CEBU, Philippines - Giimbitar og balik si Charice sa programang The Ellen DeGeneres Show didto sa Amerika. Niadtong 2007 ang katapusang paglugwa sa singer sa maong programa. Malipayon nga gibutyag ni Charice nga duna siya'y world tour karong tuiga busa dili tinood ang tsismis nga nagkalaos ang iyang career.
Dennis mobalik sa Dos?
Kutob na lang karong buwana ang kontrata ni Dennis Trillo sa GMA-7 ug niulbo ang taho nga matud pa mobalhin siya sa ABS-CBN ug ang pelikula niya sa Star Cinema maoy usa sa mga proyekto nga nagpaabot na kita. Kahinumduman nga nagsugod si Dennis sa ABS-CBN isip sakop sa Star Circle Batch 10.
Kapalaran ni Jen
Tsika pa ni Jennylyn Mercado nga wala pa gyud siya kasuway nga gihagad og pakasal sa mga lalaki nga niagi sa iyang kinabuhi. Kapila na kahigayon nga natsismis niadto nga magpakasal sila sa kanhi niya uyab nga si Luis Manzano, apan giklaro ni Jennylyn nga wala gyud nila kini mahisguti.
Avril motikang sa Pilipinas
Mobalik si Avril Lavigne dinhi sa Pilipinas karong February 17 alang sa iyang concert sa Smart Araneta Coliseum. Si Avril maoy nagpasikat sa awit nga Complicated.
Shode kulba
Trabaho lang ug dili angayan nga makulbaan, mao kini ang gipadayag sa bida sa Kambal ng Sirena nga si Louise delos Reyes sa dihang nasayran niya nga si Anne Curtis maoy bida sa Dyesebel sa ABS-CBN. Dili maghuna-huna si Louise og kompetisyon aron dili maapektohan ang iyang trabaho.
Melai mitingog na
Gibutyag ni Melisa "Melai" Cantiveros nga mobalik siya sa Banana Split inigkahuman niya og panganak. Gipadayag kini sa komedyanteng aktres human nabalaka ang iyang fans sa nigawas nga tsismis nga matud dili na siya mobalik sa maong programa gumikan kay mo-focus na siya sa pag-atiman sa iyang anak. Nagkanayon si Melai nga gikinahanglan gyud nga mobalik siya sa showbiz aron padayon siya nga makasuporta sa umaabot nila nga anak ni Jason Francisco.
Espesyal nga biyahe
Gisuroy si Yasmien Kurdi sa iyang bana nga nga si Rey Soldevilla, Jr. sa nagkadaiyang dapit sa Pilipinas ug private plane ang ilang gisakyan. Espesyal kaayo ni Yasmien ang maong biyahe gumikan kay ang iyang bana maoy piloto.
Bong mibisita sa ABS-CBN
Giingong nakigtigom sa miaging semana si Sen. Bong Revilla Jr. uban sa pipila ka mga opisyales sa ABS-CBN. Wala hinoon mohatag og detalye ang kampo sa senador kung unsa ang gihigustan sa maong tigom busa niulbo ang mga pagduda nga gitanyagan ang senador og proyekto sa ABS-CBN. Kasamtangang makita si Bong sa programang Kap's Amazing Stories sa GMA-7.
Todo ang pag-adjust
Gibutyag ni Bea Alonzo nga dili basta-basta ang umaabot niya nga serye sa ABS-CBN nga "Sana Bukas Pa Ang Kahapon" gumikan kay tulo ang iyang gidala nga karakter. Todo ang pag-adjust nga pagabuhaton ni Bea sa iyang pag-arte. (Sanden J. Anadia)
Dedma lang
Gidedma ni Maja Salvador ang mga panginsulto nga iyang nadawat nga matud pa maka-relate siya sa iyang karakter sa seryeng The Legal Wife. Nasayran nga sa maong serye, makigtigi si Maja kang Angel Locsin sa kinabuhi ni Jericho Rosales.
Erik mihimakak sa report
Gihimakak ni Erik Santos ang mga tsismis nga matud pa iyahang gidiskartehan si Angeline Quinto. Gipasalig ni Erik nga iyaha ra nga isugilon sa kadaghanan kung mahitabo man kini.
Suwerte sa serye
Igo lang mikatawa si Coco Martin sa sugyot sa pipila ka mga himantayon nga matud pa nga mo-focus na lang siya sa mga serye gumikan kay kanunay siya nga magmalampuson niini. Dili sama sa iyang mga pelikula nga gasige lang og ka-flop.
