Be Careful fans maoy pabut-on

CEBU, Philippines - Siguradong magmaya gyud ang mga lunod-patay nga nagsunod sa sikat kaayo nga tanghaliserye sa ABS-CBN, Be Careful with my Heart nga gibituonan nila Richard Yap a.k.a Ser Chief ug Jodi Sta. Maria a.k.a. Maya.

Kini tungod kay wa pa gyuy klaro kun kanus-a matapos ang maong teleserye nga karon milanat na og kapin sa usa ka tuig.

Sa pakighinabi sa mga sakop sa Cebu Entertainment Group (E-Group) sa duruha niadtong Sabado gitug-an ni Richard nga wa pa usab sila pahibaw-a kun kanus- a gayud kini matapos, ug posibleng hangtud kuno nga gusto pa sa ilang mga fans ang ilang teleserye naa ra gihapon sila.

Suma pa ni Richard nga ang estorya sa Be Careful wa man lang magtuyok nilang duha ni Maya, kundili apil pud sa mga teenager niya nga mga anak sa estorya ug sa pamilya sa iyang asawa.

Ang ilang kasuod ni Jodi matud pa ni Richard maoy usa sa rason nga dili na sila kiwaw sa paghimo sa ubang mga eksena sama sa kanunay nga paggunitay sa kamot ug ilabi na sa ilang mga kissing scene.

 "Nasanay na kami, wala nang malisya sa ginagawa namin. Ginagawa lang namin ang trabaho namin. Yan po ang rason na marami ang nakilig sa amin," matud pa ni Richard.

Kabahin usab sa giplanohan nga movie nila ni Maya, suma pa ni Richard nga dili pa gyud ni mahitabo karong tuiga gumikan sa ka busy sa ilang mga schedule diin ka upat sa usa ka semana ang ilang taping ug pun- an pa sa ilang mga world tour.

Apan bisan pa sa ka hectic sa ilang schedule gisiguro gihapon ni Richard  nga maka bonding ang iyang pamilya ug gani niadtong Pasko ug Bag-ong Tuig didto sila sa iyang pamilya sa Dubai.

"Sa isang linggo, apat na araw ang taping namin, kaya nag-enjoy ako sa bakasyon kasi kasama ko yung pamilya ko," dugang pa sa aktor.

Samtang  gihisgutan  usab ni Richard  ang isyu kabahin sa pasangil sa usa ka blogger nga matud pa  gigamit nilang negosyo ang ilang mga fans tungod kay matud pa dili siya magpa-picture kun way regalo. Suma pa niya dili tinuod ang maong pasangil ug gani siya pa man ang mobalibad sa iyang mga fans nga magdala og regalo.

"Hindi ko na lang pinansin ang isyu na yan. May mga tao talaga ang gustong manira ng tao. Pagpasok ko sa showbiz, hinanda ko na ang sarili  ko sa mga intriga," nagkanayon si Richard kinsa nagtagalog niadtong tungora sanglit katupad niya si Jodi.

Silang Ser Chief ug Maya mianhi sa Sugbo niadtong Sabado alang sa ilang pagsalmot sa Kapamilya Caravan sa Sinulog Grand Parade kauban silang Piolo Pascual, Maja Salvador ug John Lloyd Cruz

Dungan niini, gibutyag ni Richard nga nakatungha siya og  duha ka tuig sa Velez College  sa kursong Medtech , sa wala pa siya nilayat sa kaulohan diin nikuha siya og kursong management. "Kalit ra man tu nasulod sa akong huna-huna nga mobalhin og course kay naa na man gyud na sa akong huna-huna nga mag-negosyante," suma pa sa aktor.

Dugang pa ni Richard nga nagpuyo siya  sa una sa dalan  B-Rodriguez sa usa ka exclusive nga village.

"Magbisitihan gihapon ko sa Cebu, kay naa man dinhi akong brother ug uban nako nga relatives. Grabe gyud ang pagsuporta nila sa serye namo ni Jodi," nagkanayon si Richard…Dugang taho ni Sanden J. Anadia (BANAT NEWS)