CEBU, Philippines - Gawas sa usa ka beteranang aktres gikan sa laing network, giingong makauban usab ni Dingdong sa umaabot niya nga project sa GMA- 7 mao si Carla Abellana. Dili pa hinuon matino sa maong network kung kanus-a kini masugdan.
Nahilom
Giangkon ni Jessy Mendiola nga mihinay ang dagan sa komunikasyon nila ni Sam Milby gumikan sa ilang ka-busy. Giklaro hinuon sa aktres nga wala kini nagpasabot nga nagkahanap ang tsansa ni Sam kalabot sa pagdiskarte niini kaniya.
Depende sa sitwasyon
Gibutyag ni Rica Paralejo nga iyaha una nga atimanon ang iyang anak nga bag-o pa lang niya nga gihimugso busa dili pa siya kaistorya kung kanus-a siya mobalik sa showbiz. Nasayran nga taud-taud na nga gitanyagan og projects si Rica sa ABS-CBN.
Mosuwat gihapon
Gibutyag ni April Boy Regino nga bisan moretiro na siya sa iyang pagka-singer, padayon gihapon siya sa pag-compose og mga kanta. Bisan naayo na si April Boy sa sakit niya nga prostate cancer, mobiya na gyud siya sa pagkanta aron mahatagan og saktong pahuway ang iyang lawas.
Maricel mobalhin sa GMA?
Gidungog nga gidawat ni Maricel Soriano ang tanyag sa GMA-7 nga usa ka drama series . Matud pa nga sa miaging tuig pa nangulitawo ang GMA-7 ngadto sa diamond star.
Alyssa tsugi sa Startalk
Gitangtang na isip co-host si Alyssa Alano sa showbiz talk show nga Star Talk sa GMA-7 nga makita na matag Domingo sugod karong Enero 26. Ipahimutang si Alyssa sa mga drama series.
Regine wala magpabayad
Wala nagpabayad si Regine Velasquez sa pagkanta niya sa Believing In Me nga gipahinungod ngadto sa mga magtutudlo. Ang igsuon niya nga si Cacai Mitra ug ang bana niini nga si Raul maoy nagama sa maong awit.
Requirement ni Carla
Tsika pa ni Carla Abellana nga kung makahukom na gani sila ni Geoff Eigenmann nga magpakasal, kinahanglan nga makapalit na sila daan og balay aron ma-feel dayon nila ang kaminyuon inigkahuman sa kasal.
Dili gyud magpa-retoke
Tsika pa ni Bianca King nga bahala og gamay siya og boobs, wa gyud mosantop sa iyang huna-huna nga magpa-retoke. Suma pa sa aktres nga mahadlok siya sa bati nga epekto niini sa iyang panglawas busa dili gyud siya mosulod sa maong butang.
Ryan mosulod sa Bubble Gang
Kung mapahimutang na ang schedule ni Ryan Agoncillo, posibleng mosulod siya sa Bubble Gang gumikan kay gimingaw na siya og maayo sa pagpakatawa . Gawas sa maong gag show, hapit na usab sugdan ang lain niya nga show sa GMA News and Public Affairs .
Venus Raj maoy hulip ni Solenn
Sanglit kasamtangang nagbakasyon si Solenn Heussaff, si 2010 Miss Universe 4th runner-up Venus Raj maoy mulugwa karong gabii isip host sa lifestyle show Fashbook sa GMA News TV.
Ihatud ni Venus ang hottest fashion news lakip na ang Sugod Closet diin ipakita ang mga closet sa kinatibuk-ang Kramer family. Padayunon usab sa magtiayong Doug ug Cheska Kramer ang mga viewer sa ilang maanindot nga balay.
Sa wala pa nilarga, nagbilin si Solenn og instructional video kabahin sa top make-up trends sa 2014. Sayri unsa kini.
Ipakita pud sa Fashbook ang premiere sa labing bag-ong pelikula ni Solenn, Mumbai Love. Usa kini ka romantic comedy nga gihimo didto sa Manila ug sa Mumbai ug magpakita sa duha ka mga mabulukong kultura.
Kining tanan ug daghan pa ang pambato sa Fashbook karong gabii, paghuman sa State of the Nation (SONA) ni Jessica Soho. (BANAT NEWS)