CEBU, Philippines - Dismayado ang pipila ka sakop sa Cebu Entertainment Group (E-Group) dihang dugay nga niabot sila si Kim Chiu ug Xian Lim sa ilang presscon dinhi sa Sugbo kagahapon para sa promo sa ilang umaabot nga pelikula nga "Bride For Rent."
Nasayran nga 1:30pm pa lang didto na sa presscon venue ang mga sakop sa press, apan nilungtad pa og tulo ka oras usa nilugwa sila si Kim ug Xian.
Nangayo hinuon og dispensa si Kim sa ilang pagka delatar gumikan kay puno matud pa kaayo ang ilang schedule kagahapon. Nidalikyat pud siya matud pa pagduaw sa lubong sa iyang inahan kinsa nipanaw sa nilabay nga tuig.
Nisamot ang pagka dismaya sa press gumikan kay gilimitahan lamang sila og lima ka pangutana ug kinahanglan nga kabahin lamang kini sa pelikula. Apan adunay wala nipatuo ug nangayo gayud og reaksyon kabahin sa engkwentro ni Kim sa Manila press niadtong Lunes sa gabii, diin gisumsuman ang iyang linya nga "we don't owe you any of our personal lives," sa pangutana kun uyab na ba gayud sila o dili ni Xian.
Hinuon nitubag niini si Kim, apan may usa ka babaye nga iyang kauban ang nidili na sa reporter pagluwat og follow-up question kabahin sa nahisgutang isyu nga nitumaw atol pud sa presscon para sa maong pelikula niadtong Lunes sa gabii.
Apan bisan pa man sa pagkadugay nila ni Kim ug Xian, liboan sa ilang mga fans ang nagpaabot gayud sa ilang pagtungtong sa SM City Entertainment Plaza alang sa ilang mall show.