CEBU, Philippines - Gihugopan pag-ayo ang concert ni Daniel Padilla dinhi sa Sugbo niadtong Huwebes sa gabii sa Waterfront Cebu City Hotel and Casino sa Lahug, kung diin pipila sa iyang fans ang nakuyapan.
"Marami pong salamat sa lahat ng mga nanood. Sana magkita-kita po tayo muli. Salamat, Cebu!," mensahe pa ni Daniel ngadto sa iyang fans.
Startalk ibutang sa Domingo
Himoong Domingo matud pa ang timeslot sa showbiz-oriented talk show sa GMA nga Startalk, nga kasamtangang malantawan matag Sabado sa hapon. Suma pa sa report sa PEP nga himoon kini sa daling panahon. Wala pa matino kun direkta ba kining ipasungag sa Buzz ng Bayan.
Sports channel na
Sugod karong adlawa,Sabado, tawagon na og ABS-CBN Sports & Action ang Studio 23. Gihimo na kini og sports channel sa Kapamilya network nga malantawan sa free TV.
Pag-sure uy!
Gibutyag ni Nora Aunor nga dili siya angayan mahimong National Artist gumikan kay daghan pa nga mga artista ang haom sa maong titulo. Gibutyag kini sa aktres human nikisaw ang mga istorya nga matud pa nga himoon siya nga National Artist.
Divorced na gyud
Nagmaya og maayo ang komedyanteng aktres nga si Ai-Ai delas Alas gumikan kay opisyal na sila nga divorced sa iyang kanhi partner sa kinabuhi nga si Jed Salang. Suma pa sa aktres nga korte sa Las Vegas maoy nikumpirmar sa ilang istado . Kahinumduman nga nagbuwag ang duha human wala na makaaguwanta si Ai-Ai sa batasan ni Jed nga matud pa mangulata kaniya.
Bag-ong timeslot
Malantawan na sa dili madugay gikan sa Lunes hangtud sa Biyernes sa hapon ang programang Showbiz Police sa TV5. Nasayran nga matag Sabado lang kini malantawan apan dunay mga viewers nga nabitin sa ilang gihisgotan.Sila si Cristy Fermin, Direk Joey Reyes, Raymond Gutierrez, Divine Lee ug MJ Marfori ang hosts niini.
Paninguha gyud Coco!
Paninguhaon gyud ni Coco Martin nga dili siya makulbaan kung ka-eksena na niya si Nora Aunor sa pelikulang Padre De Pamilya. Una na nga gipadayag sa aktor sa pagsulod pa lang niya sa showbiz, pangandoy na gyud niya nga makauban sa project ang superstar nga si Nora busa gikalipay niya og maayo nga magkauban sila sa pelikulang Padre De Pamilya.
Tinagoan nga talento
Mahiligon pud diay si Marian Rivera sa painting ug mao kini taud-taud na niya nga gitagoan nga talento. Karon panahona, maglisod pa siya sa pag-paint gumikan sa ka-busy sa iyang career apan gipasalig sa aktres nga banhawon gyud niya og balik puhon ang mao niya nga abilidad.
Tak-om
Molihay si Sef Cadayona kung pangutan-on kalabot sa pelikula niya nga Kaleidoscope World nga wala mo-click sa miaging Metro Manila Film Festival 2013. Giingong nangiwit sa takilya ang maong pelikula kung diin kauban niya niini ang iyang ex-girfriend nga si Yassi Pressman.
Robin nagpadungog-dungog
Gipaabot nga moretiro si Robin Padilla sa showbiz ug gipasumbingay kini sa aktor sa programa ni Anthony Taberna nga Tapatan Ni Tunying. Suma pa sa aktor nga samtang nagkataas ang edad sa artista, nagkagamay usab ang talent fee niini.