CEBU, Philippines - Wala kaipsot si Maricel Soriano sa mga pagsaway gikan sa nitizens human kini napili nga best actress sa 39th Metro Manila Film Festival (MMFF) alang sa pelikula niya nga Girl Boy Bakla Tomboy nga gibidahan ni Vice Ganda. Pipila ka nitizens ang nagkanayon nga si KC Concepcion sa pelikulang Boy Golden maoy angayan nga makaangkon sa maong award.
Quality time
Gipahibalo ni Jake Cuenca nga dili siya magpalabi og dawat og projects karong 2014, ug iyang ipaneguro nga makagamit siya og kalidad nga oras alang sa iyang kaugalingon. Plano ni Jake nga dayonon ang pangandoy niya nga mahimong sakop sa Azkals.
Tubig sa lubi
Tsika pa ni Rafael Rosell nga ang pag-inom og tubig sa lubi maoy iyang sekreto hinungdan nga duna siya'y nindot nga pamorma sa lawas. Nasayran nga duna'y nakapundo nga lubi ang sakyanan sa aktor ug nagbalon usab siya og sundang aron ibugha sa lubi sa higayon nga siya uhawon.
Best Wishes
Nagpakasal na kagahapon sila si Direk Lino Cayetano ug sa iyang girlfriend nga si Fille Cainglet nga usa kanhi ka volleyball player sa Ateneo University. Giingong pribado kaayo ang seremonya ug ang mga sakop lang sa ilang pamilya ug suod nga mga higala ang giimbitar. "Couple wanted really intimate wedding," suma pa sa igsuon ni ni Direk Lino nga si Sen. Alan Peter Cayetano.
Nagtipun-ok ang trabaho
Gilingaw pag-ayo ni Tom Rodriguez ang iyang kaugalingon karon didto sa Amerika gumikan kay inigbalik niya dinhi sa Pilipinas sunod semana, naglinya pa ang iyang mga mall show. Wala pa nahuman ang promosyon sa album ni Tom.
Absent ang big stars
Nag-iyahay og bakasyon sa gawas sa nasud ang pipila ka big stars sa GMA-7 hinungdan nga dili kini makalugwa sa Countdown to 2014: The GMA New Year Special. Kini sama nila ni Dennis Trillo, Mark Bautista, Rachelle Ann Go, Jennylyn Mercado, Dingdong Dantes, Regine ug Marian Rivera.
Mobalhin pud
Gidungog nga mosunod pud kang Kris Aquino ang 52 ka mga staff sa programang Kris TV kung madayon ang TV host sa pagbalhin sa GMA-7 . Nasayran nga ma-expire na sunod buwan ang kontrata ni Kris sa ABS-CBN.
Karibal ni Paulo
Nitumaw ang taho nga duna pu'y interest si Luis Manzano ngadto kang KC Concepcion ug ang aktor maoy gipaabot nga mahimong lig-on nga karibal ni Paulo Avelino sa pagkab-ot sa kasing-kasing sa aktres.
Liza pakaslan ni Aiza
Nasulod na sa huna-huna ni Aiza Seguerra nga pakaslan niya sa laing nasud sunod tuig ang girlfriend niya nga si Liza Diño. Gisusi pa sa singer ang mga pamaagi niini.
Jessy ug Sandara mag-showdown
Mag-abot sa usa ka dance showdown sila si Sandara Park ug Jessy Mendiola pinaagi sa episode karong adlawa sa programang Matanglawin sa ABS-CBN. Kanhi produkto si Sandara sa Star Circle Quest ug nisikat didto sa Korea human nasakop sa grupong 2NE1.