Dili makadawat ni Willie
Nakaangkon na og daghang followers ang noontime show sa ABS-CBN nga It's Showtime busa ubay-ubay ang niisa nga mga kilay sa dihang nigawas ang report nga matud pa intresado mobalik si Willie Revillame sa maong network.
Jake giatngan og proyekto
Mihinay-hinay na si Jake Cuenca sa pagsige og laag gumikan kay inigkahuman sa Maria Mercedes giingong aduna na pu'y laing proyekto ang nagpaabot kaniya ug pun-an pa sa naglinya niya nga mga pelikula.
34th cebu pop
Sa labing unang higayon sa kasaysayan sa labing dako nga bangga sa pagmugna og kanta sa Sugbo nga mao ang Cebu Popular Music Festival, mabahin na ngadto sa tulo ka kategorya ang indigay. Kini maglakip na sa Upbeat and Dance Music, Folk/ Country/Novelty ug Pop Ballad/Ballad. Adunay upat ka mga komposisyon sa matag kategorya, hinungdan nga 12 gihapon ka entries ang magtigi alang sa 34th Cebu Pop diha sa New Cebu Coliseum karong Biyernes sa gabii, January 17. Ang Cebu Pop tinuig nga halad ni kanhi kongresista Eddie Gullas ngadto sa mga Sugbuanon dungan usab sa pagpasidungog kang Señor Sto. Niño atol sa kapistahan niini. Nasinati na na ang upat ka entries sa "Novelty" category nga mao ang, 'Sakay Na Kamo", "Baha," "Laylay Sa Bukid" ug Limpya Butas.'
Karon ari na kita sa Upbeat category pinaagi niining unang duha ka mga entries:
CEBOOM
I
Katawhan, katilingban
Yano'g inilang ngalan nag-ambahan
Sa gimithi nga kalamboan
'Ning yutang bulahan puno sa katumanan
Uban ni San Pedro Calungsod
Ki'ng awit ipadungog
Agi'g pagyukbo ug pasidungog.
Chorus:
Ceboom, Ceboom, Ceboom
Katahom sud-ungon
Ceboom, Ceboom, Ceboom
Hiyas nga masidlakon.
II
Kulturang adunahan
'Ning isla'ng naghugyaw sa kadaugan
Bantugan sa tibuok kalibutan
Daw paraiso nga anindot puy-an
Ki'ng dakbayan ta'g lalawigan
Matahom nga talan-awon
Garbo kini sa mga Sugbuanon.
Bridge:
Bililhong kabilin nga dili ta igkabaylo
Madanihon, maabi-abihon,ug mauswagon ta'ng Cebu
Tungod sa kalampusang naangkon
Kaniadto ug karon, saulogon.
Coda:
Ceboom, Ceboom, Ceboom.
LAKAT, PANGINABUHI
I
Matag sayo sa kabuntagon
Si tatay ug si nanay mobangon
Mga anak nila
ilang pamokawon
Ngadto sa eskwelahan
ilang pasudlon
Sulondong ginikanan
mga anak giatiman
Ug nagtudlo sa maayong pagtulon-an
Moadto sa simbahan uban
ang kabataan
Nanginabuhi matag adlaw, aron makapalit bugas
ug sud-an.
(Refrain I)
Oh, lakat panginabuhi
Panginabuhi sa husto
nga paagi
Oh, lakat panginabuhi
Aron ikaw makakwarta permi.
May ikatabang ka sa imong pamilya
May ikabayad ka sa imong pag-eskwela
May ikagasto ka sa imong panginahanglan
Ug kon magtapol ka walay sulod ang imong pitaka.
II
Bisan unsang panginabuhi-a
Manuroyay ka'g puto o kutsinta
Manindahay ka'g balon
o tsitseria
Mamalitay ka'g plastik,
sin o lata
Walay sapayan kon ikaw maabogan
Basta limpyo sa mata
sa kahitas-an
Atong ipasigarbo dalaygon
nga trabaho
Pagbinut-an ug pagkugi kay buligan ka sa Ginoo.
(Refrain II)
Oh, lakat panginabuhi
Maoy gitambag ni lolo
ug ni lola
Oh, lakat panginabuhi
Ayaw nianang barkada-barkada
Sigurado ka gayod
nga moasenso ka
Sigurado ka gayod
nga molampos ka
Sigurado ka gayod
nga makapundo ka
Sa bangko nga kasaligan
ug ta-as ang tubo sa imong kwarta.
Sinulog idol 5 Nagkagrabe na ang tigi
Sa labing unang higayon sa kasaysayan sa lima na ka tuig nga Sinulog Idol, wala'y natangtang nga finalist bisan ikaduhang gabii na sa kompetisyon.
