Kumusta mga suki sa Banat News IN? Medyo gimingaw na gyud sa pagpadala og tampo dinhi sa Banat In, apan karon nga nakabalik nako sa kahanginan pinaagi sa Barangay RT 99.5 (Nindota Ah!), andam gihapon ko mopaambit og mga nindot nga topic dinhi niining kinaham ninyo nga mantalaan.
Naghinapos na ang buwan sa Pebrero, ug sunod buwan, mao na ang gitawag og panahon sa pagpaso partikular na sa mga tinun-an nga mogradwar na busa karong panahona, makaingon 'ta nga nanimaho na og toga.
Busa alang sa mga tinun-an nga mogradwar na sunod buwan, mao kini ang ginagmay nako nga tips alang kaninyo, apan akong ipasalig , mahimo kini nga importanteng gabayan kaninyo :
1.Antos ginagmay para makalahutay
Kita tanan moagi og kalisod ug pagsuway sa atong kinabuhi. Sa tinud-anay lisod gyud ang kinabuhi, kitang mga tawo masakitan 'ta pero kung magpabilin 'ta nga lig-on kita magmalampuson. Sure ko daghan na kaayo og projects ang buhatunon, ug kadtong naa sa kolehiyo, tig-defend na pud sa thesis, antos lang gyud, hapit na bitaw.
2. Hugot nga pagtuo
Ayaw kahadlok, ayaw pagpadala sa mga pagsuway nga makapugong sa imong pag -asenso. Dili ka magpadala sa mga tawo nga moingon nga kanang butanga, dili kaya nimo. Ang kalibutan daghan og makuha nimo pero ang pagtuo ra gyud ang magpabilin diha kanimo .
3.Kinahanglan nga mo-standout ka
Kitang tanan naay unique gifts ug talents gikan sa Kahitas-an, labing maayo nga ato kining mapakita samtang sayo-sayo pa aron ma-develop kini samtang nagdagan ang panahon. Dapat naa kay imohang personal brand, dapat mailhan ka nga ikaw. Tanan nimo buhaton dapat maka-enhance ug makapanindot sa dagan sa imong life story. Busa buhata ang tanan nimo nga mahimo aron lang gyud ka makapaso ug madawat nimo ang gipaabot nimo nga diploma.
4. Dili pilian
Kadtong naa sa kolehiyo, kasagaran kaninyo ang naa na'y ideya kung asa motrabaho inigkahuman ninyo og paso, samtang ang uban padayon pa nga naghuna-huna. Kung bag-o pa ka ni -graduate, ayaw og demand og dako nga sweldo, ayaw og demand nga hayahay nga trabaho. Atong ibutang sa atong huna-huna nga tanan moagi og proseso. Maninguha 'ta gikan sa ubos para makaabot 'ta sa top spot.
5. Sa makaya lang
Ang utang dili nimo higala, dapat na nimo likayan. Ayaw pugsa kung dili kaya, hinumdumi nga nanarbaho ka para nindot imong kaugmaon, dili kay para makautang ka og daghan. Imong ibutang ang tanan sa alanganin kung mahimo kang over-leverage.
(Madungog si Papa Don Romantiko sa Barangay RT 99.5 gikan sa Lunes hangtud sa Biyernes sa programang Three Play, 3-6pm ug sa adlaw nga Domingo sa pinaagi sa programang Bida sa Barangay, 9-11am)