MANILA, Philippines - Para sa mahihilig kumain sa labas, madalas ay pahirapan ang maghanap ng healthy, well-balanced meal.
Kaya naghanap ang Pop Talk ng mga kainan na magbibigay ng better, healthier food choices. Alin kaya sa mga ito ang pop o flop?
Isasalang sa pagrerebyu ang Green Pastures sa Shangrila Mall na 100% organic daw ang mga pagkain. Dadayuhin din ang Nuezca Cafe sa UP Village, Quezon City na sa sariling farm naman kumukuha ng mga sangkap. Pangatlo ay ang Likha-Diwa Cafe sa Krus na Ligas, Quezon City na seafood at chibog na pang-vegetarian naman ang panghatak sa tao.
Makakasama ni Tonipet Gaba sa pagrerebyu ang model, TV host, at blogger na si Patty Laurel, ang daddy na naghahanap ng healthier options na si Niko Castro, at ang celebrity reviewer na foodie, TV host at book blogger na si Lyn Ching-Pascual.
Huhusgahan nila ang tatlong healthy food restos sa criteria na ’food’, ‘place’ at ‘price.’
Kain na at makireview sa Pop Talk: Healthy Food Restaurants, ngayong Martes, 10 p.m. sa GMA News TV.