CEBU, Philippines - Ayaw Ako'g Biya-i, kay Maglaylay Ko sa Bukid tungod kay I love Cebu. Kining maong linya nagsalamin sa titulo sa tulo ka mga mananaog sa ika-34th nga Cebu Popular Music Festival sa miaging gabii.
Si Jacqueline Bual mao ang napili nga Best Interpreter sa iyang kanta nga mokumot sa imong dughan, ang Ayaw Ako'g Biya-i. Ang maong kanta usab ang migawas nga mananaog sa Ballad Category.
Si Bual, kinsa labing unang Sinulog Idol grand winner sa Sugbo nga nahinabi sa Banat Hugyaw namahayag nga wa siya nagdahom nga siya ang modaog gumikan kay napagaw siya sulod na sa usa ka bulan ug iyang gihalad ang maong kanta kang Señor Sto. Niño ug alang sab sa iyang inahan nga magbirthday.
Ang lyricist sa maong kanta nga si Jade Castro miingon nga ang maong kanta nagsilbing theme song na sa iyang kinabuhi. Miingon si Castro nga ang iyang sister-in-law ang nagdasig kaniya nga mohimo sa maong kanta niadtong 2007, apan niadtong 2011 nagbuwag sila sa iyang asawa.
Samtang ang Composer sa I love Cebu nga si Russel Alegado nga midaog sa Upbeat Category miingon nga sulod sa walo ka tuig nga pag-apil niya sa Cebu Pop karon pa gyud siya nakadaog.
Ang interpreter sa maong kanta nga sila si Rachelle Mae Faelnar, Rovee Marie Fernandez, Jem Keziah Felicilda ug Fidel Cascabel kinsa mga produkto sab sa Sinulog Idol wala usab makatuo nga midaog sila gumikan kay daghan kaayo ang mga banggiitang singers nga nangapil. Si Faelnar maoy ikaduhang Sinulog Idol grand champion sa Sugbo.
Ang Laylay sa Bukid nga gitagik ni Yoojin Raye Burgos ug gi-compose ni Ronil Vincent Watin ang migawas nga mananaog sa Folk/Country and Novelty nga category.
Wa magtuo si Watin nga mudaog ang maong kanta ug matud niya nga iyang inspiration mao ang kamingaw sa bukid.
Matud pa sa lyricist nga si Yoojin nga didto niya gibuhat sa ibabaw sa bukid samtang naghulat sa iyang mga trainee sa volleyball. Ika-upat na kini ka tuig nga miapil si Burgos ug unang higayon kini nga nakadaog siya.
Si Rivianne Rose Cabaluna nga maoy interpreter nipaambit "pag-announce nindot kaayo sa feeling." Sumala pa niya nga mas nindot ang Cebuano kay "livelier ang message mas motuhop kay makasabot man ta tanan."
Samtang gawas kang The Voice of the Philippines Eva delos Santos ug Archie Marcial, nitungtong usab sa entablado ang Crystal Voice of Asia nga si Sheryn Regis kansang performance nakapahinam og maayo sa mga nanan-aw.