One of the boys si Eula

CEBU, Philippines - Sa pagsulod pa lang sa tuig 2014,  gisugat si Eula Caballero og dakong proyekto sa TV5 kung diin iyang makauban ang beterano nga komedyante nga si Joey de Leon.

Dili basta-basta ang kasinatian ni Eula ug maisip niya nga nabaid og maayo ang iyang abilidad sa pag-arte ilabi na nga nakatrabaho niya niadto ang maisip nga mga banggiitan sa industriya, sama nila ni Nora Aunor, Maricel Soriano, Eddie Garcia, Lorna Tolentino ug Christopher de Leon.

Nibutyag ang Sugbuanong mananaog kaniadto sa reality-show Star Factor nga naghinam-hinam na siya pag-ayo sa sitcom sa TV5 nga  "One of the Boys" diin siya mao ang taxi driver nga si Gabriella

"Nidala ko sa karakter nga Gabi, medyo boyish akong  karakter, kay bagsikon man ang akong linihokan dinhi. Si Sir Joey maoy amahan nako dinhi, unya dili man siya mahimo ka-work tungod sa iyang sakit busa ako ang nagsilbing family breadwinner," nagkanayon si Eula sa dihang nahinabi sa pipila ka mga sakop sa Cebu Entertainment Press diha sa Lighthouse Mango atol sa pagbisita niini dinhi sa Sugbo dili pa lang dugay .

Gipadayag ni Eula nga dili na bag-o kaniya nga daghang boys ang nagpalibot kaniya gumikan kay sa pagtungha niya  niadto sa  sekondarya sa University of San Carlos-North Campus, lima lang sila ka babaye sa ilang section.

Nagkanayon ang aktres nga nakahibalo na pud siya sa pagpakatawa  sanglit taud-taud na pud siya nga nahimong mainstay sa gag show nga "Tropa Mo Ko Unli".

"My role is basically tough inside, at the same time,her family is kalog despite all the struggles they go through. It's titled 'One of the Boys' because the new group of guys in TV5 called Juan Direction is part of the show," nagkanayon si Eula.

Suma pa sa aktres nga daghan kaayo siya og nakat-onan kang Joey gumikan kay maayo kini mo-adlib.

"Grabe kaayo ka-eksena si Sir Joey kay usahay, dili na siya mag-depend sa script, so kinahanglan nga magbantay-bantay gyud ka aron makatayming ka sa imong lines. Nindot kaayo kay duna gyud kay makat-onan niya," dugang pa ni Eula.

Gikatakdang ipasalida ang "One of the Boys," sunod bulan ug gilangkoban usab kini nila ni  BJ Forbes, Empoy Marquez, Nadine Samonte, James Salazar, Michael McDonnell, Daniel Marsh, Henry Edwards, Brian Wilson, Benjo Leoncio, ug Charlie Sutcliffe.

Layo-layo na og naabtan si Eula sa iyang career, gani nahimo na siya nga kabahin sa tulo ka mga pelikula  nga naglangkob sa Yesterday, Today and Tomorrow," "Shake Rattle and Roll 14," ug "Raketeros."

Aduna pud siya'y kasamtangang gigama sa Regal Films ug wala pa siya'y ideya kung kanus-a ang playdate niini.

Nag-ulohan kini og 'Ride To Love' ug ubos sa direksyon ni  Adolf Alix, Jr. kinsa busy pud sa pagsalmot og mga international film festival.

Nagka-sexy na karon ang panamit ni Eula ug giklaro sa dalaga nga naa na siya saktong edad busa dili na kini big deal apan giklaro niya nga dili pa siya andam mo-pose sa sexy magazine.

"Realistically, I'm no longer in the teeny-bopper category, since I'm already 18. Filipino audiences want more out of actors, and not just what they often see. So little by little, I start to level up and mature. I can't always be the cute and shy type. But on the note of going sexy or posing for men's magazines, definitely not yet," saysay pa ni Eula.