.

Tsismis lang

Gihimakak sa PBB Teen Clash winner  nga si James Reid ang taho nga matud pa duna siya'y attitude busa mihawa siya sa  Star Magic ug nitikang dayon sa  Viva Artists Agency. Una na nga gipadayag ni James nga duna la'y kalambigitan sa gusto sa mahitabo sa iyang career.

Taas og exposure

Gikatahong taas ang exposure ni Krista Miller sa Rhodora X. Si Krista maoy babaye nga na-link niadto kang Cesar Montano.

Mahal ra pud

Gihimakak ni Karla Estrada ang nitumaw nga taho nga matud pa P40 million ang kantidad sa balay nga gipatukod sa iyang anak nga si Daniel Padilla. Suma pa ni Karla nga dako ra pud kaayo ang maong kantidad.

Daghan pa og agian

Giangkon ni Julie Anne San Jose nga maulaw siya sa higayon nga nganlan siya og sumusunod nga  Songbird nga maoy kasamtangang titulo ni Regine Velasquez. Suma pa ni Julie Anne nga daghan pa kaayo siya og agian busa dili na lang siya maghuna-huna niini.

Laing rape victim?

Lain na sab matud pa nga babaye ang gitakda nga muduso og reklamong rape batok kang It's Showtime host Vhong Navarro.

Kini maoy gipadayag sa beteranong journalist nga si Tony Calvento. Matud ni Calvento, ang kasayuran nga iyang nahagdaw mao nga ang maong babaye gikan sa southern Philippines.

Suma pa ni Calvento nga ang maong babaye adto ra matud pa muduso sa iyang reklamo sa iyang dapit, buot pasabot magsige og larga si Vhong aron pag-atubang sa maong reklamo kun ugaling mapasaka kini sa husgado.

Gumikan niini, nagduda si Calvento nga mugna kini sa mga kontra ni Vhong aron mapugos ang nahisgutan paglugwa gikan sa iyang taguanan karon.

Si Calvento kinsa usa sa mga nitabang kang Vhong niining iyang pagpangita og hustisya, masaligon nga dili maghimpos ang maong mga reklamo ug mabasura lamang.

Kahinumduman nga unang mireklamo nga gilugos ni Vhong mao ang model nga si Deniece Cornejo. Niadtong February 14, giutro niya ang iyang affidavit ug giangkon niya nga kaduha siya ka higayon matud pa nga gilugos ni Vhong.

Niadtong nilabay nga semana ang beauty-queen wannabe nga si Roxanne Cabanero niduso pud og reklamong rape batok kang Vhong. Nahitabo matud pa kini niadtong April 2010.

Sarah ug Annette nahusay na!

Nagkauli  na sila si Sarah Lahbati ug ang president sa  GMA Films nga si  Annette Abrogar human sa nagkadaiyang isyu nga ilang nasugatan sa miaging tuig  ug nahusay na ang duha ka kampo kagahapon sa Philippine Mediation Center.

Gianunsyo kini nila kagahapon sa usa ka restaurant sa  Quezon City uban sa mga opisyales sa GMA-7.

Kahinumduman nga nagkinihaay ang duha sa usa’g-usa nga naglangkob sa kasong libel and grave coercion ug uban pa.

Nangayo og pasaylo si Sarah ngadto kang Annette  gumikan sa mga pulong nga iyang nalitok niadto .

Gikatakda nga muduso si Annete og  motion to dismiss  sa gisang-at niya nga libel case batok ni Sarah karong  March 13 sa  Makati Regional Trial Court -Branch 59.

Nagsugod ang panagbangi human  gipadayag niadto ni Sarah  nga nalambigit matud pa si Abrogar sa "under the table deals" sa GMA Artist Center ug Icons Talent Management.

American Idol Fil-Am pasok sa Top 12

Magpadayon sa  sunod nga  round sa   American Idol (AI) Season 13 ang Fil-Am finalist nga si Malaya Watson.

Kini human nakalusot sa bag-ohay lang nga elimination round sa maong  reality singing competition kagahapon. Sa unang bahin, nakulbaan pag-ayo si Malaya human  nasulod siya sa  Bottom 3 ug nahuwasan dayon kini human gideklarar si Kristen O'Connor nga matangtang sa maong show.