Gipaabot hinuon nga sigurado na nga may napalagpot sa Upbeat Night sa maong kompetisyon kagabii.
Ang mga hurado nagkauyon nga wala lamang unay tagakon atol sa Duet Night niadtong Sabado aron paghatag og dugang kahigayunan sa 12 ka finalists.
Napili nga Stars of the Night niadtong Sabado sila si MJ Morales ug Shey Bucog sa ilang makalingaw nga duet sa kanta nga Proud Mary ni Tina Turner.
Dako kadto nga kalampusan para kanila ni Shey ug MJ sanglit sa unang gabii wala kaayo mahugyaw kanila ang mga hurado.
Una niini giabibahan og maayo si Shey diha sa Cebu City Sports Center sa iyang pag.awit atol sa Sinulog sa Kabataan sa Lalawigan adtong Sabado.
Kini kay pagsugod niya og kanta mibundak ang makusog kaayo nga uwan,apan wa gayud siya nihunong pag-awit.
Samtang niadtong Biyernes, napuno sa hudyaka ang pagbukas sa Sinulog Idol 2014 ug nahuwasan ang 12 ka finalists gumikan kay wala gyu'y natagak kanila gumikan kay gihatagan sila og tsansa sa mga hurado nga mopakita pa sa ilang dugang katakos sa pagkanta sa sunod nga mga hugna sa kompetisyon.
Nagmalipayon og maayo ang napili nga Star of the Night nga si Rayllyne Alicaya kinsa nagtungha sa kursong BS Psychology sa Cebu Normal University. Giawit niya sa unang gabii sa maong kompetisyon mao ang ‘Fallin' nga gipasikat ni Alicia Keys.
Pagsugod pa lang og birit ni Rayllyne, todo siyagit na ang mga tawo gumikan sa kanindot sa iyang tingog ug misamot ang pag-abiba sa mga tawo kaniya sa dihang nakuha gyud niya ang taas nga bahin sa maong kanta.
Ang format niadtong gabhiona mao ang "Idol's Choice,†buot pasabot mao nga sila maoy nagpili sa ilang gusto nga kantahon, busa nagkalainlain nga genre ang nagdunggan sa audience gikan sa mga finalists.
Pagkasunod gabii, gipatuman na ang pagsunod og tema, diin ang organizer na maoy mobuot sa genre. “Duet Night†niadtong Sabado, samtang kagabii, “Upbeat.â€
Mismo ang usa sa mga hurado nga si Center for Pop-Cebu branch manager Jay Unchuan ang nakauyon sa performance ni Rayllyne, ug nilenggua kini og "good job".
Samtang si Rayllyne, nibutyag dinhi sa Banat News Hugyaw (BNH) nga tungod kay siya ang napili nga Star of the Night, nakapadasig kini kaniya nga magpadayon ang hugyaw niya nga performance sa sunod niya nga pag-awit sa entablado.
"Lipay kaayo ko nga napili ko nga Star of the Night kay wala man gud ko nagdahom.nga maabot ko sa sunod nga round, Kontento naman ko nga nahimo ko nga finalist," suma pa ni Rayllyne.
Nagkanayon ang 20-anyos nga Rayllyne nga gibuhat niya ang tanan niya nga best didto sa entablado ug dako ang iyang pasalamat ngadto sa iyang pamilya ug mga higala nga supportive sa pag-apil niya sa maong kompetisyon.
Usa ka adlaw sa wala pa magsugod ang kompetisyon kay naghilak na siya gumikan kay naglain ang iyang tutonlan ug wala niya damha nga naarang-arang na ang pamati niini pag-abot sa unang gabii sa paghukom.
Dili lalim ang maagian sa finalists sanglit kada adlaw ang ilang rehearsal ug matag gabii dunay matagak nga usa ka finalist, hangtod nga unom na lang ang mahibilin ug maoy magkumbati og maayo sa grand finals karong Enero 16 diha sa Fuente Osmeña Circle.
Niabiba usab ang audience sa opening number sa Sinulog Idol 2014 sanglit milugwa ang mga kanhi idols nga napili sukad sa pagsugod sa maong contest.
Una na nga gipadayag sa project director sa maong kalingawan nga si Gloria Villarojo nga hugyaw gyud ang konsepto nila karong tuiga gumikan gidugang nila ang duet ug ang OPM rock.
Ang resident judges naglangkob nila ni BNH editor Ryan Mark, ex-Pinoy Dream Academy scholar Apple Abarquez ug Unchuan. (BANAT NEWS)