CEBU, Philippines - Di lang sa pagbasa og libro ug sa pagtuon sa balaod kahanas ang gipakita sa mga tinun-an sa University of the Visayas Law School kun dili lakip na sad sa pagrampa sa entablado pinaagi sa gipahigayon niini nga Mr. and Miss Law niadtong Sabado sa gabii.
Narayna ang first year law student nga si Mary Angelie Legarde ug migawas nga hari si Zotico Acebis Jr. nga usa sab ka first year.
First Runner up sa Ms. Law si Kristina Bonita Casals nga pambato sa juniors ug second runner up si Kristine Jean Bacala nga usa ka freshman.
Samtang ang first runner up sa Mr. Law mao si Joe Marlo Cabatingan ug second runner up si Realito Bandalan sa fourth year.
Nahugyaw ang Inday Pining Teatro sa tubag ni Acebis dihang gipangutana kini kung unsay iyang mahimo isip usa ka law student sa kahimtang sa nasud karon.
Mitubag si Acebis nga kinahanglan mosunod gyud siya sa balaod ug matud pa niini nga "the man standing in front of you is a law abiding citizen", nga gisundan og pakpak ug syagit sa mga nanan-aw.
Samtang simple ra kaayo ang tubag ni Legarde kung unsay iyang greatest achievement sa iyang kinabuhi, matud pa niini nga ang iyang pag-apil sa Ms. Law maisip niya nga iyang greatest achievement.
Ang midaog sa Ms. ug Mr Law nga puros first year puros sab mga first timers sa pag-apil og pageant.
Ang maong kalihokan gipasiugdahan sa UV College of Law ug personal nga giatiman sa law professor nga si Atty. Jake Cimafranca inabagan sa chairman sa pageant nga si Jeffrey Miñoza.
Ang maong kalihokan nagpamatuod nga dili lang pamalaod kun dili pang beauty pageant sab diay ang mga law students.