Gawas kang Malaya, nasulod usab sa Top 12 sila si Ben Briley, Alex Preston, Jena Irene, Majesty Rose, Dexter Roberts, Sam Woolf, CJ Harris, Caleb Johnson, Emily Piriz, Jessica Meuse, Malaya Watson ug  MK Nobilette.

Kahinumduman nga giawit niya sa miaging adlaw ang  upbeat song nga  "Runaway Baby" ni Bruno Mars.

"I wanna show that I dont just sing blues or soul. I can sing Gospel (music), I can sing country, I can sing pop, I can sing any genre. I'm not willing to just stick to one small group," nagkanayon si Malaya.

Giangkon niya nga gikulbaan siya og maayo sa pagtungtong niya sa entabaldo apan nawala kini sa dihang nakakita sa mga nawong sa audience nga nahimuot pag-ayo sa iyang performance.

Apan ang hurado nga si  Jennifer Lopez nisaysay nga na-feel niya ang stage presence ni Malaya apan nagtuo nga mas daghan pa og mabuhat ang dalaga.

"I love you, I love your energy. The way you came out here, I felt like I was at the show. You command that stage in a way that a superstar is supposed to command that stage. (But) that wasn't your best vocal performance. We know that you can blow. But still, you're a contender, baby," mensahe pa ni Jennifer ngadto kang Malaya.

Samtang gisaysay pud ni  Judge Harry Connick Jr. nga tataw kaayo nga gikulbaan si Malaya busa nawala kini sa tono sa pipila ka linya niini.

"Again, intonation is huge... it's a discipline to sing in tune. And somehow you're a little bit nervous to me tonight. I can tell. That's going to go away quickly. If she sings it again now, it will be better," matud pa ni Harry.

"Flesh-eating disease" Gabby Lopez gikasab-an ang news team

Hingpit na nga nangayo og pasaylo ang ABS-CBN kabahin sa kabalaka ug kahadlok nga ilang namugna gumikan sa ilang special report  kabahin sa giingong "flesh-eating disease" nga nikatap didto sa Pangasinan.

Nalisang ang publiko sa maong balita gumikan kay gilambigit kini nila ngadto sa usa ka panagna sa giingong "Indian prophet" sa nilabay nga tuig nga aduna matud pay makalilisang nga sakit nga mutakboy ug malisud nga matambalan didto sa nahisgutang lalawigan.

Nabulabog ang maong balita gumikan kay gihimakak kini sa Department of Health. Suma pa sa DOH, psoriasis ug leprosy ang nitakboy sa duha ka mga pasyente nga maoy gibalita sa reporter nga si Jasmine Romero niadtong Martes.

Pagsunod adlaw, sa news program nga Bandila gibarugan sa anchor nga si Julius Babao ang maong istorya pinaagi sa pag-ingon nga igo lamang silang nagbalita ug wala sila’y tuyo nga manghadlok. Gisaway kini sa Center for Media Freedom and Responsibility gumikan kay ang maong balita matud pa tataw nga kalapasan sa 2007 KBP Code of Ethics ug sa mismong Ethical Standards sa ABS-CBN.

Kini gumikan kay "unverified" ug sensational matud pa ang maong taho ni Romero.

Niadtong Huwebes  pinaagi sa Bandila gibasa ni Julius ang apology gumikan sa kabalisa nga namugna sa maong balita. Gibutyag pud niya nga kasamtangang nagpahigayon og pakisusi ang in-house ombudsman sa network kabahin sa maong balita.

Gidungog nga suspendido matud pa si Romero ug ang iyang news team.

Gisapot si Lopez

Labihan matud pang sukua ni ABS-CBN Chairman Gabby Lopez gumikan sa maong balita. Niagi matud pa kini sa newsroom sayo kagahapon ug gikasab-an ang news team nga responsabli sa maong balita.

Dungan niini, gimando ni Ging Reyes, Vice President for News and Current Affairs, nga mupailawom ang pipila nila ka reporters, desk editors ug executive producers  og training. (BANAT NEWS)